बारामा मापदण्डविपरीत उद्योग सञ्चालन, नेपोभिट टायल्सको प्रदूषणले स्थानीय पीडित

बारामा मापदण्डविपरीत उद्योग सञ्चालन, नेपोभिट टायल्सको प्रदूषणले स्थानीय पीडित

A+ A A-

घना बस्ती र विद्यालयबाट निश्चित दूरीमा मात्र उद्योग सञ्चालन गर्नुपर्ने प्रावधान भए पनि बाराका केही उद्योगले सो मापदण्ड पालना गरेका छैनन् ।मापदण्डविपरीत सञ्चालित एक दर्जन उद्योगका कारण स्थानीय तथा विद्यार्थी जोखिमपूर्ण जीवन यापन गर्न बाध्य भएका छन् ।

वीरगंज पथलैया औद्योगिक करिडोरको जीतपुर सिमरा उपमहानगरपालिकाको वडा न ८ रामैलिमा रहेको नेपाल सेरामिक इन्डष्ट्री विद्यालय र बस्ती नजिकै वर्षौंदेखि सञ्चालनमा छ । नेपाल राष्ट्रिय आधारभूत विद्यालय रमौली भन्दा ३०० मिटर मात्रै टाढा नेपाल सेरामिक इन्डष्ट्रीद्वारा सञ्चालित नेपोभिट टायल्स उद्योग छ ।

मापदण्डअनुरुप विद्यालय र उद्योगबीचको दूरी नभएकाले विद्यार्थी र स्थानीय प्रभावित भएका छन् । टायल्स बनाउन राखेको माटो उड्ने गरेकोले किसानले लगाउने बालीनालीमा समेत क्षति पुगेको स्थानीय छोटेलाल चौधरीले बताए ।

उद्योगमा टायल्स बनाउन राखिएको माटोको धुलो हावाको माध्यमबाट उड्ने गरेकोले वातावरण प्रदूषण भएको र स्थानीयलगायत विद्यार्थीमा पर्ने नकरातम्क असरबारे उद्योगलाई बारम्बार वडा कार्यालयले जानकारी गराउँदासमेत उद्योगले प्रदूषण नियन्त्रण गर्नुको सट्टा उद्योगमा कार्यरत स्थानीयलाई कामबाट निकाल्ने र भारतीय कामदारलाई ल्याएर राखेको वडा अध्यक्ष शिव शंकर प्रसाद कोइरीले बताए ।

नेपाल सेरामिक इन्डष्ट्रीले वडा न ८ को स्थानीय खोलामा छोड्ने फोहोरले त्यो खोलाको पानि निकै नै प्रदूषित भएको र त्यही पानी गाई, भैंसी र बाख्राले खानदा मर्नेसमेत भएको स्थानीयहरू बताउँछन् ।