गौर हत्या प्रकरणमा उपेन्द्र यादवलगायतविरुद्ध सर्वोच्चमा रिट, सोमबार पेसी

A+ A A-

१६ वर्षअघि भएको गौर हत्याकाण्डको छानबिन गरी दोषीमाथि कारबाही हुनुपर्ने मागसहित पीडितले सर्वोच्च अदालतमा दिएको रिट दर्ता भएको छ । सोमबारका लागि उक्त र रिटको पेसी तोकिएको छ ।

गौर हत्याकाण्डमा मारिएकाहरूका आफन्तहरूले जिल्ला प्रहरी कार्यालय रौटहटमा जाहेरी दिँदासमेत छानबिन नभएको भन्दै अनुसन्धान अघि बढाउन आदेश माग गर्दै सर्वोच्चमा रिट हालेका हुन् ।

गौर हत्याकाण्डका आरोपितविरुद्ध मुद्दा दर्ता भएको रौतहट बौद्धिमाई नगरपालिका–८ का नर्मदेश्वर उपाध्यायकी पत्नी रूपसागर देवी उपाध्यायले जानकारी दिइन् ।

‘गौर हत्याकाण्ड भएको १७ वर्ष भइसक्यो, हामी न्यायका लागि धेरै धायौँ । तर, अहिलेसम्म न्याय पाएनौँ । अति भएपछि सर्वोच्चमा मुद्दा दर्ता गराएका हौँ,’ रूपसागर देवी उपाध्यायले भनिन्, ‘न्यायको लागि धेरै भौतारिनुपर्‍यो । धेरैपटक आन्दोलन गर्‍यौँ, अनशन बस्यौँ, आज बल्ल मुद्दा दर्ता भएको छ । अब न्याय पाउने आसा छ ।’

तत्कालीन मधेसी जनअधिकार फोरमका नेता उपेन्द्र यादवसहित घटनाका ‘दोषी’विरुद्ध कारबाहीको माग गर्दै मुद्दा दर्ता गरेको पीडितका आफन्त अमर साहले बताए । उनले भने, ‘आज मुद्दा दर्ता भएको छ अब छानबिन हुनेछ । पीडितले न्याय पाउने छौँ । अपराधीले सजाय पाउने आस छ ।’

मृतकका आफन्तहरूले केही दिन पहिला उपप्रधानमन्त्री तथा गृहमन्त्री नारायणकाजी श्रेष्ठलाई पनि भेटेका थिए । उक्त भेटमा आफूहरूले घटनाका बारेमा जानकारी गराएको र श्रेष्ठले अगाडि बढाउने आश्वासन दिएको उपाध्यायले बताइन् ।

हाल जसपा अध्यक्ष रहेका उपेन्द्र यादवसहित पूर्वसांसद बबन सिंहसमेत यो प्रकरणमा जोडिएका छन् । उनीहरूलगायतविरुद्ध रौतहट प्रहरीमा कर्तव्य ज्यान मुद्दा दर्ता छ । धेरैलाई प्रहरीले फरार सूचीमा राखेको छ ।

गौर हत्याकाण्डका दोषीहरूहरूविरुद्ध सर्वोच्च अदालतमा मुद्दा दर्ता भएको पीडितका वकिल जयमंगलम प्रसादले बताए । उनले भने, ‘गौर हत्याका दोषीको नाममा आज सर्वोच्च अदालतमा मुद्दा दर्ता भएको छ । भोलि पेसी छ ।’

मुद्दामा रौटहट प्रहरी, सरकारी वकिल कार्यालय, प्रहरी प्रधान कार्यालय, गृह मन्त्रालयलगायतलाई विपक्षी बनाइएको छ ।

७ चैत २०६३ मा रौटहटको गौरस्थित राइसमिलको चौरमा भएको झडपमा माओवादीका २७ जना कार्यकर्ता मारिएका थिए भने सयभन्दा बढी घाइते भएका थिए । तत्कालीन मधेशी जनअधिकार फोरम र माओवादीबीच झडप हुदा २७ जना माओवादी कार्यकर्ताको हत्या भएको थियो ।

प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डले केही दिन पहिला दरबार हत्याकाण्ड, गौर हत्याकाण्डलगायतका हत्याकाण्डहरूको अनुसन्धान गरी निचोडमा पुग्ने बताएका थिए । प्रचण्डले पार्टी कार्यलय पेरिसडाँडामा गौर हत्याकाडको छानबिन गरी निचोड निकाल्ने बताएको केही दिनपछि सर्वोच्च अदालतमा पीडितहरूले मुद्दा दर्ता गराएका छन् ।