आफ्नाे शिकार गर्न आउने शिकारीलाई नै खाइदिने कीरा (भिडियाेसहित)

A+ A A-

भिडियाे हेरिरहँदा त्यहाँ देखिने जीव तपाईंलाई फट्याङ्ग्रा हो कि जस्तो लाग्न सक्छ । तर यो म्यान्टिस कीरा हो ।

फट्याङ्ग्रा शाकाहारी हुन्छ भने यो कीराचाहिँ मांसहारी हुन्छ । यसले धेरैजसो साना कीराहरू खाने गर्छ ।

म्यान्टिसलाई आक्रामक व्यवहारका कारण प्रेइङ म्यान्टिस अर्थात् ‘शिकारी कीरा’ भनेर पनि चिन्ने गरिन्छ । वास्तवमा यो शिकारीको पनि शिकारी हो ।

यसले आफूलाई सिकार गर्न आउने शिकारीकै सिकार गरिदिन सक्ने क्षमता राख्छ । यसले आफूभन्दा ठूला चरा र छेपारोलाई जिउँदै खाएका भिडियोहरू धेरैपटक सार्वजनिक भइसकेका छन् ।

यो कीरा कुकुर र बिरालोजस्ता जनावरसँग पनि डराउँदैन । यसले आफूभन्दा विशाल जनावरलाई लडाइँमा जित्ने कुरै आउँदैन तर यो निडर छ । बरु मर्छ, लड्न छाड्दैन ।

भिडियो

जब यो लड्नका लागि तयार हुन्छ, यसको शारीरिक आवरणलाई हेर्दा यस्तो लाग्छ, मानौँ– यो कम्फु र कुस्ती खेल्न तयार छ । म्यान्टिसका तिखा दाराहरू हुन्छन् र यसका खुट्टाहरू ज्यादै बलिया हुन्छन्, जसले गर्दा यसले सर्प, चरा, छेपारोजस्ता आफूभन्दा ठूलो जीवलाई पनि पक्रेपछि छाड्दैन र जिउँदै खाइदिन्छ ।

यो कीराले १८० डिग्रीसम्म आफ्नो टाउको घुमाउन सक्छ भने यसले आफूभन्दा १० गुणा बढी वजन उठाउन सक्छ । प्रजनन्‌पछि पोथी म्यान्टिसले भाले म्यान्टिसलाई जिउँदै खाने गरेको पनि पाइएको छ । कतिपय प्रजातिका म्यान्टिसले त छेपारोले झैँ रङ पनि परिवर्तन गर्न सक्छन् ।

विश्वमा २४ सय प्रजातिका म्यान्टिस कीरा पाइन्छन् । यी कीराहरू विशेषगरी उत्तरी अमेरिका र दक्षिणी युरोपका समशीतोष्ण क्षेत्रका साथै उष्णकटिबन्धीय घमाइला क्षेत्रहरूमा पाइन्छन् ।

–नेसनल जियोग्राफीको सहयोगमा

प्रकाशित मिति: शनिबार, जेठ १३, २०८० ०९:३०