टोपबहादुर रायमाझीकाे बयान- सानु भण्डारी छोरा सन्दिपको विजनेस पार्टनर भएकाले चिनेको हुँ (पूर्णपाठ)

टोपबहादुर रायमाझीकाे बयान- सानु भण्डारी छोरा सन्दिपको विजनेस पार्टनर भएकाले चिनेको हुँ (पूर्णपाठ)

A+ A A-

नक्कली भुटानी शरणार्थी प्रकरणका अभियुक्त टोपबहादुर रायमाझीले नेपाली नागरिकलाई भुटानी शरणार्थी बनाई अमेरिका पठाइदिने विषयमा थाहा नभएको बयान दिएका छन् । जिल्ला अदालत काठमाडौंका न्यायाधीश प्रेम प्रसाद न्यौपानेको इजलासमा उनको बयान भएको थियो ।

भुटानी शरणार्थी समस्या समाधान गर्न बनाइएको कार्यदलबारे पत्रपत्रिकाबाट थाहा पाएको तर नेपाली नागरिकलाई भुटानी शरणार्थी बनाई अमेरिका पठाइदिने विषयमा भने आफूलाई केही जानकारी नभएको बयान दिएका छन् । ‘म ऊर्जा मन्त्री भएको समयभन्दा अगाडि संसद सदस्य रहेको अवस्थामा भुटानी शरणार्थीहरूको समस्या समाधानका लागि विभागीय मन्त्रालयले कार्यदल बनाएको भन्ने कुरा पत्रपत्रिकाबाट थाहा पाएको थिएँ तर नेपाली नागरिकलाई भुटानी शरणार्थी बनाई अमेरिका पठाइदिने विषयमा भने मलाई केही जानकारी छैन,’ उनले बयानमा भनेका छन् ।

रायमाझीको बयानको सम्पादित अंश

सवाल तपाईंलाई तपाईं उपर लागेको अभियोग सुनाइन्छ, सो अभियोग उपर बयान दिन कर लाग्ने छैन, तपाईंले दिएको बयान तपाईंको विरुद्धमा प्रमाण लाग्न सक्छ, तपाईं बयान दिन तयार हुनुहुन्छ ?

जवाफ म बयान दिन तयार छु ।

सवाल प्रतिवादीहरूमध्ये क–कस्लाई चिन्नुहुन्छ र निजहरूसँग लेनदेन रिसइबी झगडा छ, छैन ?

जवाफ

प्रतिवादी केशव प्रसाद दुलालसँग करिब १५/१६ वर्ष अगाडि सुजता कोइरालाको निवासमा जाँदा निजको स्वकीय सचिव भन्ने सुनेको हो । त्यस समयमा निजसँग भेटघाट भई चिनजान भएको हो । त्यसपश्चात लामो समयसम्म भेट भएको थिएन । पछिल्लोपटक धार्मिकस्थल गोसाईकुण्डमा जाँदा भेटघाट भएको थियो । त्यसपछि निजसँग भेटघाट भएको छैन । निजसँग लेनदेन रिसइवी केही रहेको छैन । प्रतिवादी सानु भण्डारीसँग सामान्य चिनजान रहेको छ । निज मेरो छोरा सन्दिप रायमाझीको विजनेस पार्टनर भएको कारणले चिनजान भएको हो । निजसँग लेनदेन कारोबार र रिसइवी केही रहेको छैन । प्रतिवादी डा. इन्द्रजित राईसँग पार्टीगत हिसाबले सामान्य चिनजान रहेको छ । निजसँग लेनदेन र रिसइवी केही रहेको छैन । बालकृष्ण खाँणसँग चिनजान रहेको छ । निज मन्त्री, कांग्रेसको नेता र सांसद भएको नाताले चिनजान भएको हो । निजसँग लेनदेन तथा रिसइवी केही रहेको छैन । प्रतिवादी टेकनाथ रिजालसँग करिब ६/७ वर्ष पहिले सार्वजनिक कार्यक्रममा भेटघाट भएको र कुराकानी भएको भएको थियो । त्यसपछि निजसँग भेटघाट भएको छैन । अन्य बाँकी प्रतिवादीहरूलाई चिन्दिन र निजहरूसँग भेटघाट भएको छैन ।

सवाल जाहेरवाला गजेन्द्र बुढाथोकीसमेत विभिन्न जाहेरवालाहरूले नेपाली नागरिकलाई भुटानी शरणार्थी बनाई अमेरिका पठाइदिने भनी रकम लिई अमेरिका नपठाई रकम फिर्तासमेत नगरी ठगी गरेको भन्ने जाहेरी दरखास्तहरू छन्, सो सम्बन्धमा तपाईंलाई के थाहा छ ? को को भई के कसरी जाहेरी दरखास्तमा उल्लेख गरेअनुसारको कसुर गर्नुभएको हो खुलाइदिनुहोस् ?

जवाफ जाहेरवाला जति पनि व्यक्तिहरू कसैसँग मेरो चिनजान रहेको छैन । निजहरूसँग चिनजान नभएको हुनाले लेनदेनको विषयमा पनि थाहा हुन प्रश्न नै भएन । म ऊर्जा मन्त्री भएको समयभन्दा अगाडि संसद सदस्य रहेको अवस्थामा भुटानी शरणार्थीहरूको समस्या समाधानका लागि विभागीय मन्त्रालयले कार्यदल बनाएको भन्ने कुरा पत्रपत्रिकाबाट थाहा पाएको थिएँ तर नेपाली नागरिकलाई भुटानी शरणार्थी बनाई अमेरिका पठाइदिने विषयमा भने मलाई केही जानकारी छैन ।

सवाल नेपाली नागरिकलाई भुटानी शरणार्थी बनाई अमेरिका पठाइदिने योजना क–कसले बनाउनु भएको हो ? तपाईंले को मार्फत यसबारेमा जानकारी पाउनुभएको हो ? खुलाइदिनुहोस् ।

जवाफ यस विषयमा मलाई कुनै जानकारी छैन ।

सवाल तपाईंलाई सहप्रतिवादी केशव प्रसाद दुलालले अनुसन्धानको क्रममा खुलाई लेखाई दिएको बयान व्यहोरामा तपाईंंलाई पटक पटक नगद र बैंक खातामा रकम पठाएको भनी सानु भण्डारीले भनेको हुनाले म र सानु भण्डारी तपाईंंको सातदोबाटोको घरमा गई बुझ्दा हामीले रकम पाई सकेका छौँ भनी जानकारी भएको भनी उल्लेख गरेको कुरा के कसो हो ? तपाईंंले के कति रकम लिनुभएको हो ? खुलाइदिनुहोस् ।

जवाफ निज केशव प्रसाद दुलालसँग एक/दुईपटक राजनीतिक कार्यक्रममा भेटघाट भएको हो । निज त्यतिवेला सुजता कोइरालाको स्वकीय सचिव हुँ भन्थे । अरु निजसँग व्यक्तिगत चिनजान रहेको छैन । निजले गर्ने कामको बारेमा मलाई जानकारी छैन । निजले के कस्तो बयान गरे मैले भन्न सक्ने अवस्था भएन । मेरो राजनीतिक छवी धुल्मिल्याउन कसैको उक्सावटमा आएर निजले यस्तो बयान दिएको हुनसक्छ । सानु भण्डारीमार्फत मैले रकम लिएको भन्ने कुरा सरासर झुटा हो । मलाई झुटा रूपमा फसाउन खोजिएको छ । यो आरोपमा कुनै सत्यता छैन ।

सवाल तपाईंलाई सहप्रतिवादी केशव प्रसाद दुलालले अनुसन्धानको क्रममा खुलाई लेखाई दिएको बयान व्यहोरामा तपाईंको स्वकीय सचिव लिला जिसीले केशव प्रसाद दुलाललाई मन्त्री क्वाटर पुल्चोकमा बोलाई सामाजिक समितिबाट निर्णय भएको अघिल्लो दिन बेलुका १ करोड नगदै बुझिलिएका हुन् भन्ने व्यहोरा उल्लेख गरेको कुरा के कसो हो ? खुलाइदिनुहोस् ।

जवाफ यस विषयमा मलाई जानकारी छैन ।

सवाल तपाईंलाई सहप्रतिवादी केशव प्रसाद दुलालले अनुसन्धानको क्रममा खुलाई लेखाई दिएको बयान व्यहोरामा तत्कालीन गृहमन्त्री रामबहादुर थापा बादल र तपाईंंसँग मिटिङ गराई सकेपछि तपाईंहरूको काम हुने भयो भनी डा अजयक्रान्ति शाक्य र राजेश्वर स्थापितले जनही १ करोड बुझिलिएका भन्ने उल्लेख गरेको कुरा के कसो हो ? तत्कालीन गृहमन्त्री राम बहादुर थापा बादल र तपाईंबीच के विषयमा कुराकानी भएको थियो ? खुलाइदिनुहोस् ।

जवाफ डा अजयक्रान्ति शाक्य र राजेश्वर स्थापितलाई चिन्दिन । रामबहादुर थापा बादलको मन्त्री क्वाटरमा मिटिङ बसेको सत्य होइन । सामाजिक समितिबाट भुटानी शरणार्थीको विषयमा निर्णय गराउने सम्बन्धमा र रकम दिनुपर्छ भने विषयमा मलाई जानकारी छैन ।

सवाल तपाईंलाई सहप्रतिवादी सानु भण्डारीले अनुसन्धानको कममा खुलाई लेखाई दिएको बयान व्यहोरामा २०७६/३/२८ गते तपाईंको ललितपुर सातदोबाटोमा रहेको सेल्सवेरी सुपरमार्केट पछाडि रहेको घरमा गई १ करोड ६० लाख नगदै दिएको र ४० लाख तपाईंको छोरालाई दिएको भन्ने उल्लेख गरेको कुरा के कसो हो ? के कति रकम रकम निजसँग तपाईंंले लिनुभएको हो ? खुलाइदिनुहोस् ।

जवाफ निजले बयानमा उल्लेख गरेको ललितपुर सातदोबाटोमा रहेको सेल्सवेरी सुपरमार्केट पछाडि मेरो घर त्यहाँ रहेको छ । निज सानु भण्डारीसँग सामान्य चिनजान मात्र रहेको छ । निजसँग कुनै घनिष्ठ सम्बन्ध रहेको छैन । निजले मलाई १ करोड ६० लाख दिएको भन्ने कुरा बिल्कुल गलत हो । त्यसमा कुनै सत्यता छैन । मेरो छोरा सन्दिप रायमाझी निज सानु भण्डारीसँग व्यवसायिक पार्टनर रहेकोले मेरो छोरालाई ४० लाख दिएको भन्ने सन्दर्भमा मेरो छोराले नै स्पष्ट पार्ने कुरा हो । म छोरासँग बस्ने भए पनि, स्वतन्त्र रुपमा व्यवसायिक कारोबार गर्ने भएकोले निजले छोरालाई रकम दिएको भन्ने विषय मलाई जानकारीमा छैन ।

सवाल तपाईंलाई सहप्रतिवादी सानु भण्डारीले अनुसन्धानको कममा खुलाई लेखाई दिएको बयान व्यहोरामा तपाईंले निज र निजको परिवारलाई भुटानी शरणार्थी बनाई अमेरिका पठाइदिन्छु भनी भनेको हुँदा रकम तपाईंको छोरालाई दिएको भन्ने उल्लेख गरेको कुरा के कसो हो ? के कति रकम रकम निजसँग तपाईंले लिनुभएको हो, खुलाइदिनुहोस् ।

जवाफ सानु भण्डारीले डायरीमा लेखेको विषय के कसो हो मलाई जानकारी छैन । निज भण्डारी मेरो छोरासमेतको साझेदारी भएको कम्पनीमा शेयर लगानी रहेको भन्ने सुनेको छु । कम्पनीको साझेदार लियोन ट्रेडर्स भएकोले चिनेको हो । निजबाट मैले कहिल्यै पैसा लिएको छैन । लिनुपर्ने आवश्यकता पनि परेन । नेपाली नागरिकलाई भुटानी शरणार्थी बनाएर अमेरिका पठाउने विषयमा कहिँ कतै संलग्न रहेको छैन । तसर्थ निजबाट रकम लिएको कुरा झुटा हो । व्यक्तिगत रुपमा सानु भण्डारीले के कुन प्रयोजनका लागि यस्तो लेखेका हुन् मलाई जानकारी भएन म यसमा बेकसुुर छु ।

सवाल अभियोग साथ पेस भएको सानु भण्डारीको नामको डायरी तपाईंलाई देखाई सुनाइन्छ, उक्त डायरीमा भुटानी शरणार्थी रकमबाट खर्च भएको विवरण समेत लेखिएको शिर्षक व्यहोरा सम्बन्धमा टोप मामा भन्ने व्यक्ति तपाईं टोपबहादुर रायमाझी हो भनी उल्लेख गरेको र टोप मामालाई ५ लाख र ३ लाख रकम दिएको भन्ने व्यहोरा के कसो हो ?

जवाफ निज सानु भण्डारी भन्ने व्यक्ति नाताले मेरो भान्जा होइनन् र म निजको मामा पनि होइन । विभिन्न समयमा अलग अलग रकम दिएको भन्ने कुरा सरासर झुटा हो । यसमा कुनै सत्यता छैन । उनले के प्रयोजनका लागि डायरीमा लेखेर दिएको भन्ने उल्लेख गरेका हुन् यो ज्यादै नै निन्दनीय विषय रहेको छ । निजबाट मैले कुनै रकम लिएको पनि छैन ? दिएको पनि छैन । कुनै प्रमाण पनि छैन । अहिलेसम्म निजसँग कुनै प्रकारको लेनदेन भएको छैन ।

सवाल तपाईंलाई सहप्रतिवादी सानु भण्डारीले अनुसन्धानको क्रममा निजको मोबाइलमा रहेको टोप मामा.. भएको स्किन सर्ट देखिएको र अडियोमा टोप मामा भनी कुरा गरेका व्यक्ति तपाईं नै हो भनी उल्लेख गरेको देखिन्छ, सो सम्बन्धमा तपाईंलाई के जानकारी छ ?

जवाफ उक्त मोबाइल नम्बर मेरो रहेको छ । तर निजले आफ्नो मोबाइलमा के लेख्छन् त्यो मसँग सम्बन्धित विषय भएन । निजले भेट हुँदा मलाई माननीयज्यू भनेर सम्बोधन गरेको मलाई जानकारी छ ।

सवाल तपाईंलाई सहप्रतिवादी विक्रम भन्ने गोविन्द कुमार चौधरीले अनुसन्धानको कममा खुलाई लेखाई दिएको बयान व्यहोरामा निजले टेकनाथ रिजाललाई तपाईंको घरमा पुर्‍याइदिएको भन्ने उल्लेख गरेको कुरा के कसो हो ?

जवाफ करिब ६/७ वर्ष अगाडि टेकनाथ रिजालसँग सार्वजनिक कार्यक्रममा १ पटक भेट भएको थियो। त्यसबाहेक निजसँग फोनसम्पर्क पनि भएको छैन, निजलाई सम्पर्क गर्न भनी मलाई कसैले भनेको पनि छैन, भेटघाट पनि भएको छैन, निजलाई मेरो घरमा कसैले ल्याएको पनि छैन । निजले मेरो घरमा ल्याएको भन्ने कुरा सरासर झुटा रहेको छ ।

सवाल तपाईंलाई सहप्रतिवादी टेकनाथ रिजालले अनुसन्धानको क्रममा खुलाई लेखाई दिएको बयान व्यहोरामा ‘केही नेपाली नागरिकलाई भुटानी शरणार्थीहरूकै नाममा अमेरिका लैजाने हाम्रो योजना रहेको छ, तपाईंले सहयोगीको भूमिका खेलिदिनुपर्‍यो’ भनेको र यसमा तपाईंको संलग्नता रहेको भन्ने समेतको व्यहोरा के कसो हो ?

जवाफ टेकनाथ रिजाल भुटानी शरणार्थीलाई भुटानमा नै पुनस्थापना गर्नका लागि लडेको मानवअधिकार कर्मी हुन् भन्ने सुनेको छु । उहाँ अन्तर्राष्ट्रिय जगतमा पनि मानवअधिकारवादी लेखकको रुपमा परिचित हुनुहुन्छ । यस्ता व्यक्तिहरूसँग म राजनीतिकर्मी भएको कारणले औपचारिक कार्यक्रममा सहभागी हुनु स्वाभाविक कुरा हो र निजसँग १ पटक सार्वजनिक कार्यक्रममा भेटघाट भएको हो । निजसँग गहिरो र राम्रो चिनजान भेटघाट भएको छैन । निजसँग राम्रो चिनजान र भेटघाट नै नभएको अवस्थामा मेरो संलग्नता रहेको भनी हचुवामा कसरी भन्नुभयो मैले भन्न सक्दिन । प्रस्तुत मुद्दाको सन्दर्भमा मेरो कुनै पनि प्रतिवादी तथा निजसँग यस विषयमा एसएमएस, च्याट र कलडिटेलसमेत रहेको छैन । शुद्ध रूपमा, म राजनीतिक गरेको मान्छेलाई मानवअधिकारकर्मी जस्तो व्यक्तिले कसैको बहकावमा आएर मेरो राजनीतिक छवीलाई आँच पुर्‍याउन तथा निजले अपराध लुकाउन यस्तो बयान दिएको हुनसक्छ । मेरो बारेमा निजले दिएको बयान व्यहोरामा कुनै सत्यता छैन ।

यदि म समेतको संलग्नता भएको भए मेरो नाम समेत उल्लेख गरी ४-६ वर्ष पहिले नै उजुरी गर्नुपर्नेमा कहिँ कतै मेरो नाम उल्लेख गरी उजुरी दिनुभएको छैन । यसैबाट निजको बयान, झुटा हो भन्ने कुरा स्पष्ट हुन्छ ।

सवाल तपाईंलाई पेस भएको मिसिल संलग्न अनुसन्धानमा उल्लेख गर्नु भएको बयान व्यहोरा पढी बाची सुनाइन्छ, सो व्यहोरा के कसो हो ?

जवाफ सो व्यहोरा पढिवाची सुनाउँदा सुनी पाएा । सही व्यहोरा यो छ कि प्रतिवादी सानु भण्डारी मेरो छोराको बिजनेस पार्टनर भएका कारण चिनजान भएको हो । प्रतिवादी टेकनारायण पाण्डे मेरो जिल्लावासी भएको र नेपाल सरकारको सचिव भएकी जानकार छु, तर निजसँग सहकार्य रहेको छैन । बालकृष्ण खाँणलाई कांग्रेसको नेता, मन्त्री र सांसद भएको नाताले चिन्दछु । सानु भण्डारी मेरो नाताले भान्जा होइनन्, निजको नाताले मामा होइन । प्रतिवादी केशव प्रसाद दुलाले मलाई गोसाइकुण्ड घुम्न जाउँ भनेको होइन । प्रतिवादी सानु भण्डारीले धार्मिकस्थल गोसाईकुण्डमा जान आग्रह गर्नुभयो र सुरुमा मैले इन्कार गरेँ, त्यसपछि निजले समग्र रूपमा जान आउन र घुम्न ४५ मिनेट लाग्छ भनेकोले म गएको हो म जाँदा त्यस टिममा प्रतिवादी केशव प्रसाद दुलालसमेतका २/३ जना व्यक्तिहरू रहेका थिए । सानु भण्डारीले केशव प्रसाद दुलाललाई चिन्नु भएन भनी सोधेको र पुरानो सम्झनाका लागि फोटो खिचौँ भनी केशव प्रसाद दुसालले पुनर्ताजगी गरौं भनी फोटो खिच्न आग्रह गरे, त्यसपछि हामी र त्यहाँ टिमका अन्य व्यक्तिहरूले फोटो खिचेका थियौँ । सानु भण्डारीले केशव प्रसाद दुलालबाहेक अन्यलाई चिनजान गराएनन् ।

ईन्द्रजित राई सामान्य चिनजान भएका व्यक्ति हुन् । म गृह मन्त्रालय जाँदा गृह मन्त्री भेट्ने सिलसिलामा निज मन्त्रीको कार्यकक्षमा हुँदा सामान्य शिष्टाचार हुने गरेको थियो । अर्घाखाँची जिल्लामा बाढी पहिरोबाट भएको क्षतिको सम्बन्धमा राहत तथा क्षतिपूर्ति उपलब्ध गराउन भनी डेलिकेसन सहित म गृह मन्त्रालय गएको थिएँ । इन्द्रजित राई सानु भन्डारी र केशव प्रसाद दुलालबीच लेनदेन विषयमा विवाद तथा झगडा भएको सम्बन्धमा मलाई कुनै जानकारी नै छैन । निज सानु भण्डारी र केशव प्रसाद दुलालसँग गृह मन्त्रालयको बाहिर मेरो भेट भएको छैन र कुनै कुराकानी भएको छैन ।

बालकृष्ण पन्थी कार्यदलको संयोजक भएको जानकारीसम्म छ निजसँग कुनै सहकार्य र प्रत्यक्ष चिनजान छैन । २०८० वैशाख २० गते म र सभामुख अर्घाखाँचीको बल्कोट मा वि को हिरक महोत्सवमा सँगै गएका थियौं । उक्त दिन २ बजे म र मेरो छोरालाई पकाउ पुर्जी जारी गरेको जानकारी भयो । मैले जानकारी पाएपछि कार्यक्रम स्थगित गरी म काठमाडौं हाजिर हुन आउने भनेर सभामुखसँगै फर्केँ । सभामुखको ८ बजेको टिकट थियो । मेरो टिकट थिएन । म टिकट काट्नका लागि आफ्नो मानिसहरूलाई सुझाव दिएँ । बेलुका ९ बजेको मात्र एउटा टिकट पाइयो । अर्को टिकट छोराका लागि लिन खोजी भयो । टिकट पाइएन । सभामुखको भन्दा १ घण्टापछि मेरो टिकट थियो । सभामुख भैरहवा एरपोर्ट तिर लाग्नुभयो । म बुटवल हुँदै एयरपोर्ट जाने सोचें । त्यसपछि म बुटवल नपुग्दै बुटवल र पाल्पाको सिमाना सिद्धबाबामा सन्दिप रायमाझी गिरफ्तार भएको जानकारी भयो अनि मेरो लागि पनि भैरहवा एयरपोर्टमा गिरफ्तार गर्ने तयार भएको जानकारी पाएँ । म आफैँ हाजिर हुने भनी टिकट काटेर बसेको मान्छे त्यस प्रकारको जानकारी पाएपछि भैरहवाबाट काठमाडौँ जाने समय ढिला भयो । म बिरामी पनि थिएँ । उपचार गरेर केही सुधार भएपछि आफैँ हाजिर हुनुपर्छ भन्ने मनसाय बनाएँ । उक्त दिन काठमाडौं जान नपाएपछि उपचारको कारण केही समय विलम्ब हुन गयो । तर म फेरि काठमाडौं हाजिर हुन भनी आइपुगेँ र सुरक्षाकर्मीसँग काठमाडौंमा जम्काभेट भई मलाई सम्बन्धित प्रहरी कार्यालयमा पुर्‍याउने काम भयो ।

सवाल तपाईंलाई जाहेरवाला प्रेमराज पन्थीले जाहरीमा उल्लेख गरेको सम्पूर्ण व्यहोरा पढी वाची सुनाइन्छ, सो व्यहोरा के कसो हो ? खुलाईदिनुहोस ।

जवाफ निजले उल्लेख गरेको व्यहोरा सुनी पाएँ । निज प्रेमराज पन्थी भन्ने मान्छेलाई म चिन्दिन । मैले व्यक्तिगत रुपमा नचिनेको मान्छेलाई रेष्टुरेन्ट लगायतका स्थानमा भेट्ने भन्ने प्रश्न नै उठदैन । तसर्थ निजलाई अमेरिका पठाइदिने भन्ने जाहेरी व्यहोरा झुटा हो। निजले किन यस प्रकृतिको जाहेरी दिए स्पष्ट भन्न सकिँदैन । मेरो राजनीतिक छवी धमिलो बनाउने उद्देश्य स्वरुप कसैको उक्सावटमा निजले यस्तो जाहेरी दिएको हुनुपर्छ । नेपालीलाई भुटानी शरणार्थी बनाउन अमेरिका लैजाने भन्ने विषयमा म कहिँ कतै संलग्न छैन र जानकारी पनि छैन । म निर्दोष छु । जाहेरवालामध्येका प्रेमराज पन्थीले मलाई प्रकाउ गरिसकेपछि जेष्ठ १ गते मात्र झुटा व्यक्ति खडा गरी दिएको जाहेरीको विषयमा प्रहरीलाई थाहा होला । जाहेरीका विषयमा मलाई थाहा छैन ।

सवाल गृह मन्त्रालयले २०७६ जेठ ३० को मन्त्रीस्तरीय निर्णयअनुसार गठित बालकृष्ण पन्थीसमेत रहेको समितिले तयार पारेको भुटानी शरणार्थीको अनुसूूचीमा रहेको नाममा परिवर्तन गरी नेपाली नागरिकको नाम राखी नक्कली प्रतिवेदन तयार पारेको भनिएको प्रस्तुत मुद्दामा उठाइएको विषय सम्बन्धमा तपाईंलाई केही थाहा छ कि ? उक्त कार्य को कस्ले के कसरी गरेका हुन् ?

जवाफ बालकृष्ण पन्थी कार्यदल गठन भएको जानकारी पत्रपत्रिकाबाट मात्र जानकारी भएको हो । उक्त कार्यदलले के कति भुटानी शरणार्थी रहेको भनी रिपोर्ट पेस गर्‍यो, सो बारेमा मलाई जानकारी छैन । बालकृष्ण पन्थीको कार्यदलले पेस गरेको प्रतिवेदनको अनुसूूचीमा हेरफेर गरेको विषयमा मलाई जानकारी हुने विषय नै भएन ।

सवाल भुटानी मानवअधिकारको संगठन सदस्यता कार्ड को कस्ले निर्माण गरेको हो ? सो बारेमा केही जानकारी पाउनु भएको थियो कि ?

जवाफ यस विषयमा मलाई कुनै जानकारी छैन ।

सवाल तपाईंलाई मिसिल संलग्न मौकामा अनुसन्धानको क्रममा मनबहादुर खत्रीसमेतका सुरेन्द्र राज दाहाल, फणिन्द्रमणि पोखरेल, बालकृष्ण पन्थी, गणेश बहादुर केसी समेतको सम्पूर्ण मानिसहरूले गरेको घटना विवरण कागज पढी वाची सुनाइन्छ, उक्त व्यहोरा के कसो हो ? जानकारी भएसम्मको व्यहोरा खुलाइ दिनुहोस् ।

जवाफ निजहरूले अनुसन्धानमा खुलाइदिएको उक्त कागजहरू सुनाउँदा सुनी पाएँ । यस विषयमा निजहरूले उल्लेख गरेका सवालहरूमा मलाई कुनै जानकारी छैन ।

सवाल तपाईंलाई मिसिल संलग्न सानु भण्डारीको मोबाइल परीक्षण गर्दा अडियो रेकर्डमा प्रेम राई, बादल, टोप बहादुर रायमाझीलाई ५ करोड दिएको र मिलाएर १६२९ जनाको फायल पास गराउनुपर्छ, यो कुरा बाहिर आयो भने वर्वाद हुन्छ, दुलालको दुक्की तिर्की मान्छेहरू छन् यो प्रोजेक्ट जसरी पनि पास गर्नु पर्छ, यो सबै काम मैले गर्ने हो, मबाहेक कसैले सक्तैन भन्ने समेतका कुराकानी रहेको विवरण सुनाइन्छ, उक्त व्यहोरा के कसो हो ? खुलाइदिनुहोस् ।

जवाफ सो सम्बन्धमा मलाई केही जानकारी रहेको छैन ।

सवाल तपाईंको पारिवारिक आर्थिक अवस्था के कस्तो रहेको छ तपाईंको नाममा के कति जग्गा जमिन र बैंक खाताहरू रहेका छन् ? डिटेलमा खुलाइदिनुहोस् ।

जवाफ मेरो परिवारमा ८७ वर्षको आमा, भाई, भाईका १ छोरा छोरी, उनीहरू गाउँमा बस्छन् । म, मेरो श्रीमती, एक छोरा र एक छोरी रहेका छन् । छोराको एक नाती र नातिनी रहेका छन् । छोरीको १ छोरी मेरो नातिनी रहेकी हुन् । हामी एकासगोलमा रहेका छौँ । मेरो व्यक्तिगत बैंक खाता संसद सचिवालयले खोलेको एभरेष्ट बैंकको खाता रहेको छ । सो खातामा मैले कुनै रकम जम्मा गरेको छैन । अन्य बैंकमा खाता रहेका छैनन् । मेरो छोराले खोलेको कम्पनीको कारोबारको क्रममा मेगा बैंकमा करिब ३ करोडको ऋण भएको सुनेको छु । मेरो नाममा ८ रोपनी जग्गा अर्घाखाचीमा रहेको छ । अन्यत्र मेरो नाममा जग्गा रहेको छैन ।

प्रकाशित मिति: शनिबार, जेठ २०, २०८० १६:२४