एमडीएमएस प्रणाली प्रभावकारी रुपमा कार्यान्वयन भए वार्षिक ४ अर्ब राजस्व बढ्ने

एमडीएमएस प्रणाली प्रभावकारी रुपमा कार्यान्वयन भए वार्षिक ४ अर्ब राजस्व बढ्ने

A+ A A-

मोबाइल आयातकर्ता व्यवसायीले मोबाइल डिभाइस म्यानेजमेन्ट सिस्टम प्रभावकारी रुपमा कार्यान्वयनमा आए वार्षिक ४ अर्ब रुपैयाँ थप राजस्व बढ्ने बताएका छन् । आइतबार मोबाइल आयातकर्ता व्यवसायीहरूले एमडीएमएस प्रणालीका विषयमा जानकारी दिन काठमाडौंमा आयोजना गरिएको अन्तरक्रिया कार्यक्रममा यस्तो बताएका हुन् । उनीहरूले एमडीएमएस प्रणाली लागू नहुँदा अर्बौं रुपैयाँ बराबरका मोबाइलहरू अवैध रुपमा नेपाल आएको र जसबाट राज्यले ४ अर्ब बराबरको राजस्व गुमाउने गरेको भन्दै तत्काल प्रभावकारी रुपमा मोबाइल डिभाइस म्यानेजमेन्ट सिस्टम लागू गरे ४ अर्ब बराबरको राजस्व बढ्ने बताए ।

कार्यक्रममा बोल्दै मोबाइल आयातकर्ता संघ नेपालका अध्यक्ष दीपक मल्होत्राले बजारमा एमडीएमएस प्रणालीका कार्यान्वयनमा आएसँगै मोबाइलको मूल्य बढ्छ भन्ने गलत हल्ला फैलिएको बताए । उनले चोरीका रिफर्बिस अनि कम गुणस्तरका फोनहरू नभित्रने हुँदा उपभोक्ता ठगिनु नपर्ने बताए । उनले अवैध मोबाइल आयातले वास्तविक मोबाइल व्यवसाय ३० प्रतिशतमा खुम्चिएको जनाए । उनले प्रणाली लागू भएसँगै मुलुकमा अवैध मोबाइलको आयात घट्ने जानकारी दिए । उनले जेठ १ गतेपछि एमडीएमएसका कारण व्यवसाय तङ्ग्रिन लागेको बताए ।

त्यस्तै, नेपाल दूरसञ्चार प्राधिकरणका अध्यक्ष पुरुषोत्तम खनालले नेपालमा प्रयोग गर्न अनुमति नदिएका मोबाइल फोनहरू नेपाली बजारमा देखिएकाले कम गुणस्तरका मोबाइलहरूको नियन्त्रण गर्नका लागि एमडीएमएस प्रणाली लागू गरिएको बताए । उनले प्राधिकरणले मोबाइल एमडीएमएस प्रणाली लागू गरेर राजस्व उठाउन नखोजेको भन्दै कालोबजारीलाई नियन्त्रण गर्न खोजेको जनाए । उनले दूरसञ्चार प्राधिकरण कालोबजारीका विरुद्ध प्रणाली लागू गर्दा व्यवसायीहरूको पक्षमा प्राधिकरण देखिएको भन्दै अन्यथा नबुझ्न आग्रह गरे ।

प्रकाशित मिति: आइतबार, जेठ २८, २०८० १७:४२