एमालेले समर्थन फिर्ता लिँदा विश्वासको मत लिएका मुख्यमन्त्रीलाई एमालेले फेरि दियो मत

एमालेले समर्थन फिर्ता लिँदा विश्वासको मत लिएका मुख्यमन्त्रीलाई एमालेले फेरि दियो मत

A+ A A-

मधेश प्रदेशका मुख्यमन्त्री सरोज कुमार यादवले प्रदेशसभाबाट पुनः शतप्रतिशत विश्वासको मत पाएका छन् ।

प्रमुख प्रतिपक्षी दल नेकपा एमालेले पनि समर्थन गरेपछि यादवले शतप्रतिशत मत पाएका हुन् । १ जेठमा एमालेले सरकारलाई दिएको समर्थन फिर्ता लिएको थियो । त्यसको ३०औँ दिनमा यादवले विश्वासको मत लिँदा पुनः एमालेले मत दिएको हो ।

२९ पुसमा जसपा संसदीय दलका नेता यादवलाई एमाले, माओवादी केन्द्र, जनमत र दुई स्वतन्त्र सांसदको समर्थनमा प्रदेश प्रमुख हरिशंकर मिश्रले मुख्यमन्त्रीमा नियुक्त गरेका थिए । केन्द्रमा सत्ता गठबन्धन फेरिएपछि एमालेले यादवलाई दिएको समर्थन फिर्ता लिएको थियो ।

यसअघि ४ फागुनमा पनि यादवले प्रदेशसभाबाट शतप्रतिशत विश्वासको मत पाएका थिए । प्रदेशसभामा १०७ जना सांसद रहेकोमा बहुमतको लागि ५४ जना सांसदको आवश्यकता पर्छ ।

एमाले संसदीय दलका नेता सरोज यादवले संघीयतालाई बलियो र संस्थागत बनाउन दोस्रो पटक विश्वासको मत दिएको बताए । ‘हामी सत्तामा जानको लागि नभएर संघीयताको जननी मधेश प्रदेशलाई बलियो बनाउन तथा यहाँका दलित मुस्लिम, उत्पीडनमा परेका वर्गको उत्थानको लागि सरकारले सार्थक योजनाहरू ल्याओस् भन्ने सर्तमा विश्वासको मत दिएका हौँ,' उनले भने । आफ्नो पार्टीले सरकारलाई गुण र दोषको अधारमा समर्थन र विरोध गर्ने उनको भनाइ छ ।

पूर्वमुख्यमन्त्री लालबाबु राउतले संघीयतालाई समाप्त गर्न विभिन्न षडयन्त्र भइरहँदा शतप्रतिशत मत दिएर संघीयता संस्थागत गर्ने विषयमा एकमत रहेको सन्देश दिएको बताए । ‘दोस्रोपटक ऐतिहासिक विश्वासको मत पाउनु भनेको संघीयता विरोधीहरूलाई एक प्रकारले सन्देश दिनु हो,' उनले भने ।

विश्वासको मत लिने क्रममा सभामा उठेका प्रश्नको जवाफ दिँदै मुख्यमन्त्री यादवले सरकारले सबैलाई विश्वासमा लिएर अगाडि बढ्ने प्रतिबद्धता जनाए । अगामी आर्थिक वर्षमा जनमुखि बजेट ल्याउने र सत्तापक्ष र विपक्षको भेदभाव नगरी प्रदेश सरकार अगाडि बढ्ने उनको भनाइ छ ।

प्रकाशित मिति: मंगलबार, जेठ ३०, २०८० १९:५९