इजलासमा चटपटे टोपबहादुर र गम्भीर खाँण, पाण्डेमा देखिन्थ्यो बेचैनी

A+ A A-

नक्कली भुटानी शरणार्थी प्रकरणमा आइतबारदेखि काठमाडौं जिल्ला अदालतमा सुरु भएको थुनछेक बहसमा आज सरकारी वकिलले मात्र बहस गरे । तीन दिन सरकारी वकिलको बहस हुने र प्रतिवादी पक्षका वकिलको बहस सकिएपछि सरकारी वकिलले जवाफी बहस गर्नेछन् ।

आइतबारको बहसमा मुख्य अभियुक्तहरूमा अधिकांश गम्भीर देखिन्थे । न्यायाधीश प्रेमप्रसाद न्यौपानेको आसनको दाहिनेपट्टीको लहरमा इन्द्रजित राई, टोपबहादुर रायमाझी र बालकृष्ण खाँण एकै बेन्चमा बसेका थिए । त्यही लरको न्यायाधीश आसनबाट दाहिनेपट्टी थिए पूर्वगृहसचिव टेकनारायण पाण्डे र सानु भण्डारी । पाँचौँ तथा अन्तिम लहरमा थिए- भुटानी शरणार्थी नेता टेकनारायण रिजाल र केशव दुलाल । उनीहरूको बीचमा तीन जना अन्य व्यक्तिहरू थिए । अर्का प्रतिवादी आङटावा शेर्पा भने सानु भण्डारी बसेको बेन्चको लहररको अर्को पङ्क्तिमा थिए ।

खाँण निकै गम्भीर देखिन्थे । वकिल र अन्य सहकर्मीसँग कानेखुसी गर्थे । बाहिर आउजाउ गर्दा पनि उनी अन्य व्यत्तिसँग उतिसाह्रो बाल्दैनथे । अभिवादन गर्दा सामान्य प्रतिक्रिया देखाउँथे । बहसलाई गम्भीर रूपमा नियालिरहेका थिए ।

टोपबहादुर भने निकै चटपटे थिए । उनी खाँण र राईको बीचमा थिए । भित्र-बाहिर को-को आउजाउ गर्छ सबैतिर नजर थियो उनको । बहस चलिरहँदा बाहिर निस्कन पर्दा चिनेको वकिललाइ आफैँ अभिवादन गर्थे । कहिले राईसँग खासखुस गर्थे त कहिले बहसलाई ध्यान दिएर सुन्थे । खाँण र उनीबीच एकपटक मात्र कानेखुसी भयो ।

पाण्डेमा बेचैनी भाव देखिन्थ्यो । अधिकांश समय बहसमा के भइरहेको छ भन्ने कुरामा ध्यान दिइरहेका उनी आफ्नै सुरमा थिए । कहिलेकाहीँ खाँणतिर हेर्थे । सानु भण्डारी बेन्चमा सबैभन्दा बढी चटपटाइरहेका थिए । कहिले अघि मुन्टो तानेर बस्थे त कहिले अढेस लागेर बस्थे । घरी-घरी मास्क निकाल्थे र लगाउथे ।

अन्तिम लहरको बेन्चमा बसेका रिजाल नजिक बसेकाहरूसँग बेला बेला कुरा गर्दै इजलाशमा उठेका कुरा ध्यान दिएर सुनिरहेका थिए । उनमा आत्मविश्वास देखिन्थो । उनले केही भन्दा नजिक रहेकाहरू झुम्मिन्थे ।

दुलाल भने अधिकांश समय मास्क लगाएर बसे । एकाध समय अन्य व्यक्तिहरूसँग कानेखुसी गर्नेबाहेक उनको ध्यान इजलासको बहसमा थियो ।

शेर्पा भने एकटकले बहसको सुनिरहेका थिए । सामान्य हलचल गर्नेबाहेक उनको प्रतिक्रिया अरु थिएन ।

आइतबार सरकारी वकिल महेश खत्रीको बहस सकिएर जनक घिमिरेले सुरु गरेका छन् । सोमबार घिमिरेको बहसले इजलासमा निरन्तरता पाउनेछ । चर्को गर्मी साँघुरो इजलास कक्षले अप्ठेरो पारेको थियो ।

प्रकाशित मिति: आइतबार, जेठ २१, २०८० २१:५०