आज दिनभरः २२ वर्ष पुग्दा पनि दरबार हत्याकाण्ड 'रहस्यमै', भारतमा प्रचण्डको दौडधुप (भिडियो)

आज दिनभरः २२ वर्ष पुग्दा पनि दरबार हत्याकाण्ड 'रहस्यमै', भारतमा प्रचण्डको दौडधुप (भिडियो)

A+ A A-

नारायणहिटी दरबार हत्याकाण्ड भएको २२ वर्ष हुँदा पनि यो यसको रहस्यको पर्दा खुलेको छैन । १९ जेठ २०५८ मा राजदरबारभित्रै तत्कालीन राजा वीरेन्द्र शाहको वंशनाश भएको थियो । नियमित पारिवारिक जमघटका बेला तत्कालीन राजा वीरेन्द्रसहित रानी ऐश्वर्य, युवराज दीपेन्द्र र निराजन, राजकुमारी श्रुति, राजकुमार धीरेन्द्र, राजकुमारी जयन्ती, राजकुमारी शान्ति, राजकुमारी शारदा, कुमार खड्कासहित राजपरिवारका अन्य सदस्यहरूको गोली हानी हत्या भएको थियो ।

भारत भ्रमणमा रहेका प्रधानमन्त्री पुष्पकमल दाहाल 'प्रचण्ड'ले आफ्नो भ्रमण नेपालको राष्ट्रिय हित र भारत सम्बन्धका दृष्टिले निकै महत्त्वपूर्ण अनुभूत भइरहेको बताएका छन् । 'प्रधानमन्त्रीको रूपमा मेरो चौथो राजकीय भारत भ्रमण नेपालको राष्ट्रिय हित र नेपाल-भारत सम्बन्धका दृष्टिले निकै महत्त्वपूर्ण अनुभूत भइरहेको छ,' प्रचण्डले शुक्रबार ट्विटमा भनेका छन् ।

स्वास्थ्य तथा जनसंख्यामन्त्री मोहनबहादुर बस्नेतले विपन्न नागरिकलाई १० प्रतिशत निःशुल्क उपचार नगर्ने अस्पतालहरूलाई कारबाही गरिने बताए । शुक्रबार शहीद गंगालाल राष्ट्रिय हृदय केन्द्र र मेडिकेयर हस्पिटलको अनुगमन गर्दै मन्त्री बस्नेतले विपन्न तथा आर्थिक अवस्था कमजोर भएका १० प्रतिशत नागरिकहरूको निःशुल्क उपचार नगर्ने अस्पतालहरूलाई कारबाही गर्ने बताए ।

भारत भ्रमणमा रहेका प्रधानमन्त्री प्रचण्ड शुक्रबार भारतको मध्यप्रदेशको उज्जैनमा रहेको महाकालेश्वर मन्दिर पुगेका छन् । उनले त्यहाँ पूजा गर्नुका साथै नेपालबाट लगिएको १०८ किलो रुद्राक्ष र ५१ हजार भारतीय रुपैयाँ चढाएका छन् । गेरुवस्त्र धारणा गरी उनी मन्दिरमा पूजा गर्न गर्न पुगेका थिए ।

राष्ट्रपति रामचन्द्र पौडेलले नागरिकता विधेयक प्रमाणीकरण गरेको विरोधमा सर्वोच्च अदालतमा रिट दायर भएको छ । तत्कालीन राष्ट्रपति विद्यादेवी भण्डारीले प्रमाणीकरण नगरी अलपत्र पारिएको सो विधेयक वर्तमान मन्त्रिपरिषद्को सिफारिसमा राष्ट्रपति पौडेलले बुधबार प्रमाणीकरण गरेका थिए । अधिवक्ता सुरेन्द्र भण्डारीले नागरिकता विधेयक प्रमाणीकरणमा राष्ट्रपतिले संविधानका धाराको दुरुपयोग गरेको दाबी गर्दै शुक्रबार रिट दायर गरेका हुन् ।

विगत केही दिनदेखि काठमाडौं उपत्यकासहित देशभर गर्मी बढेको छ । पछिल्लो पाँच दिनदेखि आकाश खुल्ला भई निरन्तर चर्को घाम लाग्नुका साथै अधिकतम तापक्रम पनि बढिरहेकाले बढी गर्मी महसुस गरिएको हो । जल तथा मौसम विज्ञान विभाग मौसम पूर्वानुमान महाशाखाका अनुसार हाल देशमा पश्चिमी वायुका साथै स्थानीय वायुको आंशिक प्रभाव छ । महाशाखाका वरिष्ठ मौसमविद् प्रतिभा मानन्धरले पश्चिमी वायु सक्रिय नरहेकाले वर्षा नहुँदा गर्मी बढेको बताइन् ।

जिल्ला अदालत काठमाडौंले आइतबारदेखि नक्कली भुटानी शरणार्थी प्रकरणका प्रतिवादीहरूको थुनछेक बहस सुरु गर्ने तयारी गरेको छ । सरकारी वकिलका तर्फबाट चार जनाले बहस गर्ने तयारी गरेका छन् भने प्रतिवादीका तर्फबाट करिब ५० जनाभन्दा बढी कानुन व्यवसायीले बहसका लागि वकालतनामा दिने तयारी गरेका छन् ।

प्रकाशित मिति: शुक्रबार, जेठ १९, २०८० १९:५६