गौर नरसंहारमा उपेन्द्र यादव लगायतविरुद्धकाे मुद्दा न्यायाधीश रेग्मीको इजलासमा

गौर नरसंहारमा उपेन्द्र यादव लगायतविरुद्धकाे मुद्दा न्यायाधीश रेग्मीको इजलासमा

A+ A A-

गौर हत्याकाण्ड प्रकरणमा जसपा अध्यक्ष उपेन्द्र यादवलगायतका विरुद्धको रिट न्यायाधीश कुमार रेग्मीको इजलासमा परेको छ । नरसंहारका दोषीमाथि छानबिन गरी कानुनी कारबाही गर्न माग गर्दै त्रिभुवन साहले सर्वोच्चमा रिट दर्ता गराएका थिए ।

१६ वर्षअघि भएको गौर हत्याकाण्डको छानबिन गरी दोषीमाथि कारबाही हुनुपर्ने मागसहित पीडितले दिएको रिट आइतबार सर्वोच्च अदालतमा दर्ता भएको हो । गौर हत्याकाण्डमा मारिएकाहरूका आफन्तहरूले जिल्ला प्रहरी कार्यालय रौटहटमा जाहेरी दिँदासमेत छानबिन नभएको भन्दै अनुसन्धान अघि बढाउन आदेश माग गर्दै सर्वोच्चमा रिट हालेका हुन् ।

२०६३ साल चैत ७ गते रौतहटको गौरमा रहेको राइस मिलमा मधेसी जनअधिकार फोरम र तत्कालीन नेकपा माओवादीले एकै स्थानमा मञ्च तयार पारी कार्यक्रमको आयोजना गर्दा २७ जना माओवादी कार्यकर्ताको हत्या भएको थियो । हत्यामा तत्कालीन जनअधिकारका अध्यक्ष यादवलगात फोरमसम्बद्ध नेता, कार्यकर्ताको हात रहेको दाबी गरेको छ ।

हत्याकाण्डविरुद्ध जिल्ला प्रहरी कार्यालय रौतहटमा जाहेरी दिँदा प्रहरीले छानबिन गरी दोषीमाथि मुद्दा दायर नगरेको भन्दै पीडितका परिवार तथा आफन्तले आइतबार सर्वोच्च अदालतमा मुद्दा दर्ता गराएका थिए । उक्त मुद्दाको पेसी सोमबारका लागि तोकिएको थियो ।

पीडित परिवारका तर्फबाट त्रिभुवन साहले रिट दर्ता गराएका छन् भने उक्त घटनाको पुनः अनुसन्धान र प्राप्त प्रतिवेदनका आधारमा मुद्दा दायर गर्न माग गरिएको छ । मुद्दामा रौटहट प्रहरी, सरकारी वकिल कार्यालय, प्रहरी प्रधान कार्यालय, गृह मन्त्रालयलगायतलाई विपक्षी बनाइएको छ ।

७ चैत २०६३ मा रौटहटको गौरस्थित राइसमिलको चौरमा तत्कालीन मधेशी जनअधिकार फोरम र माओवादीबीच भएको झडपमा माओवादीका २७ जना कार्यकर्ता मारिएका थिए भने सयभन्दा बढी घाइते भएका थिए । न्यायाधीश रेग्मीको इजलासमा परेको उक्त मुद्दा पेसी सूचीको अन्तिममा परेको छ ।

प्रकाशित मिति: सोमबार, जेठ २२, २०८० ११:२१