जब अमेरिकामा महारानी एलिजावेथ द्वितीयाको हत्या योजना बन्यो..(भिडियो)

A+ A A-

बेलायती महारानी एलिजावेथ द्वितीयाको गतवर्षको सेप्टेम्बर ८ का दिन ९६ वर्षको उमेरमा निधन भएको थियो ।

उनको निधन भएको एक वर्ष पनि पूरा नहुँदै अमेरिकी संघीय अनुसन्धान ब्युरो एफबीआईले एउटा दस्तावेज सार्वजनिक गरेको छ, जहाँ अमेरिकामा सन् १९८० को दशकमा उनको हत्याको योजना बनेको विषय उल्लेख छ ।

बीबीसीका अनुसार, एफबीआईले सन् १९८३ मा महारानी एलिजावेथको अमेरिकी भ्रमणबारे दस्तावेजहरू सार्वजनिक गरेको हो । जहाँ एक व्यक्तिको फोन सम्पर्कबाट सान फ्रान्सिस्को प्रहरीलाई महारानीको हत्या योजनाबारे थाहा भएको उल्लेख गरिएको छ ।

एफबीआईका अनुसार एक प्रहरी सान फ्रान्सिस्कोको पबमा गइरहन्थे । सोही पबमा भेटेका व्यक्तिले उनलाई फोन गरेर आफूले महारानीको हत्या गर्ने योजना बनाएको बताएका थिए । उत्तरी आयरल्यान्डमा आफ्नी छोरीको रबरको गोलीबाट मृत्यु भएपछि आफूले बेलायती महारानीसँग बदला लिने उनले बताएका थिए ।

भिडियो

सन् १९८३ को फेब्रुअरी ४ मा हत्याको धम्की आएको थियो । एक महिनापछि नै महारानी एलिजावेथ द्वितीया र राजकुमार फिलिप्सले क्यालिफोर्नियाको भ्रमण गर्दै थिए ।

एफबीआईको दस्तावेजमा भनिएको छ, ‘उनले महारानी एलिजावेथलाई हानि पुर्‍याउने प्रयास गर्न गइरहेका थिए । उनले या त गोल्डेन गेट पुलबाट केही वस्तु रोयल याट ब्रिटानिया जहाजमा खसालेर अथवा योसेमाइट राष्ट्रिय निकुञ्जको भ्रमण गर्दा मार्ने प्रयास गर्ने थिए ।’

एफबीआईले त्यसपछि सुरक्षाका लागि महारानी सवार जहाजलाई सुरक्षित राख्न गोल्डेन गेट पुल नै बन्द गरिदिएको थियो । हत्याको धम्की दिने ती व्यक्तिलाई गिरफ्तार गरियो या गरिएन भनेरचाहिँ केही खुलाइएको छैन ।

वास्तवमा उत्तरी आयरल्यान्डमा ठूलो तनाव जारी रहँदा बेलायती महारानीले अमेरिकाको भ्रमण गरेकी थिइन् । सन् १९२२ देखि नै उत्तरी आयरल्यान्ड संयुक्त अधिराज्य बेलायतको हिस्सा हो । तर, सन् १९६० देखि १९९८ सम्म उत्तरी आयरल्यान्डमा विद्रोह र हिंसा सुरु भयो । द्वन्द्व मुख्यतया राजनीतिक र राष्ट्रवादसँग सम्बन्धित थियो, जसलाई ऐतिहासिक घटनाहरूले निर्देशित गरेको थियो । आइरिस राष्ट्रवादी तथा रिपब्लिकन क्याथोलिक समुदायहरू उत्तरी आयरल्यान्ड र आयरल्यान्ड एक हुनुपर्छ भनेर प्रदर्शन गरिरहेका थिए भने आइरिस प्रोटेस्टेन्टहरू उत्तरी आयरल्यान्ड बेलायतमै हुनुपर्ने बताइरहेका थिए ।

सन् १९७६ मा एलिजावेथले न्युयोर्क सिटीको भ्रमण गर्दा एक पाइलटले ‘बेलायत, आयरल्यान्ड बाहिर जाऊ’ भनेर सानो विमान उडाउँदै ब्यानर प्रदर्शन गरेका थिए । एफबीआईका अनुसार ती व्यक्तिलाई अमेरिकी प्रहरीले गिरफ्तार गरेर अनुसन्धान पनि गरेको थियो ।

एफबीआईका अनुसार अमेरिकी प्रहरीहरू महारानी एलिजावेथको सुरक्षाका लागि सुरुवातदेखि नै सतर्क थिए र कुनै खतरा आउन दिएनन् । सन् १९७९ मा अर्धसैन्य बल आइरिस रिपब्लिकन आर्मीले आयरल्यान्ड गणतन्त्रमा बम आक्रमण गरेर बेलायती राजपरिवारका सदस्य महारानीका दाइ लर्ड माउन्ट ब्याटनको हत्या नै गरेको थियो ।

सन् १९८९ मा जब महारानी एलिजावेथले पुनः अमेरिकाको केन्टकी राज्यको भ्रमण गर्दै थिइन्, तब पनि एफबीआईले उनको सुरक्षाका लागि धेरै मिहिनेत गरेको थियो । एफबीआईको पुरानो दस्तावेजअनुसार त्यसबेला बेलायती राजपरिवारलाई अर्धसैन्य बल आइरिस रिपब्लिकन आर्मीबाट सधैँ खतरा भएको विषयमा अमेरिकी प्रहरी सतर्क थियो ।

सन् १९९१ मा जब एलिजावेथ तत्कालीन अमेरिकी राष्ट्रपति जर्ज डब्लू बुससँग बाल्टिमोर ओरियोल्स बेसबल खेलमा उपस्थित हुँदै थिइन्, तब आइरिस समूहले स्टेडियममै महारानीविरुद्ध प्रदर्शन गर्ने योजना बनाएको थियो । आइरिस समूहले ठूलो संख्यामा टिकट खरिद गरेको एफबीआईको भनाइ छ । त्यसबेला पनि महारानीको सुरक्षा आफूहरूले गर्न सकेको एफबीआईको भनाइ छ ।

प्रकाशित मिति: शनिबार, जेठ १३, २०८० ०८:२५