'नीरफूल' प्रदर्शन भइरहँदा 'दिमाग खराब'मा व्यस्त दयाहाङ भन्छन्- ८० सालमा पाँच फिल्म खेल्छु (भिडियाेसहित)

'नीरफूल' प्रदर्शन भइरहँदा 'दिमाग खराब'मा व्यस्त दयाहाङ भन्छन्- ८० सालमा पाँच फिल्म खेल्छु (भिडियाेसहित)

A+ A A-

नेपाली सिने जगत्‌मा स्थापित नाम हो, दयाहाङ राई । सन् २००६ मा 'अनागरिक' फिल्मबाट चलचित्र उद्याेगमा पाइला राखेका उनले हालसम्म दर्जनौँ फिल्ममा तारिफयाेग्य काम गरिसकेका छन् । यति मात्र हाेइन, उनले नेपाली सिनेमाप्रतिको स्थापित 'नजरिया'मै बदलाव ल्याइदिएका छन् ।

भोजपुरकाे खावा गाउँमा जन्मे/हुर्केका उनकाे सपना लाहुरे हुने थियाे । त्यही सपना पूरा गर्न गाउँबाट काठमाडाैं आइपुगे । तर, यता आएपछि उनकाे चाहत बदलियाे । उनलाई कवितामा रूचि जाग्याे । भन्छन्, 'अब कवि बन्न भूत चढ्याे ।'

याे पनि..

हिरो बन्छु भन्दा खिल्ली उडाउँथे

यही हुटहुटीले दयाहाङलाई रंगमञ्जहुँदै फिल्मसम्म ल्याइपुर्‍यायाे ।

फिल्म 'कबड्डी' मार्फत चर्चाको शिखर चुमेका दयाहाङ नेपाली सिने जगत्‌का निकै थोरैमध्येका प्रभावशाली अभिनेता बनिसकेका छन् ।

उनी अभिनित 'जारी' २०८० सालको पहिलो दिन प्रदर्शनमा आएको थियाे । उक्त सफल फिल्मकाे चर्चा सेलाउन नपाउँदै दयाहाङ स्टारर अर्काे चलचित्र ‘नीरफूल’ शुक्रबारबाट प्रदर्शनमा आएकाे छ ।

‘नीरफूल’बारे उनी भन्छन्, ‘पाँच वर्षअघि नीरफूलको कथा पाएको थिएँ । जुन कथाले मेरो मन जित्याे र यसका लागि तयार भएँ । मैले गरेका पछिल्ला सिनेमामध्ये सबैभन्दा मन परेको कथा हाे नीरफूल ।'

उनका अनुसार, ‘नीरफूल’ भूकम्पले विछोडिएको परिवारकाे कथा हाे । २०७४ सालमा तयार नीरफूल प्रदर्शनीको ठ्याक्कै मुखमा कोरोना महामारी सुरु भएपछि राेकिएकाे थियो ।

याे पनि..

एक सिनेमाटोग्राफरकाे यात्रा : बिहे खिच्दाकाे अपमानदेखि 'कान्स'काे सम्मानसम्म

गणेश हिमाल क्षेत्रमा पर्ने (स्थानीय रूपमा रुविभ्याली) पाङसाङमा भेडा पालेर जीविकोपार्जन गर्ने एउटा परिवारलाई भूकम्पले पारेको असरमा ‘नीरफूल’काे कथा घुमेकाे दयाहाङले बताए ।

उनी दर्शकलाई भन्छन्, ‘मैले त भन्ने यति हो, नीरफूल एउटा सुन्दर सिनेमा बनेको छ, हेर्नुहोस् पछुताउनु पर्दैन ।’

गत वर्ष गाउँ आएको बाटो, कबड्डी-४, के घर के डेरा र दुई नम्बरी गरी चारवटा सिनेमा गरेका उनी २०८० सालभित्र पाँचभन्दा बढी सिनेमामा काम गर्ने याेजनामा छन् ।

अहिले सिनेमाघरमा आफू अभिनित ‘नीरफूल’ प्रदर्शन भइरहँदा दयाहाङ नयाँ फिल्म दिमाग खराब काे छायाङ्कनमा व्यस्त छन् ।

यसअघि हात्तीछाप र डिग्री माइलामा साइन गरिसकेका उनले शेर्पा परम्परामा आधारित सिनेमा कार्साङका लागि पनि सम्झौता गरेका छन् ।

भिडियाेः

प्रकाशित मिति: शनिबार, जेठ २७, २०८० ०८:४३