चिनियाँ सैन्य जहाजले अमेरिकी युद्धपोतलाई पछ्यापछि अमेरिका रुष्ट (भिडियो)

A+ A A-

दक्षिण चीन सागरको हवाई क्षेत्रमा गतहप्ता मात्र चीनको एक लडाकु विमानले अमेरिकी सैन्य विमानलाई पछ्याएको थियो ।

अमेरिका र चीनबीच धेरै विषयमा विवाद जारी रहेकै समयमा उनीहरूका लडाकु विमानहरू आमनेसामने भएका थिए ।

त्यसबेला अमेरिकाले अन्तर्राष्ट्रिय हवाई क्षेत्रमा चिनियाँ लडाकु विमानले आफ्नो एक विमानलाई बाधा पुर्‍याएको र अनावश्यक रुपमा आक्रामक गतिविधि देखाएको बताएको थियो ।

यतिबेला फेरि चिनियाँ सैन्य पानी जहाजले अमेरिकी सैन्य जहाजलाई समुद्रमा पछ्याएको छ । दक्षिण चीन सागर र पूर्वी चीन सागरको बीच क्षेत्रको समुद्री क्षेत्रमा चीनको मिसाइल डिस्ट्रोयर जहाजले शनिबार मात्र अमेरिकी युद्धपोतलाई पछ्याएको हो ।

भिडियो

ताइवान र चीन बीचको समुद्री सीमा क्षेत्र ताइवान स्ट्रेटमा अमेरिकी र क्यानडेली युद्धपोत देखेपछि चीनका सेनाले चेतावनी दिँदै अमेरिकी जहाज पछ्याएको थियो । चिनियाँ सैन्य जहाजले आफ्नो युद्धपोतलाई पछ्याएपछि अमेरिका रुष्ट बनेको छ । अमेरिकी रक्षामन्त्री लोयड अस्टिनले चीनले बारम्बार गैरजिम्मेवारपूर्ण गतिविधि देखाएको आरोप लगाएका छन् ।

शनिबार अमेरिका र क्यानडाका जहाजहरू ताइवान स्ट्रेट हुँदै तैरिएका बेला चिनियाँ जहाजले असुरक्षित र जानाजानी जोखिम निम्त्याउने प्रयास गरेको अमेरिकी भनाइ छ ।

यसैबीच चीनका रक्षामन्त्री ली साङ्फुले पदभार सम्हालेपछि आफ्नो पहिलो भाषणमा अमेरिकासँग युद्धका कुरा गरेका छन् । उनले अमेरिकासँग चीनको युद्ध भए त्यो विश्वका लागि असहनीय प्रकोपजस्तै हुने उल्लेख गरे ।

सिंगापुरमा जारी एसिया प्यासिफिक क्षेत्रको वार्षिक सुरक्षा सम्मेलन ‘साङ्ग्री–ला संवाद’मा ली साङ्फुले अमेरिका र चीनले साझा आधार र साझा हित खोज्नुपर्नेमा पनि जोड दिए।

सम्मेलनमा अमेरिकी रक्षामन्त्री लोयड अस्टिन पनि सहभागी थिए । लीलेले सोझै अमेरिकाले शीतयुद्धको मानसिकता राखेको आरोप लगाउँदै जोखिम बढाउने काम गरिरहेको बताए । रोयटर्सको सहयोगमा

प्रकाशित मिति: सोमबार, जेठ २२, २०८० १४:०९