नागरिकता विधेयक प्रमाणीकरणबारे एमालेले भन्यो– संसदको अपमान भयो

A+ A A-

राष्ट्रपति रामचन्द्र पौडेलले नागरिकता विधेयक प्रमाणीकरण गरेको विषयमा प्रमुख प्रतिपक्षी दल नेकपा एमालेको औपचारिक धारणा आएको छ । पार्टी सचिवालय बैठकले नागरिकता विधेयक मन्त्रिपरिषद्बाट लगेर पास गर्नु नेपालको संविधान, प्रचलित कानुन एवं स्थापित संसदीय मान्यताको विपरीत भएको ठहर गरेको छ ।

बैठकबारे जानकारी दिँदै उपमहासचिव प्रदीप ज्ञवालीले विधेयक प्रमाणीकरण हुनु संसदको अपमान भएको बताए । उनले भने, ‘अघिल्लो संसदले पारित गरी प्रमाणीकरण गर्नका लागि पठाएको सवैधानिक समयसीमाभित्र प्रमाणीकरण नभएपछि निष्क्रीय अवस्थामा रहेको विधेयकलाई ताजा निर्वाचन भएर नयाँ प्रतिनिधिसभा गठन भइसकेको समयमा अहिले प्रतिनिधिसभाले पहिलो अधिवेशन सम्पन्न गरी दोस्रो अधिवेशन चालु रहेको अवस्थामा मन्त्रिपरिषद्ले विधेयक प्रमाणीकरणको सिफारिस गर्ने र राष्ट्रपतिबाट प्रमाणीकरण हुनु संसदको अपमान हो ।’

उनले सरकारको यस कदमले संसदको विशेषाधिकारको हनन भएको र पार्टीले असंवैधानिक कदमको देशभर बिरोध गर्ने बताए । उनले प्रधानमन्त्रीको विदेश भ्रमणको केही घण्टाअघि मात्रै संविधानको विधि, प्रक्रिया विपरीत गरिएको प्रमाणीकरणले सरकार र राष्ट्रपति कार्यालयले नागरिकताको विषय नेपालको आन्तरिक मामिला नभई बाह्य चासोको विषय हो भन्ने नजिर स्थापित गरेको बताए ।

त्यस्तै गणतन्त्र दिवसको सन्दर्भ पारेर जेठ १५ गते टीकापुर घटनाका आरोपी पूर्वसभासद रेशम चौधरीलाई आममाफी दिनुले गम्भीर प्रश्न उठाएको बताए । उनले सर्वोच्च अदालतको फैसलाको पूर्णपाठसमेत नआउँदै सत्ता स्वार्थका लागि चालिएको कदमले विधिको शासनलाई चुनौति दिएको बताए । उनले यसकार्यले दण्डहीनतालाई संस्थागत गर्ने, कर्तव्यपालनाका सिलसिलामा खटिएका सुरक्षाकर्मीको मनोबल गिराएको महसुस पार्टीले गरेको पनि बताए । यसघटनाले सरकारले सर्वसाधारणको पीडामा नुनचुक छर्किने काम गरेको बताए ।

प्रकाशित मिति: शुक्रबार, जेठ १९, २०८० १९:२४