टोपबहादुर रायमाझीले फोन गरेपछि काठमाडौं आएका थिए टेकनाथ रिजाल

A+ A A-

नक्कली भुटानी शरणार्थी प्रकरणमा पक्राउ परेका भुटानी शरणार्थी नेता टेकनाथ रिजालले टोपबहादुर रायमाझीले फोन गरेर बोलाएपछि काठमाडौं आएको बयान दिएका छन् । उनले यस्तो बयान जिल्ला अदालत काठमाडौंमा दिएका हुन् । शुक्रबार नक्कली भुटानी प्रकरणका पक्राउ परेको १८ जना अभियुक्तको बयान सकिएको छ ।

बयानका क्रममा रिजाललाई न्यायाधीशले प्रश्न गरेका छन्, ‘तपाईंलाई सहप्रतिवादी बिक्रम भन्ने गोविन्दकुमार चौधरीले अनुसन्धानको क्रममा खुला लेखाई दिएको बयान व्यहोरामा तपाईंलाई टोपबहादुर रायमाझीले फोन गरी काठमाडौं आउनु भनी बोलाएक र प्रतिवादी बिक्रम भन्ने गोविन्द कुमार चौधरीले तपाईं एयरपोर्ट आइसकेपछि टोपबहादुर रायमाझीको घरमा गएको भन्ने कुरा कसो हो ?’

जवाफमा रिजालले सो कुरा स्वीकार गरेका छन् । उनले भनेका छन्, ‘उक्त व्यहोरा साँचो हो । मलाई सानु भण्डारीले फोन गरी आउनुभन्दा नमानेपछि टोपबहादुर रायमाझीले आउनु भनी फोन गरेका थिए । निजले भनेपछि म काठमाडौं आउन राजी भएको हो र काठमाडौं आएपछि निज बिक्रम भन्ने गोविन्द कुमार चौधरी एयरपोर्ट लिन गएका र निजले मलाई टोपबहादुर रायमाझीको घरमा पुर्‍याइदिएका थिए ।’

नक्कली भुटानी शरणार्थी प्रकरणमा पूर्वउपप्रधानमन्त्री टोपबहादुर रायमाझीका बाबुछोरा नै पक्राउ परेका छन् । र उनीहरू जिल्ला सरकारी वकिल कार्यलयले अभियुक्त बनाएका ३० जनामध्ये हुन् । पक्राउ परेका १८ जनाको बयान शुक्रबार सकिएको छ । उनीहरूको बयान सकिएसँगै आइतबारदेखि थुनछेक बहस सुरु हुँदैछ । यो प्रकरणका १२ जना अभियुक्त अझैँ फरार छन् ।

प्रकाशित मिति: शुक्रबार, जेठ १९, २०८० २२:३३