उत्तर कोरियाली क्षेप्यास्त्र नष्ट गर्ने जापानको तयारी, तैनाथ गर्दै प्याक–३ मिसाइल (भिडियो)

उत्तर कोरियाली क्षेप्यास्त्र नष्ट गर्ने जापानको तयारी, तैनाथ गर्दै प्याक–३ मिसाइल (भिडियो)

A+ A A-

उत्तर कोरियाले भूउपग्रह भन्दै शक्तिशाली ब्यालेस्टिक क्षेप्यास्त्रहरू परीक्षण गरिरहेको जापानले आरोप लगाएको छ ।

सोमबार जापानी मन्त्रिपरिषद्का मुख्य सचिव हिरोकाजु मात्सुनोले उत्तर कोरियाली क्षेप्यास्त्र कार्यक्रमले जापानलाई असुरक्षा महसुस भएको र आफूहरूले उनीहरूको क्षेप्यास्त्रलाई नष्ट गर्न प्याक–३ मिसाइल प्रणाली तैनाथ गर्न लागेको बताएका छन् ।

रक्षा मन्त्रालयले ओकिन्वा क्षेत्रमा मिसाइल प्रणालीहरू तैनाथ गर्न निर्देशन दिइसकेको उनको भनाइ छ । मात्सुनोले भनेका छन्, ‘उत्तर कोरियाले भूउपग्रह भनेर क्षेप्यास्त्र प्रक्षेपण गरिरहेको छ, जसले हाम्रो देशको सुरक्षामा खतरा पैदा गरेको छ ।’

(भिडियो)

उत्तर कोरियाले बारम्बार दक्षिण कोरिया र अमेरिकाले आफूमाथि आक्रमणको योजनाअनुसार युद्ध अभ्यास गरिरहेको आरोप लगाउँदै आएको छ । दक्षिण कोरिया र अमेरिकी खतरा पत्ता लगाउन आफूले जासुसी भूउपग्रह अन्तरिक्षमा तैनाथ गर्ने त्यहाँका सर्वोच्च नेता किम जोङ उन बताउँछन् ।

हिरोकाजु मात्सुनो

उत्तर कोरियाले यसअघि एकपटक जासुसी भूउपग्रह रकेटमार्फतु अन्तरिक्षमा पठाइसकेको जनाएको छ । फेरि आफूले अर्को भूउपग्रह अन्तरिक्षमा पठाउन लागेको भनेर उसले जापानलाई सूचना दिएको अवस्था छ ।

तर, जापानले भने पछिल्ला दिनहरूमा शक्तिशाली क्षेप्यास्त्र परीक्षण गरिरहेको उत्तर कोरियाले भूउपग्रहको नाममा क्षेप्यास्त्रहरू परीक्षण गरिरहेको आरोप लगाउँछ । आफ्ना भूमिवरपर ती क्षेप्यास्त्रहरू आएको खण्डमा त्यसलाई आफूले नष्ट गरिदिने जापानको भनाइ छ ।

उत्तर कोरियाले धेरैजसो क्षेप्यास्त्र परीक्षण समुद्रमा गर्ने गरेको छ । ती समुद्रहरू भने जापान र दक्षिण कोरिया वरपर पर्छन् । रोयटर्स

प्रकाशित मिति: मंगलबार, जेठ १६, २०८० ०७:०६