एसयूभी एमजी जेडएस ईभीको प्रि–बुकिङ खुल्ला, मूल्य ५२ लाख ९९ हजार

A+ A A-

एमजी भेइकलको नेपालका लागि एक मात्र आधिकारिक आयातकर्ता र वितरक पारामाउन्ट मोटर्स प्रालिले नयाँ मोडलको विद्युतीय गाडी एसयूभी एमजी जेडएस ईभी (डिलक्स) को प्रि–बुकिङ खुल्ला गरेको छ ।

आर्थिक वर्ष २०८०/८१ को बजेट भाषणमा ५० किलोवाटदेखि १०० किलोवाटसम्मका विद्युतीय गाडीमा अत्यधिक कर वृद्धि भए तापनि एमजीको यस मोडलको गाडीको मूल्य जम्मा ५२ लाख ९९ हजार रुपैयाँ मात्र तोकिएको कम्पनीले जनाएको छ । बजेट भाषणअगाडि यस गाडीको मूल्य ५२ लाख ४९ हजार थियो ।

विश्वमा चर्चित एमजी ब्रान्डले आफ्ना विविध मोडलका गाडीहरूले गर्दा नेपाली बजारमा आफूलाई एउटा अब्बल ब्रान्डको रूपमा स्थापित गर्न सफल भएको छ । एमजीले आफूलाई नेपालीहरूको सर्वाधिक रुचाइएको गाडीमध्येमा पार्न सफल भएको छ ।

कोभिडपश्चात् विद्युतीय गाडीलाई आवश्यक कच्चा पदार्थको घट्दो मूल्य तथा विश्व बजारमा यस ब्रान्डको बढ्दो मागका कारण एमजीले विश्व बजारमा आफ्नो विद्युतीय गाडीको मूल्य घटाउन सफल भएको छ । त्यस कारण विद्युतीय गाडीमा भएको कर वृद्धिका कारण पनि जेडएस ईभी (डिलक्स) मोडलको गाडीको मूल्यमा खासै फरक परेको छैन । प्यारामाउन्ट मोटर्सले बजेट घोषणा हुनुअघि पैठारी गरेको हुनाले स्टकमा ग्राहकले अझै पनि पुरानो मूल्यमा तिरेर लाभ पाउने कम्पनीको भनाइ छ ।

नयाँ एमजी जेडएस ईभी (डिलक्स) ९९ मोटर पिक पावरले सुसज्जित छ, जसले २८० एनएम अधिकतम टर्क प्रदान गर्छ र ५१ केडब्लूएच ब्याट्री क्षमताले एकल चार्जमा ३२० किमि (डब्लूएलटीपी)* को दायरा दिन्छ, जुन ३० मिनेटभित्र ८० प्रतिशतसम्म चार्ज गर्न सकिन्छ । ब्याट्रीको वारेन्टी पनि ८ वर्षको रहेको छ ।

सुरक्षाका लागि यसमा छवटा एयर ब्याग, ईएसपी, ईएबी, एचडीसी, अटो होल्डजस्ता फिचरहरू राखिएका छन् भने मनोरन्जनका लागि प्रिमियम पानोरमिक सन–रुफ, डीएबी रेडियो र ब्लुटुथयुक्त १०.१ इन्चको इन्फोटेन्मेन्ट सिस्टम राखिएको छ ।

त्यस्तै, ड्राइभरका लागि ७ इन्चको डिजिटल इन्स्ट्रुमेन्ट क्लस्टर, वायरलेस फोन चार्जिङ, कि–लेस एन्ट्री र स्टार्ट, छवटा स्पिकरसहितको थ्रीडी साउन्ड सिस्टम, ड्राइभरका लागि ६ वे र फ्रन्ट प्यासेन्जरका लागि ४वे इलेक्ट्रिकल एड्जस्टेबल लेदर पावर सिट, दुईवटा इसोफिक्स चाइल्ड सिट एन्कोरेज पोइन्टहरू (आउटर रियर सीटहरू), ६०/४० फोल्डिङ रियर सिटहरू, रूफ रेल, पावर–फोल्डिङ जस्ता फिचरहरू राखिएको कम्पनीले जनाएको छ ।

यो गाडी डोभर ह्वाइट, कोस्मिक सिल्भर, डायमण्ड रेड, पेबल ब्ल्याक र कोमो ब्लु गरी पाँच रङहरूमा उपलब्ध रहेको कम्पनीले जनाएको छ ।

प्रकाशित मिति: सोमबार, जेठ २९, २०८० १६:१२