बजेटमा स्वास्थ्यका मुख्य आकर्षण, अधिकाशं दोहोरिए पुरानै कार्यक्रम

A+ A A-

सरकारले आगामी आर्थिक वर्षकाे बजेटमा स्वास्थ्य तथा जनसंख्या मन्त्रालयका लागि ८३ अर्ब ९९ करोड बजेट छुट्याएको छ । सोमबार वर्ष २०८०/८१ को बजेट प्रस्तुत गर्दै अर्थमन्त्री प्रकाशशरण महतले स्वास्थ्य तथा जनसंख्या मन्त्रालयलाई ८३ अर्ब ९९ करोड रुपैयाँ छुट्याइएको बताएका हुन् ।

सरकारले ‘गुणस्तरीय स्वास्थ्य उपचार, जनताको अधिकार’ भन्ने नाराका साथ सबै नागरिकको पहुँचमा विशिष्टीकृत उपचार सेवा पुर्‍याएउने लक्ष्य राखेको छ ।

गाँजा खेतीको सम्भाव्यता अध्ययन

सरकारले गाँजा खेतीको सम्भाव्यता अध्ययन गर्ने भएको छ । अर्थमन्त्री प्रकाशशरण महतले औषधि प्रयोजनका लागि आगामी आर्थिक वर्ष गाँजा खेती अध्ययन गर्ने बताएका हुन् । जसका लागि आवश्यक बजेट विनियोजनसमेत गरिएको छ ।

‘एक चिकित्सक, एक स्वास्थ्य संस्था’ कार्यक्रम संचालन

सरकारले संघीय अस्पतालहरूमा ‘एक चिकित्सक, एक स्वास्थ्य संस्था’ कार्यक्रम संचालनका लागि २४ करोड बजेट छुट्याएको छ ।

अर्थमन्त्री महतले सरकारी अस्पतालमा काम गर्ने चिकित्सक तथा स्वास्थ्यकर्मीलाई प्रोत्साहित गर्न सबै संघीय अस्पतालमा एक चिकित्सक, स्वास्थ्यकर्मी – एक स्वास्थ्य संस्था कार्यक्रम सञ्चालन गर्ने बताएका हुन् ।

नागरिकको पहुँच विशिष्टीकृत सेवा

सरकारले सबै नागरिकको पहुँच विशिष्टीकृत सेवा पुर्‍याउने जनाएको छ । जसका लागि स्थानीय तहका आधारभूत अस्पतालबाट निःशुल्क स्वास्थ्य सेवा दिनका लागि १ अर्ब २८ करोड बजेट छुट्याएको छ ।

शुक्रराज अस्पताल ३ सय शैय्याको बनाइने

सरकारले शुक्रराज ट्रपिकल तथा सरुवारोग अस्पताललाई ३०० शैयामा विस्तारित गर्ने भएको छ ।

अर्थमन्त्री महतले पोखरा, सुर्खेत, डोटी र भरक्तपुरमा निमार्णनाधीन प्रादेशिक सरुवा रोग अस्पताल आगामी वर्ष सम्पन्न गरी संचालनमा ल्याइने बताएका हुन् । सरकारले सरुवा रोग अस्पताल निर्माण व्यवस्थापनका लागि ४६ करोड विनियोजन गरेको छ ।

क्षयरोग मुक्त कार्यक्रम

सरकारले क्षयरोगमुक्त नेपाल कार्यक्रमका लागि १ अर्ब १५ करोड बजेट विनियोजन गरेको छ ।

सरकारले सन् २०३५ सम्ममा क्षयरोग अन्त्य गर्ने योजना बनाएको छ भने सन् २०५० सम्ममा उन्मूलन गर्ने भनेर प्रतिबद्धता गरेको छ । तर, नेपालको सामाजिक संरचना फरक भएका कारण क्षयरोग उन्मूलनका लागि चुनौति थपिएको विज्ञहरू बताउने गरेका छन् ।

९८ प्रकारका निःशुल्क औषधि खरिद

सरकारले ९८ प्रकारका निःशुल्क औषधि खरिदका लागि स्थानीय तहसहित १ अर्ब २८ करोड विनियोजन गरेको छ ।

अर्थमन्त्री महतले स्वदेशमा उत्पादित औषधिलाई प्राथमिकता दिइने बताए ।

आधारभूत अस्पताल निर्माण

सरकारले ३२२ स्थानीय तहमा निर्माणाधीन आधारभूत अस्पतालका लागि ८ अर्ब बजेट विनियोजन गरेको छ ।

त्यस्तै अर्थमन्त्री प्रकास शरण महतले यस वर्ष निर्माण सम्पन्न हुने १०० अस्पतालको व्यवस्थापन तथा उपकरण खरिदका लागि सरकारले ८२ करोड विनियोजन गरेको बताए ।

विपन्न नागरिकको उपचार

सरकारले विपन्न नागरिकको उपचार तथा विभिन्न रोगको उपचारका लागि २ अर्ब ५० करोड विनियोजन गरेको छ ।

आगामी आर्थिक वर्षको बजेट पेस गर्दै अर्थमन्त्री महतले विपन्न नागरिकलाई मुटुरोग मिर्गौला, क्यान्सर पार्किन्सन, अल्जाइमर, स्पाइनल इन्जुरी, डेड इन्जुरी तथा सिकलसेल, एनिमियाको उपचारमा दिँदै आएको अनुदानलाई निरन्तरता दिन उक्त रकम छुट्याएको बताए ।

पाठेघरको मुखको क्यान्सर र स्तान क्यान्सरको पहिचान र उपचार बिस्तार

सरकारले महिलाहरूमा देखिन पाठेघरको मुखको क्यान्सर र स्तान क्यान्सरको पहिचान र उपचार बिस्तार गर्ने भएको छ ।

अर्थमन्त्री महतले आगामि आर्थिक वर्षको बजेट पेस गर्दै महिलाहरूमा देखिने पाठेघरको मुखको क्यान्सर, स्तन क्यान्सरको नि:शुल्क शीघ्र पहिचान र प्रारम्भिक उपचारलाई क्रमश: बिस्तार गरिने बताएका हुन् ।

‘पाठेघरको मुखको क्यान्सर रोकथामका लागि ९ देखि १४ वर्षसम्मका बालिकालाई लक्षित गरी एचपीभी खोप कार्यक्रमलाई बिस्तार गरिने छ’, उनले भने ।

‘पाठेघरको मुखको क्यान्सरविरुद्धको एचपीभी खोप अभियान सुरु गर्ने भन्दै खरिद प्रक्रिया अगाडि बढाएको छ ।

शहीद धर्मभक्त राष्ट्रिय प्रत्यारोपण केन्द्रलाई प्रतिष्ठानका रुपमा विकास

सरकारले शहीद धर्मभक्त राष्ट्रिय प्रत्यारोपण केन्द्रलाई प्रतिष्ठानका रुपमा विकास गर्ने भएको छ । अर्थमन्त्री महतले सबै संघीय अस्पतालबाट मिर्गौला प्रत्यारोपण सुरु गरिने बताएका छन् ।

सबै केन्द्रीय अस्पतालमा जेरियाट्रिक वार्ड

सरकारले सबै केन्द्रीय अस्पतालमा वृद्धवृद्धाको उपचारका लागि जेरियाट्रिक वार्ड सुरु गरिने जनाएको छ । केही अस्पतालमा जेरियाट्रिक वार्ड संचालन भए पनि अधिकांश अस्पतालमा अझैँ पनि सुरु हुनसकेकाे छैन ।

वीरमा वर्न सेन्टर

सरकारले वीर अस्पतालमा वर्न सेन्टर विकास गर्न आवश्यक पूर्वाधार बनाउने भएको छ । सुरुवाती दिनहरूमा वीर अस्पतालमा जलनको उपचार हुने गरे पनि पछिल्लो समय जलनका बिरामीलाई रिफर गर्दै आइरहेको छ ।

गेटा मेडिकल कलेज

सरकारले गेटा मेडिकल कलेजलाई शहीद दशरथ चन्द स्वास्थ्य विज्ञान प्रतिष्ठानका रुपमा संचालन गर्ने भएको छ ।

अर्थमन्त्री प्रकास शरण महतका अनुसार यही वर्षबाट गेटामा १ सय शैय्याको अस्पताल संचालनका गर्न लागि बजेट विनियोजन गरिएको छ ।

सिभिल अस्पताललाई सुपरस्पेसियालिटी अस्पताल

सकारकाले सिभिल अस्पताललाई सुपरस्पेसियालिटी अस्पतालका रुपमा विकास गरेर प्रदेशमा विस्तार गर्ने भएको छ ।

प्रकाशित मिति: सोमबार, जेठ १५, २०८० २०:१८