रुसले अमेरिकालाई भन्यो– परमाणु हतियारको विषयमा हामीलाई पाठ पढाउनु पर्दैन (भिडियो)

रुसले अमेरिकालाई भन्यो– परमाणु हतियारको विषयमा हामीलाई पाठ पढाउनु पर्दैन (भिडियो)

A+ A A-

छिमेकी राष्ट्र बेलारुसमा रुसले परमाणु हतियार तैनाथ गर्ने भएपछि अमेरिकाले रुसको विरोध गरेकाे छ ।

उत्तर एट्लान्टिक सन्धि संगठन नेटोका सदस्य पोल्यान्ड, लिथुवानिया र लाटभियासँग बेलारुसको सीमा क्षेत्र जोडिएको छ । नेटोले यसअघि नै रुसी कार्यबाट आफू सजग भएको बताएको थियो ।

अमेरिकी राष्ट्रपति जो बाइडेनले पनि हालै रुसले बेलारुसमा परमाणु हतियार तैनाथ गर्नु गलत भएको र अमेरिकाले यस कार्यमा ज्यादै नकरात्मक धारणा राख्ने बताएका थिए ।

यतिबेला रुसले अमेरिकी राष्ट्रपति जो बाइडेनको भनाइमा प्रतिक्रिया जनाउँदै परमाणु हतियारको विषयमा अमेरिकाले रुसलाई पाठ सिकाउनुको अर्थ नरहेको बताएको छ ।

(भिडियो)

अमेरिकास्थित रुसी दूतावासले यस विषयमा भनेको छ,‘अमेरिकाले हाइब्रिड युद्ध छेडेको छ । रुस र बेलारुसलाई आफ्नो सुरक्षा सुनिश्चित गर्ने सार्वभौम अधिकार छ ।’

अरूलाई दोष दिनुअघि अमेरिकाले आत्मनिरीक्षण गर्न जरुरी रहेको र यस विषयमा पाठ सिकाउन बन्द गर्नुपर्ने रुसी दूतावासले अमेरिकी आलोचनापछि कडा रुपमा भनेको छ ।

रुसका अनुसार अमेरिकाले पनि अन्य देशमा परमाणु हतियारहरू तैनाथ गरेको छ । अमेरिकाले आफ्नो देशमा बाहेक इटाली, जर्मनी, टर्की, बेल्जियम र नेदरल्यान्ड्समा परमाणु हतियार तैनाथ गरेको छ ।

बेलारुसमा परमाणु हतियार राख्ने विषयलाई पुटिनले सुरुदेखि नै सामान्य कदम मात्र भनेका थिए । उनले भनेका थिए, ‘यसमा कुनै आश्चर्य मान्नुपर्दैन । दशकौँदेखि अमेरिकाले आफ्नो सहयोगी देशमा परमाणु हतियार तैनाथ गरेको छ । हामीले पनि हाम्रो सहयोगी देश बेलारुसमा त्यस्तै रणनीतिक हतियार तैनाथ गर्न लागेका हौं ।’

हाल रुसले बेलारुसमा तैनाथ गर्न लागेको क्षेप्यास्त्र प्रणालीको नाम इस्कन्दर हो जसको वजन ३ हजार ८ सयदेखि ४५ सय केजीसम्म हुन्छ । यसले ४८० देखि ८ सय केजीको विस्फोटक पदार्थ बोक्न सक्छ ।

यसबाट परमाणु हतियार प्रयोग गर्न मिल्छ भने यहाँबाट ध्वनिको गतिभन्दा तीव्र हाइपरसोनिक क्षेप्यास्त्र पनि हान्न मिल्छ जसले ५ सय किलोमिटरसम्म पुगेर मार हान्नसक्छ ।

यस वर्षको जुलाई १ बाट बेलारुसमा परमाणु हतियार भण्डारणका लागि स्टोरेज युनिटको निर्माण सुरु हुनेछ ।

रुस–युक्रेन युद्ध भएयता नै बेलारुसले रुसको समर्थन जनाइरहेको छ । अल जजिराको सहयोगमा

प्रकाशित मिति: आइतबार, जेठ १४, २०८० १९:५६