प्रधानमन्त्री प्रचण्डपुत्री गंगा दाहालको अस्वाभाविक सक्रियतामा परराष्ट्रका अधिकारी निरीह

प्रधानमन्त्री प्रचण्डपुत्री गंगा दाहालको अस्वाभाविक सक्रियतामा परराष्ट्रका अधिकारी निरीह

भारतीय प्रधानमन्त्री नरेन्द्र मोदीका सुरक्षा सल्लाहकार अजित डोभालसँगको भेटवार्तामा प्रधानमन्त्री प्रचण्ड र उनकी छोरी गंगा दाहाल ।

A+ A A-

भारत भ्रमणमा रहेका प्रधानमन्त्री पुष्पकमल दाहाल प्रचण्डले १७ जेठमा पहिलो औपचारिक भेटवार्ता गरे- भारतीय प्रधानमन्त्री नरेन्द्र मोदीका सुरक्षा सल्लाहकार अजित डोभालसँग । प्रधानमन्त्री प्रचण्ड बसेको होटलमा भेट्न पुगेका थिए- डोभाल । अनि साथमा थिए- विदेश सचिव विनयमोहन क्वात्रा ।

प्रधानमन्त्री प्रचण्डसँग पहिलो र औपचारिक भेटवार्ता भएकाले मोदीका सुरक्षा सल्लाहकार डोभलले विदेश मन्त्रालयका अधिकारीलाई साथमै लगेका थिए । विदेश मन्त्रालयका अधिकारी त्यस्तो छलफलमा सहभागी हुने कूटनीतिक संवादका क्रममा हुने सामान्य विषय हो । भारतीय पक्षले त्यसरी भेटवार्ता गर्दा नेपालका प्रधानमन्त्री प्रचण्डले परराष्ट्र मन्त्रालयका अधिकारी कसलाई राखेका थिए ?

अहिलेसमम्म कुनै अधिकारी राखेको पत्तो छैन । तर, प्रचण्डले छोरी गंगा दाहाललाई भने साथमै राखेका छन् । परराष्ट्र मन्त्रालयका अधिकारी बस्नुपर्ने कुर्सीमा छोरी गंगा दाहाल बसेको तस्वीर सार्वजनिक भएसँगै नेपालको कूटनीतिक अभ्यासको निर्लज्जता थप उकालो लागेको छ ।

प्रधानमन्त्री प्रचण्डले नै केही महिनाअघि कूटनीतिक भेटघाटमा परराष्ट्र मन्त्रालयका अधिकारीको अनिवार्य उपस्थिति हुनुपर्ने निर्णय गरेका थिए । त्यतिमात्र होइन, सामान्य कूटनीतिक अभ्यासका काठमाडौंमा नगरेका प्रचण्डले भारतमा पनि त्यही दोहोर्‍याए । अनि, त्यत्ति कुरा जानकारी भएर पनि स्वकीय सचिवको समेत जिम्मेवारी पाएकी छोरी गंगा स्वयम् उक्त कुर्सीमा नबस्नुपर्ने हो ।

प्रधानमन्त्री प्रचण्डसँग ६ जना मन्त्रीको लस्कर थियो । परराष्ट्रमन्त्रीको समेत उपस्थिति भएको भ्रमण दलमा परराष्ट्र सचिव भरतराज पौड्याल पनि छन् । त्यसैले, अजित डोभलसँगै रहेका भारतीय विदेश सचिवझैँ गंगा दाहालको कुर्सीमा परराष्ट्र सचिव भरतराज पौड्याल हुनुपर्ने थियो । सचिव मात्रै यो भ्रमण दलमा ८ जना रहेका छन् ।

अजित डोभालसँगको छलफल मात्र होइन, छोरी दाहालको चुरीफुरी । काठमाडौंबाट भारतका लागि प्रधानमन्त्री प्रचण्ड उडानका लागि विमानस्थल जाँदा पनि छोरी गंगाको अस्वाभाविक हर्कत देखिएको थियो । बाबुसँगै हात हल्लाउँदै विमानभित्र छिरेकी दाहालले दिल्लीमा त्यस्तै अभ्यास गरिन् ।

भारतीय विदेश राज्यमन्त्री मिनाक्षी लेखीले विमानस्थलमा गरेको स्वागतमा प्रचण्डसँग छोरी गंगा दाहाल हाबी थिइन् । जस्तो, स्वागतलगत्तै प्रचण्डलाई नृत्य देखाएर गरेको सम्मान पनि लेखीसँग तस्वीर खिचाउन छोरी गंगा दाहाल नै पुगेकी थिइन् ।

सामान्य कूटनीतिक अभ्यासमा समेत प्रश्न उठ्ने गरी छोरी दाहालले देखाएको अस्वाभाविक गतिविधि र चासोमा परराष्ट्र मन्त्रालय भने निरीह देखिएको छ । भेटवार्तामा आफ्नो प्रतिनिधि राख्न नसकेको परराष्ट्र मन्त्रालयले आफ्नो संस्थागत रेकर्ड चाहिँ के राख्छ भन्ने प्रश्न पनि उठेको छ ।

प्रकाशित मिति: बिहीबार, जेठ १८, २०८० १४:२४