धमलाकाे कार्यक्रममा फेरि लफडा, युवराज सफलले अधिवक्ता यज्ञमणि न्यौपानेमाथि हात हाले

धमलाकाे कार्यक्रममा फेरि लफडा, युवराज सफलले अधिवक्ता यज्ञमणि न्यौपानेमाथि हात हाले

A+ A A-

नेपाल समाजवादी मोर्चाका संयोजक युवराज सफलले टीभी कार्यक्रमकै क्रममा अधिवक्ता यज्ञमणि न्यौपानेलाई हात हालेका छन् । ऋषि धमलाको कार्यक्रम ‘जनता जान्न चाहन्छन्’ मा युवराजले यज्ञमणिलाई हात हालेका हुन् ।

अदृश्य शक्तिबाट पाएको रकमले काठमाडौंमा बाँचेकाे आरोप यज्ञमणिले लगाएपछि युवराज आक्रोशित बनेका थिए ।

‘अदृश्य शक्तिले दिएको फिका आधारमा उहाँ काठमाडौंमा बाँच्नुभएको छ’, अन्तर्वार्तामा यज्ञमणिले यति भनेपछि उनलाई धकेल्दै जुरुक्क उठेका युवराजले ‘रवि लामिछानेको मुद्दा लड्दा ७० लाख रुपैयाँ लिएको हो कि होइन तपाईंले’ भनेर सोधेका छन् ।

त्यसपछि कार्यक्रममा तनावको स्थिति बनेको देखिन्छ । निकै आक्रोशित बनेका युवराजले यज्ञमणिलाई धम्की दिँदै गालीगलौज पनि गरेका छन् । केही नलागेपछि प्रस्तोता धमला आफैं उठेर युवराजलाई बसाएका छन् । राष्ट्रिय स्वतन्त्र पार्टीका सभापति रवि लामिछानेविरुद्ध बारम्बार मुद्दा हालेर चर्चामा आएका पात्र हुन् युवराज सफल । यज्ञमणि भने राष्ट्रिय स्वतन्त्र पार्टीका कार्यकर्ता हुन् । यी दुईबीच विवाद लामिछानेकै विषयमा भएको हो ।

उसो त धमलाको कार्यक्रममा यस्ता झैझगडा सामान्यजस्तै बनिसकेको छ । यसअघि पनि दुई अधिवक्ताबीच कार्यक्रममै हातहालाहाल भएको थियो । धेरैपल्ट नेताहरूसमेत कार्यक्रमकै क्रममा कुटाकुटमा उत्रेको विगत छ । धमला आफैँ पनि कम विवादित पात्र होइनन् । पत्रकारिता आचारसंहिता उल्लंघन गरेपछि उनलाई प्रेस काउन्सिलले बारम्बार सचेत गराउने गरेको छ ।

हिजो राति प्रशारण भएको कार्यक्रमलाई धमलाले युट्युबमा यस्तो हेडलाइन दिएका छन्, 'युवराज सफलले रविका नेतालाई स्टुडियोमै पिटेपछि हंगामा, ३६ सय सेना लगाएर ज्यान मार्ने धम्की’ ।

प्रकाशित मिति: शनिबार, जेठ १३, २०८० ०७:३९