अधिकांश पुरानै कार्यक्रम समेटेर ल्यायो मधेश प्रदेश सरकारले नीति तथा कार्यक्रम (पूर्ण पाठ)

A+ A A-

मंगलबार मधेश प्रदेश प्रमुख हरिशंकर मिश्रले प्रदेश सरकारले आगामी आर्थिक वर्ष २०८०/८१ को नीति तथा कार्यक्रम प्रदेशसभामा प्रस्तुत गरे । अधिकांश पुरानै कार्यक्रम समेटेर प्रदेश सरकारले नीति तथा कार्यक्रम ल्याएको हो ।

प्रदेश सरकारले ल्याएको १८९ बुदेँ नीति तथा कार्यक्रममा कृषि, चुरे संरक्षण, पर्यटन प्रवर्द्धन, रोजगारीलगायतमा विशेष जोड दिइएको छ । बेटी पढाउ बेटी बचाउ, जहाँ बाटो त्यहाँ विकास, हरित प्रदेश अभियान, चुरे बचाउ मधेश जोगाउँ, मुख्यमन्त्री किसान उत्थान कार्यक्रम, मुख्यमन्त्री स्वच्छता अभियानलगायत पुराना कार्यक्रम पनि समेटिएका छन् ।

प्रदेश सरकारले बेटी पढाउ बेटी बचाउ कार्यक्रम पछिल्लो ४ वर्षदेखि सञ्चालन गरिरहेको छ । सोही कार्यक्रमअन्तर्गत रहेका किशोरी बीमा, साइकल वित्तरण, ल्यापट वितरण चालु आर्थिक वर्षमा सञ्चालन हुन सकेका छैनन् ।

मुख्यमन्त्री किसान उत्थान कार्यक्रमको लागि विगत तीन वर्षदेखि बजेट विनियोजन हुँदै आए पनि सञ्चालन हुन सकेको छैन । हाम्रो प्रदेश उज्यालो प्रदेश कार्यक्रम प्रत्येक वर्षको नीति तथा कार्यक्रम राख्ने गरिए पनि अहिलेसम्म प्रदेश सरकारले एक युनिट पनि ऊर्जा उत्पादन गर्न सकेको छैन ।

मुख्यमन्त्री स्वच्छता अभियान अन्तर्गत केहि पोखरीहरूको संन्र्दयकराण गरिएपनि त्यसमा अनियमितता भएपछि चालु आर्थिक वर्षमा अलपत्र छ ।

कृषिमा जोड

मानवीय क्षमता विकास, पूर्वाधार निर्माण, उद्यमशीलता र रोजगारी अभिबृद्धि, गरिबी न्यूनीकरण, दिगो विकास तथा पर्यावरण संरक्षण र सुशासनको प्रत्याभूतिलाई प्राथमिकतामा राखेको छ ।

कृषि क्षेत्रको उत्पादन तथा उत्पादकत्त्व सम्वर्द्धन अभिवृद्धिका लागि निर्वाहमुखी खेती प्रणालीलाई व्यावसायिक खेती प्रणालीमा रुपान्तरण गरिने उल्लेख छ । किसानलाई प्रत्यक्ष लाभ हुने गरी समयमै मल, उन्नत बीउ बिजन, प्राविधिक सेवा तथा अन्य आवश्यक सामाग्रीहरूको उपलब्धताको सुनिश्चितता गर्नुको साथै वस्तुपरक आधारमा अनुदान दिने प्रदेश सरकारको नीति तथा कार्यक्रममा उल्लेख छ ।

प्रदेश र स्थानीय तहको सहकार्यमा बाँझो एवं उपयोगविहीन खेतीयोग्य जमीनको प्रयोग (कृषक समूह तथा कृषक सहकारीलाई लिजमा जमीन उपलब्ध गराउने व्यवस्था), 'एक टोल एक सामूहिक कृषि उत्पादन', 'एक वडा एक विशेष उत्पादन' र 'एक पालिका एक उत्पादन क्षेत्र'लगायतका कार्यक्रम सञ्चालन गरिनेछ ।

प्रकाशित मिति: मंगलबार, जेठ २३, २०८० २१:१६