माओवादीले छोड्यो कोशी सरकार

A+ A A-

कोशी प्रदेश सरकारबाट नेकपा माओवादी केन्द्र बाहिरिने निर्णय गरेको छ । मंगलबार प्रदेश संसदीय दल र पार्टी पदाधिकारीबीच बसेको संयुक्त बैठकपछि नेकपा माओवादी केन्द्रले कोशी सरकार छाड्ने निर्णय गरेको हो ।

संयुक्त बैठकले सरकारमा सहभागी दुई मन्त्रीहरूलाई राजीनामा बुझाउने र संसदीय दललाई सरकारको समर्थन फिर्ता गर्न निर्देशन दिएको माओवादी केन्द्र कोशी प्रदेशका अध्यक्ष हर्कबहादुर नेम्वाङ मिक्सोले बताए ।

मुख्यमन्त्री हिक्मत कार्की नेतृत्वको कोशी सरकारमा माओवादीको तर्फबाट कार्की नेतृत्वको सरकारमा दुई जना मन्त्री सहभागी थिए । माओवादी केन्द्रको सचिवालय बैठकले एमाले नेतृत्वको सरकारको समर्थन छोड्न निर्देशन दिएपछि सोमबारदेखि नै प्रदेश नेतृत्वमा सरकार छोड्नेबारे छलफल सुरु भएको थियो ।

सोमबार मात्र संसदीय दलको बैठकले सरकारको छाड्ने नछाड्नेबारे छलफल चलाएको थियो । छलफलले पार्टी नेतृत्वबीचसमेत छलफल गर्नुपर्ने भन्दै आजको लागि संयुक्त बैठक बोलाएको थियो ।

केही दिनअगाडि सरकारमा सहभागी जसपासमेत सरकारबाट बाहिरिएको थियो । जसपाकी एक मात्र सांसद निर्मला लिम्बूले पनि स्वास्थ्यमन्त्रीबाट राजीनामा दिएकी थिइन् । राजीनामा गरे पनि जसपाले अहिलेसम्म संसद सचिवालयमा प्रदेश सरकारलाई दिएको समर्थन फिर्ता लिएको औपचारिक जानकारी भने दिएको छैन ।

जसपाले सरकारबाट बाहिरिएपछि केन्द्रीय गठबन्धनमा रहेका दलहरूले माओवादीलाई समेत सरकार छाड्न दबाब बढाएका थिए । केन्द्र सरकारको संरचनाजस्तै कोशीमा सरकार गठन गर्नुपर्ने भन्दै नेपाली काङ्ग्रेसले राख्दै आएको थियो । गत जेठ ४ गते काङ्ग्रेस संसदीय दलले पत्र नै पठाएर सरकारको समर्थन छोड्न माओवादीलाई आग्रह गरेको थियो ।

माओवादीले समर्थन फिर्ता लिएर सरकार छाडेपछि मुख्यमन्त्री हिक्मत कार्की नेतृत्वको कोशी प्रदेश सरकार सकसमा परेको छ । ९३ सदस्यीय प्रदेशसभामा एमाले, माओवादी, राप्रपा र जसपाका गरी ५९ सांसदको समर्थनमा कार्की गत पुस २४ गते मुख्यमन्त्रीमा नियुक्त भएका थिए ।

माओवादीका १२ सांसदले समर्थन फिर्ता लिएसँगै हिक्मत कार्की नेतृत्वको सरकार अल्पमतमा परेको छ । जसपाले एमालेलाई दिएको समर्थन अहिलेसम्म फिर्ता नलिएकाले अझै पनि कार्की नेतृत्वको सरकारमा ४७ सांसदको समर्थन भने देखिन्छ ।

प्रकाशित मिति: मंगलबार, जेठ २३, २०८० १३:०४