विपक्षीबिनै नयाँ संसदको उद्घाटन भएपछि भारतमा टिप्पणी– लोकतन्त्रको अन्त्य भयो (भिडियो)

विपक्षीबिनै नयाँ संसदको उद्घाटन भएपछि भारतमा टिप्पणी– लोकतन्त्रको अन्त्य भयो (भिडियो)

A+ A A-

भारतका प्रधानमन्त्री नरेन्द्र मोदीले आइतबार नयाँ संसद भवनको उद्घाटन गरे । तर, उद्घाटन समारोहमा प्रमुख प्रतिपक्षी दल कंग्रेस आईसहित २० विपक्षी दल अनुपस्थित थिए ।

राष्ट्रपति द्रौपदी मुर्मू पनि उक्त संसद उद्घाटन समारोहमा उपस्थित थिएनन् । तर, उनले शुभकामना सन्देश भने पठाएकी थिइन् । नयाँदिल्लीमा रहेको नयाँ संसद भवन बनाउन भारत सरकारले ९ सय ७१ करोड भारु खर्च गरेको छ । मोदी सरकारलाई भारतमा हिन्दु राष्ट्रवादी सरकार भन्ने गरिन्छ ।

ब्रिटिस औपनिवेशिक युगको पुरानो संसद भवनलाई प्रतिस्थापन गर्ने योजनाको हिस्साअन्तर्गत मोदी सरकारले नयाँ संसद भवन निर्माण गरेको हो । संसद भवन उद्घाटन समारोहमा मोदीले नयाँ संसद भवन आत्मनिर्भर भारतको सूर्योदयको साक्षी हुने बताए ।

(भिडियो)

तर, संसद भवन उद्घाटन समारोह विपक्षी दलहरूबिनै सम्पन्न भएपछि विपक्षी पार्टीहरूले प्रधानमन्त्री मोदी अधिनायकवादी बनिरहेको टिप्पणी गर्दै भारतमा लोकतन्त्र समाप्त भएको उल्लेख गरेका छन् ।

विपक्षी नेसनलिस्ट कंग्रेस पार्टीकी सांसद सुप्रिया सुल यस विषयमा भन्छिन्, ‘यति ठूलो कार्यक्रम हुनु र विपक्षीबिना संसद भवनको उद्घाटन गरिनुको अर्थ यो देशमा लोकतन्त्र छैन, यो अधुरो कार्यक्रम बन्न पुग्यो ।'

वास्तवमा संवैधानिक वरीयताक्रम भंग गर्दै मोदीले भारतीय संसद उद्घाटन गर्ने भएपछि यो कार्यक्रम चर्को राजनीतिक विवादमा फसेको थियो । वरीयताअनुसार राष्ट्रपति र उपराष्ट्रपतिले संसदको उद्घाटन गर्नुपर्ने तर मोदीले राष्ट्रपतिभन्दा माथि हुन खोजेर संसदको उद्घाटन गरेको भन्दै विपक्षीहरूले संसद उद्घाटन समारोह बहिष्कार गरिदिएका हुन् ।

मोदी सरकारले भने वरीयताक्रम भंग नभएको र आफूहरूले देशको संवैधानिक प्रमुखलाई उच्च सम्मान गर्ने बताउँदै आएको छ । भवन उद्घाटनको दिन हिन्दुत्ववादी नेता विनायक दामोदर सावरकरको १४० औँ जन्मजन्यती परेको थियो । भाजपाले सावरकरलाई महान नेता भनेता पनि विपक्षीले उनलाई विभाजनकारी नेता भन्ने गरेका छन् ।

भारतको पुरोना संसद भवन सन् १९२७ मा बनेको थियो । उक्त भवनलाई संग्रहालय बनाइनेछ । नयाँदिल्लीमा रहेको नयाँ संसद भवन बनाउन भारत सरकारले ९ सय ७१ करोड भारु खर्च गरेको छ । संसद परिसरमा लोकसभा र राज्यसभाको भवन बनाइएको छ ।

लोकसभामा ८८८ सांसद र राज्यसभामा ३८४ सांसदहरू अटाउँछन् । नयाँ संसद भवनमा संयुक्तसत्र आयोजना हुँदा १२ सय ७२ सदस्यहरू अटाउनेछन् । लोकसभाको डिजाइन राष्ट्रिय पन्छी मयुर र राज्यसभाको डिजाइन राष्ट्रिय फूल कमलमा आधारित छ । -रोयटर्स

प्रकाशित मिति: सोमबार, जेठ १५, २०८० १४:१२