सुनैसुन लगाएको तस्वीर भाइरल भएपछि ओलीको प्रतिक्रिया– यत्रो मिहिनेत गरेर कस्तो घटिया

सुनैसुन लगाएको तस्वीर भाइरल भएपछि ओलीको प्रतिक्रिया– यत्रो मिहिनेत गरेर कस्तो घटिया

A+ A A-

संसदमा पशुपतिनाथमा जलहरी चढाउँदा भ्रष्टाचार भएको विषय उठेपछि सामाजिक सञ्जालमा नेकपा एमालेका अध्यक्ष केपी शर्मा ओलीको एक ट्रोल तस्वीर भाइरल भयो । जसमा ओली सुनैसुनले ढाकिएका छन् ।

यसरी सामाजिक सञ्जालमा ट्रोल बनेपछि ओलीले बुधबार त्यसबारे आफ्नो धारणा सार्वजनिक गरेका छन् । कलाकारहरूलाई एमालेमा प्रवेश गराउन बुधबार काठमाडौंमा एमालेले आयोजना गरेको कार्यक्रममा ओलीले आफ्नो ट्रोल तस्वीरबारे प्रतिक्रिया दिए । उनले भने, ‘अहिले त मलाई बोक्न नसक्ने गरी सुन लगाइदिएका छन् । यति साह्रो झुट पनि यत्रो मिहिनेत गरेर । एउटा चीजलाई अर्को ठाउँमा लगेर । कस्तो नियत, कस्तो घटिया कुरा होला ?’

उनले आफूलाई जीवनभर सुनप्रति रुचि नभएको बताएका छन् । उनले जीवनमा एकपटक आमाको सुनको औँठी लगाएको र त्यसबाहेक औँठी पनि नलगाएको बताएका छन् । उनले अहिले नेपालमा छाडापन बढेर गएको बताए । उनले भने, ‘आज दुनियाँमा सबैभन्दा छाडापन यही देशमा देखिन्छ । यति छाडापन कहीँ नहोला । पहिले छाडापन भनेर विभिन्न देशको कुरा गर्थ्यौं । अहिले नेपालमा जस्तो अन्त छैन । युट्युब खोल्न सकिँदैन । खोल्न पर्‍यो भने एकान्त कुनामा जानुपर्छ । के आउने हो भनेर डराउनुपर्छ । विकृतितर्फ भासिँदै गएका छौँ हामी ।’

उनले आफ्नो तस्वीरमा सुन देखाएर हाकाहाकी झुट बोलिएको समेत बताए । उनले भने, ‘यो देश जहाँ सभ्यता–संस्कृतिको सुरुवात भएको थियो, त्यो धर्तीमा आज के बोल्ने, के गर्ने बारबन्देजै छैन । शतप्रतिशत असत्य हो भन्ने जान्दाजान्दै हाकाहाकी झुट बोल्ने । जस्तो, केपी ओलीको फोटोमा हातभरि सुनैसुनका, यता पनि सुनैसुनका । त्यति सुन म बोक्न पनि सक्दिनँ होला ।’

प्रकाशित मिति: बुधबार, जेठ १७, २०८० १५:१६