देशभरिमा मिटरब्याजीविरुद्धको साढे २१ हजार उजुरी, सबैभन्दा बढी मधेशमा

A+ A A-

मधेश प्रदेशमा मिटरब्याजीविरुद्धको १७ हजार ८ सय ५६ उजुरी परेका छन् । संघीय सरकारले अनुचित लेनदेन (मिटरब्याज) सम्बन्धी जाँचबुझ आयोगको कार्यालय जनकपुरधाममा स्थापना गरेपछि जिल्लाजिल्लामा सोविरुद्धको उजुरीको संख्यामा बढेको छ । उजुरी दिनेको संख्या बढ्दै गएपछि उजुरी लिने समय पनि थपिँदै गएको छ ।

सुरुमा वैशाख १७ गतेदेखि ३१ गतेसम्म उजुरी लिने भनेर समय तोकिएको थियो । त्यस अवधिमा उजुरी दिनेको संख्या बढ्दै गएपछि म्याद थप गरी जेठ १४ गतेसम्मका लागि बढाइएको थियो । तर अझै पनि जिल्लामा आउने मिटरब्याजीविरुद्धको उजुरी अनलाइनमार्फत दर्ता भइरहेको छ ।

मिटरब्याज (अनुचित लेनदेन) सम्बन्धी जाँचबुझ आयोगले मिटरब्याजपीडितका लागि १७ वैशाखदेखि देशभर उजुरी दिन आह्वान गरेको थियो ।

‘ऋण लिँदा जग्गा रजिस्ट्रेसन पास गराएर साँवा र ब्याज तिर्दा पनि जग्गा नफर्काएको जस्ता धेरै केसहरू देखिएको छ,’ अयोगका सदस्य उत्तमराज सुवेदीले भने, ‘ऋण लिँदा साहुले गरिबसँग बैंकको खाली चेक लिए । पछि बाउन्स गराएर समस्यामा परिदिएको जस्ता उजुरी पनि आएका छन् ।’ बैंकबाट ऋण उपलब्धता सहज नहुँदा मिटरब्याजमा फस्नेहरूको संख्यामा बढेको उनले बताए ।

सुवेदीले कानुनविपरीत चर्को ब्याज लिने कसैले उन्मुक्ति नपाउने बताए । वैदेशिक रोजगारीमा जानकै लागि पनि मिटरब्याजको जालोमा फस्नेको संख्या अत्यधिक रहेको पाइएको उनको भनाइ छ । मिटरब्याजविरुद्धको उजुरी अझै पनि अनलाइनमार्फत दर्ता भइरहेको उनले बताए ।

‘पहिलो चरणमा जिल्ला प्रशसानमा रहेको टास्क फोर्सले उजुरीमाथि सुनवाइ गरी मिलापत्र गराउने र मिलापत्र नभएको खण्डमा कानुनअनुसार अगाडि बढ्नेछ,’ उनले भने, ‘यी कार्यहरु अगाडि बढाउन केही समस्या भएको खण्डमा आयोगले समन्वयको भूमिका खेल्नेछ ।’ टास्क फोर्समा जिल्ला प्रशासन कार्यालयका सहायक प्रमुख जिल्ला अधिकारी संयोजक रहेका छन् भने जिल्ला प्रहरी कार्यालयका प्रतिनिधि, जिल्ला सरकारी वकिल कार्यालयका प्रतिनिधि र जिल्ला प्रशासन कार्यालयका प्रतिनिधि गरी ४ सदस्य रहेका छन् ।

मधेश प्रदेशमा १७ हजार ८ सय ५६ उजुरी

अहिलेसम्म मधेश प्रदेशका विभिन्न ८ जिल्लाका जिल्ला प्रशासन कार्यालयहरूमा मिटरब्याजीविरुद्ध १७ हजार ८ सय ५६ वटा उजुरी परेका छन् । सूचना आह्वान भएदेखि अहिलेसम्म मधेश प्रदेशका ८ जिल्लामा अनलाइनमार्फत ४ हजार ५३३ गरी जम्म १७ हजार ८ सय ५६ वटा उजुरी परेको आयोगले जनाएको छ ।

मिटरब्याजीविरुद्ध सबभन्दा बढी बारा जिल्लामा ३ हजार ३२२ उजुरी परेका छन् भने सबभन्दा कम पर्सामा १ हजार ३ सय उजुरी मात्र परेका छन् । त्यसैगरी, धनुषामा २ हजार ६११, सिरहामा २ हजार ९१६ उजुरी र महोत्तरीमा २ हजार १९४ उजुरी प्राप्त भएको आयोगले जनाएको छ ।

रौतहटमा २ हजार ४७, सर्लाहीमा १ हजार ९२० र सप्तरीमा १ हजार ५४६ उजुरी परेको आयोगले उपलब्ध गराएको तथ्यांकमा उल्लेख छ । आयोगका अनुसार सबभन्दा बढी मधेश प्रदेशमा, कोशी प्रदेशमा ३७७, बागमती प्रदेशमा ३३४, गण्डकीमा १४०, लुम्बिनीमा ३ हजार १२, कर्णालीमा १०८ र सुदरपश्चिममा २४९ वटा गरी साढे २१ हजार उजुरी परेका छन् ।

प्रकाशित मिति: सोमबार, जेठ २२, २०८० १५:३८