सहकारी सञ्चालक अपचलन गरेर टाप, सांसद सरकारलाई साधेको–सोध्यै

बायाँबाट क्रमशः मेयर नेपाली, सांसद पाठक, सांसद शेरचन र सांसद सुवेदी ।

A+ A A-

बागलुङको ढोरपाटन नगरपालिकाका प्रमुख देवकुमार नेपाली अध्यक्ष रहेको इमेज बचत तथा ऋण सहकारी संस्था निक्षेपकर्ताको बचत नै फिर्ता गर्न नसक्ने अवस्थामा छ । पैसा फिर्ता गर्ने अवस्था नभएपछि सहकारीका अध्यक्ष नेपालीसहित सात जना फरार छन् । यो सहकारीमा वैशाखदेखि समस्या देखिन थालेको हो । बागलुङमा र पोखरामा रहेको सहकारीमा रहेको दुई अर्ब रूपैयाँ अपचलन भएको छ ।

बागलुङकै शिवशिखर बहुउद्देशीय सहकारी संस्थाका सञ्चालक पनि सम्पर्कविहीन छन् । यो सहकारीले पनि ४८ करोड रूपैयाँ हाराहारी अपचलन गरेको छ । यो सहकारी फागुनदेखि समस्याग्रस्त छ । बागलुङ र कास्कीमा शाखा रहेका यी सहकारीका निक्षेपकर्ता आफ्नो बचत फिर्ता लिन दैनिक धाइरहेका छन् । निक्षेपकर्ताको पैसा लिएर घरजग्गामा लगानी गर्ने र तरलता अभाव भएपछि सहकारीले बचतकर्तालाई पैसा दिन सकेका छैनन् ।

गण्डकीका सांसदहरूले दुवै सहकारी सञ्चालकलाई छिटोभन्दा छिटो खोजेर निक्षेपकर्ताको समस्या समाधान गरिदिन सरकार गुहारेका छन् । आइतबारको प्रदेश सभा बैठकको शून्य समयमा बोल्दै बागलुङका तीन जना सांसद नेकपा एमालेका कृष्णप्रसाद पाठक, नेपाली कांग्रेसका जित शेरचन र डिल्लीराम सुवेदीले निक्षेपकर्ताको पैसा फिर्ता गर्ने वातावरण बनाउन सरकारसँग माग गरेका हुन् । संसदमा पालैपालो बोलका यी तीन सांसदले एउटै विषयमा ‘सञ्चालक खोई ? छिटो खोजौँ’ भन्ने आशयसहित सरकारको ध्यानाकर्षण गराए ।

एमाले सांसद पाठकले सञ्चालक र तिनका परिवारको नाममा रहेको सम्पत्ति बेचेरै निक्षेपकर्ताको पैसा फिर्ता गर्न माग गरे । ‘निक्षेपकर्ता आन्दोलनमा होमिएका छन् । यसरी ठूलो संख्यामा रकम हिनामिना गर्ने यी सञ्चालकलाई तत्कालै कानुनको दायरमा ल्याउन र यी सञ्चालक, परिवारको नाममा रहेका चल–अचल सम्पत्ति रोक्का गरेर त्यो कानुनबमोजिम बेचेर निक्षेपकर्ताको बचत फिर्ता गर्न प्रदेश सरकार र सम्बन्धित सरोकारवालाको ध्यानाकर्षण गराउँछु,’ उनले भने ।

सांसद शेरचनले जनता पीडित भइरहेको गम्भीर विषयमा पनि सरकारले आफ्नो ध्यान नदिएको भन्दै गुनासो पोखे । उनले जनताको पैसा ठग्नेलाई कठघरामा उभ्याइनुपर्ने बताए । ‘आज जनताको पैसा लिएर जुन ढंगले भाग्ने अवस्था बढेको छ यसले पीडित पीडामा छन्,’ उनले भने, ‘सरकारले किन गम्भीर रूपमा ध्यानाकर्षण गर्न सकिरहेको छैन ? कसरी कारबाही गर्ने ? जनताको पैसा ठग्नेलाई कठघरामा ल्याउनुपर्छ ।’

सांसद सुवेदीले प्रदेशभरका सहकारीको आर्थिक अवस्था कस्तो छ भन्ने जानकारी गराउन माग गरे । उनले पीडितको उजुरी पनि नलिइएको गुनासो आफूसम्म आएको सुनाए । ‘खाडीमा जम्मा गरेर, देशमै चिया बेचेर जम्मा गरेको रकम करिब साढे दुई अर्ब रूपैयाँभन्दा बढी अपचलन भएको कुरा आएको छ । पीडितले फोन गरेर सम्बन्धित व्यक्तिलाई कारबाही गर्न भनेर जाँदा उजुरी लिइएको छैन भन्नुभएको छ,’ सुवेदीले थपे, ‘प्रदेश रजिष्ट्रारको कार्यालयले नियमन गर्न पाउने ९ सय ४० वटा सहकारीको आर्थिक अवस्था कस्तो छ ? त्यो सार्वजनिक गर्न माग गर्दछु ।’

गृह मन्त्रालयले इमेज सहकारीका अध्यक्ष नेपालीसहित ७ जना सञ्चालकको यात्रा अनुमति रद्द गर्न अध्यागमन विभागलाई पत्र पठाएर गत जेठ ७ गते निर्देशन दिएको थियो । अध्यक्ष नेपालीले आफ्नो घरजग्गा बेचेरै भए पनि बचत फिर्ता गर्ने आश्वासन दिएका थिए । पछि उनी स–परिवार सम्पर्कविहीन भएका हुन् ।

प्रकाशित मिति: सोमबार, जेठ १५, २०८० ०७:३३