पुँजीबजारका स्वार्थ समूहलाई करको दायरामा ल्याउँदा मैमाथि जोखिम बढ्यो: अर्थमन्त्री महत (भिडियो)

पुँजीबजारका स्वार्थ समूहलाई करको दायरामा ल्याउँदा मैमाथि जोखिम बढ्यो: अर्थमन्त्री महत (भिडियो)

A+ A A-

अर्थमन्त्री डा. प्रकाशशरण महतले पुँजीबजारलाई तलमाथि गराउने समूहलाई करको दायरामा ल्याउँदा आफूमाथि जोखिम बढेको बताएका छन् ।

बुधबार नेपाल आर्थिक पत्रकार समाजले आयोजना गरेको ‘पोष्ट–बजेट डिस्कसन’ कार्यक्रममा अर्थमन्त्री महतले पुँजीबजारमा ठूलो लगानी गरेर आम्दानीको स्रोत बनाउनेहरूलाई इमानदार भएर करको दायरामा ल्याउन खोज्दा आफूमाथि नै जोखिम बढेको बताएका हुन् ।

उनले पुँजीबजारमा ठूला लगानीकर्ताहरूको समूहले बजारलाई तल झारेर तुरुन्तै शेयर किनेर बजारमाथि लैजाने गरेको दाबी गरे । अर्थमन्त्री महतले सरकारले यस्तो प्रणालीको अन्त्य गर्न खोजेको बताए । अर्थमन्त्री महतले सरकारले बजेटमार्फत् शेयर बजारमा बढी आय गर्नेहरूलाई करको दायरामा ल्याउँदा स्वार्थ समूहहरूले अर्थमन्त्रीले शेयर बजारलाई समाप्त पार्न खोज्यो, ६० लाख लगानीकर्ता समाप्त हुने भए भन्ने जस्ता दुष्प्रचार गरिरहेको बताए ।

उनले शेयर बजारमा बढी कमाउनेहरूले कर नतिर्ने चलखेल गरेको बताए । उनले शेयर बजारलाई नै पेशा बनाएर नाफा कमाएपछि कर तिर्नुपर्ने दाबी गरे । अर्थमन्त्री महतले सरकारले पुँजी बजारमा कुनै स्वार्थ नराखेको भन्दै बजारलाई व्यवसाय बनाएकाले कर तिर्नुपर्छ भन्ने प्रणालीको विकास गर्न खोजिएको बताए ।

अर्थमन्त्री महतले अहिले पुँजीबजारमा सानो लगानी गरेर ५ देखि ६ लाख कमाउनेहरूले राज्यलाई कर तिरेको तर धेरै आम्दानी गर्नेहरू करको दायरामा नआएको बताए । अर्थमन्त्री महतले राजनीतिक पहुँच भएकाहरूको सधैँ राज्यले कुरा सुनिदिनुपर्ने तर सामान्य जनताको कुरा सरकारले नसुन्नुपर्ने हो ? भन्दै प्रश्न गरे ।

अर्थमन्त्री महतले मिडियाले बजेटका राम्रा कार्यक्रम ढाकेर सांसद विकास कोषको प्रचार गरेको गुनासो गरे । उनले सरकारले अर्थतन्त्र सुधार गर्न ल्याएका अन्य धेरै व्यवस्थालाई आझेलमा पर्ने गरी सांसद विकास कोषलाई हाइलाइट गरिएको बताए । उनले आर्थिक वर्ष २०८०-८१ को बजेटले आमुल परिवर्तन गर्न नसके पनि आर्थिक अवस्था सुधार गर्ने बताए ।

अर्थमन्त्री महतले सरकारले १६५ निर्वाचन क्षेत्रमा दिने ५ करोड रुपैयाँ पनि पुँजीगत खर्च नै भएको बताए । उनले सांसद विकास कोषको रकम सांसदहरूले आफूखुसी बाँड्ने स्कोप नभएको बताए ।

प्रकाशित मिति: बुधबार, जेठ १७, २०८० १३:२२