एक महिनायता आन्दोलनमै छन् भाजपा सांसदमाथि यौन दुर्व्यवहारको आरोप लगाउने खेलाडी (भिडियो)

एक महिनायता आन्दोलनमै छन् भाजपा सांसदमाथि यौन दुर्व्यवहारको आरोप लगाउने खेलाडी (भिडियो)

A+ A A-

भारतमा महिला कुस्ती खेलाडीले बलात्कार र यौन दुर्व्यवहारविरुद्ध प्रदर्शन थालेको एक महिनाभन्दा बढी भएको छ ।

सत्ताधारी दल भारतीय जनता पार्टीका सांसद तथा भारतीय कुस्ती महासंघका पूर्वअध्यक्ष ब्रिज भुषण शरण सिंहलाई गिरफ्तार गर्नुपर्छ भन्ने उनीहरूको माग छ । ब्रिज भुषणले नाबालिगसहित महिला कुस्ती खेलाडीलाई यौन दुर्व्यवहार र बलात्कार गरेको महिला कुस्ती खेलाडीहरूको आरोप छ ।

भाजपाका प्रभावशाली नेता भएका कारण उनलाई हालसम्म पार्टीले बलात्कार अभियोग लाग्दा पनि कुनै कारबाही गरेको छैन । मोदी सरकार किन यस विषयमा मौन छ भनेर नागरिक समाजिक अभियन्ताहरूले प्रश्न गर्न थालेका छन् । तर, ब्रिज भुषणले भने आफूमाथि लागेका आरोपलाई संसदबाट हटाउने प्रयास भनेका छन् ।

(भिडियो)

महिला खेलाडीहरूले राजनीति गरिरहेको उनको आरोप छ । तर, कुस्ती खेलाडीहरू स्वतन्त्र रूपमा गत अप्रिल महिनायता प्रदर्शनका उत्रिएका छन् । ओलम्पिकमा भारतलाई तक्मा दिलाउन सफल महिला तथा पुरुष खेलाडीहरू पनि सांसद ब्रिज भुषणलाई गिरफ्तार गर्नुपर्छ भन्दै आन्दोलित छन् ।

आइतबार भारतमा नयाँ संसद भवन उद्घाटन हुँदै गर्दा पनि उनीहरूले प्रदर्शन गरेका थिए । त्यसबेला दिल्ली प्रहरीले उनीहरूलाई हिरासतमा लिएको थियो । भारतलाई ओलम्पिकमा तक्मा दिलाउन सफल बजरंग पुनिया, साक्षी मलिक र अर्का चर्चित भिनेस फोगटजस्ता खेलाडीलाई प्रहरीले गिरफ्तार गरेको थियो ।

उनीहरूलाई छाडिएको छ । तर, दिल्ली प्रहरीले राष्ट्रिय प्रतिष्ठामा ठेस पुर्‍याएको, कानुनी व्यवस्था उल्लंघन गरेको आरोपमा मुद्दा चलाउने बताएको छ । भारतलाई कमनवेल्थ र एसियन गेममा स्वर्ण पदक दिलाउने खेलाडी फोगटले आफूहरूले शान्तिपूर्ण ढंगबाट प्रदर्शन गर्दा पनि प्रहरीले दमन गरेको बताएकी छिन् । सार्वजनिक भिडियोमा कुस्तीबाजहरूलाई जबर्जस्ती नियन्त्रणमा लिएको देख्न सकिन्छ ।

उनीहरूले बलात्कारी ब्रिज भुषणविरुद्ध जाहेरी लिन प्रहरीलाई सात दिन लाग्ने तर आफूहरूलाई सात घण्टामै मुद्दा हालिएको बताएका छन् । हालै प्रहरीले सांसद ब्रिज भुषणविरुद्ध दुईवटा मुद्दा पनि दर्ता गराएका छन् । तर, गिरफ्तार भने हालसम्म गरिएका छैनन् ।

ओलम्पियन साक्षी मलिक यस विषयमा भन्छिन्, ‘हामी हाम्रो प्रदर्शन जारी राख्नेछौ । बलात्कारी गिरफ्तार नभएसम्म र जेल नगएसम्म हाम्रो अभियान जारी रहन्छ ।’ -रोयटर्स

प्रकाशित मिति: मंगलबार, जेठ १६, २०८० १५:४९