डर्टमुन्ड बराबरीमा रोकिँदा बायर्न म्युनिख बन्यो बुन्डेसलिगाको च्याम्पियन

जर्मन लिग बुन्डेसलिगाको उपाधि बायर्न म्युनिखले जितेको छ ।

गएराति भएको अन्तिम खेलमा शीर्षस्थानमा रहेको बोरुसिया डर्टमुन्ड बराबरीमा रोकिएपछि बायर्न म्युनिख बुन्डेसलिगाको च्याम्पियन बन्न सफल भएको हो । योसँगै बायर्न लगातार ११औँ सिजन बुन्डेसलिगाको च्याम्पियन पनि बन्यो ।

माइन्जसँग २-२ गोलको बराबरीमा रोकिएपछि बोरुसिया डर्टमुन्ड २०११-१२ पछि पहिलोपटक बुन्डेसलिगाको उपाधि जित्ने सपना चकनाचुर भएको हो । माइन्जसँग डर्टमुन्ड बराबरीमा रोकिँदा बायर्नले एफसी कोल्नलाई २-१ गोलअन्तरले पराजित गर्दै उपाधि आफ्नो पक्षमा पारेको हो ।

बायर्न र डर्टमुन्डले ३४ खेलबाट समान ७१ अंक जोडे पनि गोलअन्तरका आधारमा बायर्नले उपाधि कब्जा गर्न सफल भयो । कोल्नमा गए राति भएको खेलमा बायर्नको जितमा किङ्सले कोमन र जमल मुसिएलाले गोल गरेका थिए । कोल्नका डिजानले एक गोल फर्काएका थिए ।

खेलको आठौँ मिनेटमा कोमनले गोल गर्दै बायर्न म्युनिखलाई सुरुआती अग्रता दिलाएका थिए । कोमनले लिरोए सानेको पासमा गोल गरेका थिए । पहिलो हाफमा १-० को अग्रता लिएको बायर्नले दोस्रो हाफमा १ गोल गर्दा १ गो खान पुगेको थियो । खेलको ८०औँ मिनेटमा कोल्नका लागि डिजानले पेनाल्टीमार्फत् गोल गर्दै खेल १-१ गोलको बराबरीमा ल्याएका थिए । त्यसपछि खेलको ८९औँ मिनेटमा जमल मुसिएलाले गोल गरेपछि बायर्न कोल्नमाथि २-१ को जित हासिल गर्दै बुन्डेसलिगाको च्याम्पियन बन्न सफल भयो ।

बायर्नलाई उपाधि सुम्पिएको डर्टमुन्ड २ गोलले पछि परेको अवस्था उल्टाउँदै माइन्जसँग २–२ गोलको बराबरीमा खेल्यो । बराबरीसँगै डर्टमुन्ड उपाधिबाट वञ्जित भयो । माइन्जका एन्ड्रिएस हान्चे ओल्सेन र करिम ओनिसिओले गोल गरे । यस्तै, डर्टमुन्डका राफयल गुरेइरो र निकलस सुलले गोल गरेका थिए ।

खेलको १५औँ मिनेटमा एन्ड्रिएसले गोल गर्दै माइन्जलाई सुरुआती अग्रता दिलाएका थिए । त्यसपछि खेलको २४औँ मिनेटमा करिम ओनिसिओले गोल गर्दै माइन्जको अग्रता दोब्बर बनाएका थिए । पहिलो हाफमै २-० ले पछि परेको डर्टमुन्डले दोस्रो हाफमा २ गोल फर्काएको थियो ।

खेलको ६९औँ मिनेटमा डर्टमुन्डका लागि राफयल गुरेइरोले गोल गर्दै आग्रता २-१ मा झारेका थिए । त्यसपछि इन्जुरी समयको थप गरिएको छैटौँ मिनेटमा निकलस सुलले गोल गर्दै डर्टमुन्डलाई हारबाट जोगाएका थिए । बराबरीमा रोकिएपछि बायर्न लगातार ११औँ पटक बुन्डेसलिगाको उपाधि जित्न सफल भएको थियो ।

बराबरीमा रोकिएसँगै डर्टमुन्डले ३४ खेलबाट ७१ अंक जोडेर लिगको दोस्रो स्थानमा रह्यो । समान ७१ अंक नै जोडेको बायर्नले गोलअन्तरका आधारमा डर्टमुन्डलाई पछि पार्दै उपाधि आफ्नो पक्षमा पारेको थियो । डर्टमुन्डसँग बराबरीमा रोकिएको माइन्जले भने ४६ अंकका साथ नवौँ स्थानमा रहेर सिजनको अन्त्य गर्‍यो ।

प्रकाशित मिति: आइतबार, जेठ १४, २०८० ०९:४१