बेलायती हतियार स्टोर्म स्याडो, जसले युक्रेनलाई युद्ध जिताउन मद्दत गर्न सक्छ (भिडियो)

बेलायती हतियार स्टोर्म स्याडो, जसले युक्रेनलाई युद्ध जिताउन मद्दत गर्न सक्छ (भिडियो)

A+ A A-

गत मे ११ का दिन बेलायती सरकारले युक्रेनलाई आफूहरूले स्टोर्म स्याडो क्षेप्यास्त्र सहयोग गरेको जानकारी दियो । तर कति मात्रामा उक्त हतियार प्रदान गरियो भनेर खुलाइएको छैन ।

लामो दूरीमा मार हान्न सक्ने यस क्रुज क्षेप्यास्त्रले २ सय ४१ किलोमिटर परसम्म पुगेर मार हान्न सक्छ । अर्थात् हाल युक्रेनले रुसविरुद्धको युद्धमा प्रयोग गरिरहेको मिसाइलभन्दा बेलायतले प्रदान गरेको स्टोर्म स्याडो तीन गुणा टाढा पुगेर दुस्मनलाई आक्रमण गर्न सक्षम छ ।

यस हतियारले युक्रेनलाई रूसी सेनाका मूल्यवान् क्षेत्रहरूमा हमला गर्न सहज बनाउनेछ, जुन पहिले पहुँचभन्दा बाहिर थियो ।

सीमित संख्यामा मात्र युक्रेनले नयाँ क्षेप्यास्त्र स्टोर्म स्याडो प्राप्त गरेको अनुमान छ । जसका कारण युक्रेनले यो हतियारको प्रयोग कब्जा गरिएका आफ्ना क्षेत्रहरूमा, रूसी सेना र उनीहरूका हतियारमा केन्द्रित गर्ने सम्भावना छ ।

(भिडियो)

बेलायतबाट युक्रेनले पाएको क्षेप्यास्त्रको दायरालाई ध्यानमा राख्दै अब रूसी सैन्य योजनाकारहरूले आफ्नो पुँजी बचाउने प्रयासहरू गर्नुपर्नेछ । उनीहरूले कसरी हतियार तथा खानाको भण्डार, कमाण्ड र नियन्त्रण केन्द्रहरू साथै युद्धको अग्रपंक्तिमा राखिएका उपकरणहरूलाई अझ राम्रोसँग सुरक्षा गर्ने भनेर फेरि विचार गर्नुपर्नेछ ।

किनभने अब युक्रेनले २ सय ४१ किलोमिटर परबाटै रुसी सेनाविरुद्ध आक्रमण गर्न सक्छन् । युक्रेनमा रहेका रुसी युद्धक विमान र विमान राखिने एयरक्राफ्ट ह्यांगर पनि बेलायती क्षेप्यास्त्रका कारण जोखिममा परेका छन् ।

बेलायतले दिएको स्टोर्म स्याडो हतियार सोभियतकालीन युक्रेनी लडाकु विमान एसयू–२४ फेन्सर जेटबाट प्रहार गरिनेछ । टाढैबाट आक्रमण गर्ने हतियार पाउँदा युक्रेनपट्टि हताहतीको सम्भावना हुने छैन ।

यो क्षेप्यास्त्रको प्रभावकारिताबारे रुस आफैँले गत मे १२ का दिन जानकारी दिएको थियो । पूर्वी युक्रेनी शहर लुहान्स्क हाल रुसी कब्जामा छ । रुसले त्यसबेला सोही शहरका दुई औद्योगिक क्षेत्रमा युक्रेनले बेलायती क्षेप्यास्त्रले आक्रमण गरेको आरोप लगाएको थियो ।

अमेरिकाले युक्रेनलाई दिएको हिमार्स क्षेप्यास्त्रभन्दा पनि बेलायतले दिएको स्टोर्म स्याडो शक्तिशाली छ । हिमार्सले मात्र ८० किलोमिटरको दूरीमा आक्रमण गर्न सक्छ ।

बेलायतले नेटोको मापदण्डमा खतरा मानिएको प्रमुख युद्धक ट्यांक च्यालेन्जर दिने पनि युक्रेनसँग वाचा गरेको छ । गत जनवरीमै बेलायतले युक्रेनलाई १४ वटा च्यालेन्जर ट्यांक दिने बताएको थियो ।

बेलायतको प्रधानमन्त्री कार्यालयले शक्तिशाली ड्रोन हतियार दिने पनि जानकारी दिएको छ । ड्रोनबारे केही नभनिए पनि यो ड्रोनले २०० किलोमिटरभन्दा बढीको दूरी तय गर्न सक्ने बताइएको छ । सन् २०२२ मै बेलायतले युक्रेनलाई मल्टिपल लन्च रकेट सिस्टम एम २७० र एम ३१ ए १ प्रेसिजन हतियार दिने बताएको थियो ।

बेलायतको एक २७० हतियार प्रणाली अमेरिकाको हिमार्स क्षेप्यास्त्र प्रणालीजस्तै हो । बेलायतले युक्रेनलाई चाँडै ५ हजारभन्दा बढी अत्याधुनिक एन्टी ट्यांक हतियार पनि दिनेछ । यो हतियारले दुस्मनको ट्यांक ध्वस्त गर्न मद्दत पुग्छ ।

बेलायतले मात्र नभएर अमेरिकाले पनि युक्रेनलाई शक्तिशाली हतियारहरू दिने वाचा गरेको छ । अमेरिकाको पछिल्लो सहयोगमा अत्याधुनिक एफ–१६ लडाकु विमानहरू, हिमार्स रकेट प्रणाली र थप ३७५ मिलियन अमेरिकी डलरको हतियार समावेश छन् । यी हतियारले युक्रेन आफ्नो मातृभूमि जोगाउन सफल हुने अमेरिकी विश्वास छ । बीबीसीको सहयोगमा

प्रकाशित मिति: मंगलबार, जेठ २३, २०८० १८:०२