मनमोहनका विद्यार्थी गरे बहुउपयोगी उपकरणको आविष्कार

A+ A A-

मोरङको मनमोहन स्मृति पोलिटेक्निक इन्स्टिच्युटमा अध्ययनरत विद्यार्थीहरुले विभिन्न बहुउपयोगी उपकरण र सामाग्रीको आविस्कार गरेका छन् । कलेजमा विभिन्न विषयमा अध्ययन गरेका विद्यार्थीहरुले आफ्नो अध्ययनलाई प्रयोगात्मक रुपमा देखाउन विभिन्न उपकरण तथा उपयोगी सामाग्रीको आविस्कार गरेका हुन् ।प्रदेश १ कै उत्कृष्ट प्राविधिक शिक्षालय रहेको मनमोहनमा पोलिटेक्निकमा तीन वर्षे सिभिल, इलेक्ट्रिकल, इलेक्ट्रिोनिक्स र मेकानिकल विभागमा अध्ययन गरेका विद्यार्थीहरुले प्यारालाईसिस भएका बिरामीको हेरचाह तथा स्याहार गर्ने मेसिनदेखि माइक्रो हाइड्रो पावरको नमुनासमेत तयार गरेका हुन् । अध्ययन सकेर उत्तिर्ण भइ जान लागेका विद्यार्थीहरुद्वारा निर्मित ती सामाग्रीहरुको प्रदर्शनी गरिएको छ ।

कलेजको सबै विभागका विद्यार्थीको समूहले बनाएका सामाग्रीहरु कलेज परिसरमै प्रदर्शन गरिएको हो । प्रदर्शनीमा राखिएका उपकरण तथा सामाग्रीहरुको प्रदेश १ प्रदेशसभा अन्तर्गतको सामाजिक विकास समितिकी सभापति सरिता थापा खड्का, प्रदेशसभा सदस्य सावित्रा रेग्मी, मनमोहन स्मृति पोलिटेक्निक इन्स्टिच्युटका प्रिन्सिपल डा. सुभाष श्री पोखरेल, सूचना प्रमुख सत्यनारायण चौधरी, विभिन्न सञ्चारमाध्याममा आवद्ध सञ्चारकर्मीले अवलोकन गरे ।कलेजको इलेक्ट्रोनिक्स विभागमा अध्ययन गरेका विद्यार्थीहरुले प्यारालाईसिस भएका बिरामीको हेरचाह तथा उनीहरुको सुविधाका लागि उपकरण बनाएका छन् । सो उपकरणले प्यारालाईसिस भएका बिरामीको अवस्था, उनीहरुलाई लागेको भोक, तिर्खा तथा शौचालय जानुपर्ने अवस्थाका विषयमा जानकारी दिने प्रिन्सिपल डा. सुभाष श्री पोखरेलले बताए । विद्यार्थीहरुले ‘डिजिटल वेदर स्टेसन विथ नोटिस बोर्ड’, आधुनिक हाजिरी मेसिन, ‘बायोमेट्रिक डार लक’, मोवाइलकै माध्यमबाट नियन्त्रण गर्न सकिने बम डिस्पोज गर्ने रोबट र ‘स्मार्ट ब्लाइण्ड स्टिक’ बनाएका छन् । ‘स्मार्ट ब्लाइण्ड स्टीक’ ले दृष्टिविहीन व्यक्तिहरुले प्रयोग गर्न सक्छन् । यसले पानी परेको तथा खताराको संकेत दिन्छ भने अगाडी आएको चिज वस्तुहरुका विषयमा समेत सचेत गराउँछ ।

त्यस्तै इलेक्ट्रिकलका विद्यार्थीमध्ये ६ जनाको समूहमा रहेका विद्याथीले ‘अर्डिनो बेस फ्यान विण्डिङ मेसिन’, ६ जनाकै अर्को समूहले ‘सिन्च्रोनाइजेसन टु अल्टरनेटर्स’ निर्माण गरेकाे छ । सोही विभागमध्ये ५ जनाको समूहले सोलारबाट चल्ने एसी निर्माण गरेका छन् । जुन व्यवहारिक प्रयोगमा अति नै उपयोगी हुने विश्वास गरिएको छ ।सोही विभागका ८ जनाको विद्यार्थी समूहले माइक्रो हाइड्रोलिक पावर प्लान्टसमेत आविस्कार गरेको छ । अर्को ८ जनाका विद्यार्थी समूहले फोहरमैलाबाट विजुली निकाल्ने मेसिनको विकास गरेको छ । त्यसैगरी अर्को ५ जनाको विद्यार्थी समूहले ‘जेनेरेसन अफ इलेक्ट्रिसिटी फर्म गार्बेज’ र अन्य ६ जनाको विद्यार्थी समूहले ‘अण्डरग्राउण्ड केवल फल्ट डिस्टेन्स लोकेटर’ आविस्कार गरेको छ । जसले ‘अण्डर ग्राउण्ड’ गरिएका विद्युत तार बिग्रिएको खण्डमा पत्ता लगाउने काम गर्छ । यो अति नै उपयोगि हुने मनमोहन स्मृति पोलिटेक्निक इन्स्टिच्युटका सूचना प्रमुख एवम् प्रतिष्ठानका सदस्य सत्यनारायण चौधरीले बताए ।

त्यसैगरी मेकानिकलमा अध्ययन गरेका ७ जनाको विद्यार्थी समूहले हावाबाट चल्ने साइकल आविस्कार गरेको छ । सोही विभागका अर्को ६ जनाको विद्यार्थी समूहले ‘पेपर प्लेट मेकिङ मेसिन’ बनाएको छ । त्यस्तै अर्को ६ जनाको समूहले ‘हाइड्रोलिक फ्लोर क्रेन’ बनाएको छ । अर्को ७ जनाको समूहले ‘सोलार अपरेटेड राइडल मेसिन’, ६ जनाको समूहले ‘न्युमेटिक पन्चीङ रिभेटिङ मेसिन’ र अन्य ६ जनाको विद्यार्थी समूहले ‘इन्जेक्सन मोल्डिङ मेसिन’ निर्माण गरेको सूचना प्रमुख चौधरीले बताए । उनले सबै उपकरणहरु अति नै उपयोगी रहेको दाबी गरे ।

पद्रशनीको अवलोकन गरेपछी प्रदेश१ की सामाजिक विकास समितिकी सभापति सरिता थापा खड्काले विद्यार्थीहरुको आविस्कार उपयोगी रहेकाले उनीहरुको क्षमतालाई प्रोत्साहन गर्न पहल गर्ने बताइन् । प्रदेशसभा सदस्य सावित्रा रेग्मीले प्राविधिक शिक्षामा उत्कृष्ट रहेको सो कलेज विश्व विद्यालय बन्ने चरणमा रहेको बताउँदै चाँडै बनाउन पहल गर्ने बताइन् ।

कलेजले प्रत्येक वर्ष ‘पास आउट’ हुन लागेका विद्यार्थीहरुको ज्ञानलाई व्यवहारिक र प्रयोगात्मक बनाउन प्रोजेक्ट वर्क गर्न लगाउने गरेको छ । सो ‘प्रोजेक्ट वर्क’ अन्तर्गत विद्यार्थीले आविस्कार गरेका वस्तुहरुको यसरी नै प्रत्येक वर्ष प्रदर्शनी हुने गरेको छ ।

२०६६ सालबाट अध्यापन सुरु भएका सो कलेजबाट हालसम्म १ हजार २ सय २७ प्राविधिक जनशक्ति उत्पादन भएका छन् । जसमध्ये ८ सय ८६ जना रोजगारीमा छन् । हाल कलेजमा ५ सय ८६ विद्यार्थी अध्ययनरत रहेको प्रिन्सिपल पोखरेलले बताए ।

देशभरको प्राविधिक शिक्षालयमध्ये उत्कृष्ट हुँदै आएको सो कलेज नेपाल सरकारबाट पटक–पटक पुरस्कृत भएको छ ।

प्रकाशित मिति: आइतबार, भदौ २२, २०७६ ०३:३२