राजदरबार हत्याकाण्ड छानबिनमा राप्रपाको कुनै आपत्ति छैन: राजेन्द्र लिङ्देन

राजदरबार हत्याकाण्ड छानबिनमा राप्रपाको कुनै आपत्ति छैन: राजेन्द्र लिङ्देन

A+ A A-

राजदरबार हत्याकाण्डको छानबिनमा कुनै आपत्ति नहुने भन्दै राष्ट्रिय प्रजातन्त्र पार्टीका अध्यक्ष राजेन्द्र लिङ्देनले छुट्टै नागरिक वा न्यायिक आयोग बनाएर सत्यतथ्य छानबिन हुनुपर्ने बताएका छन् ।

आइतबार वीरेन्द्रनगरमा आयोजित पार्टीको कर्णाली प्रदेशस्तरीय भेलालाई सम्बोधन गर्न सुर्खेत पुगेका लिङ्देनले २०४६ यताका उच्चपदस्थ नेता, कर्मचारी मात्रै नभएर राजा र पञ्चहरूलाई पनि सम्पत्ति शुद्धीकरणको दायरामा ल्याउनुपर्ने बताएका हुन् ।

‘२०४६ पछिका सबै उच्चपदस्थ नेता, कर्मचारीहरूको सम्पत्ति छानबिन हुनुपर्छ । उनीहरूको मात्रै होइन, उनीहरूका नातेदार, परिवारका सदस्यको सम्पत्ति छानबिन गरेर अवैध सम्पत्ति जफत गरेर कारबाहीको दायरामा ल्याउनु पर्छ,’ उनले भने, ‘त्यो छानबिनका क्रममा यदि राजा या पञ्चहरूबाट गर्नुपर्दछ भने गरे हुन्छ । राजनीतिक दलका नेताहरूबाट सुरु गर्ने हो भने म र मेरो दलबाट सुरु गरे हुन्छ भनेर मैले भनेको छु ।’

राजदरबार हत्याकाण्डबारे पत्रकारहरूले सोधेको प्रश्नमा उनले भने, ‘राजदरबार हत्याकाण्डका विषयमा छुट्टै नागरिक आयोग बन्छ कि सरकारका तर्फबाट कुनै न्यायिक आयोग बनाएर हुन्छ, सत्यतथ्य छानबिन हुनुपर्छ । यसमा हाम्रो पार्टीको कुनै आपत्ति छैन ।’

भुटानी सरणार्थी प्रकरणमा पार्टीले संसद र सार्वजनिक रूपमा स्पष्ट धारणा राख्दै आएको उल्लेख गर्दै उनले नेपालको इज्जतसँग जोडिएको विषय भएकाले अन्तर्राष्ट्र्रियस्तरमा देशको प्रतिष्ठा गुमाउने काम भएको उल्लेख गरे ।

‘यो विषय नेपालको इज्जतसँग जोडिएको विषय हो । यसले अन्तर्राष्ट्रिय जगतमा नेपालको प्रतिष्ठा गिराउने, नेपालको बदनाम गराउनेसम्मको काम भएको छ,’ अध्यक्ष लिङ्देनले भने, ‘यो एउटा अंगको भ्रष्टाचार होइन, राज्यविरुद्धको संगठित अपराध हो भनेर निरन्तर आवाज उठाइरहेका छौँ । निष्पक्ष रूपमा छानबिन हुनुपर्छ र दोषीलाई कारबाही हुनुपर्छ ।’

अध्यक्ष लिङ्देनसहित वरिष्ठ उपाध्यक्ष रविन्द्र मिश्र, राप्रपा प्रवक्ता एवं सांसद ज्ञानेन्द्र शाहीले भेलालाई सम्बोधन गर्ने कार्यक्रम छ ।

प्रकाशित मिति: आइतबार, जेठ १४, २०८० ११:०९