इरानले शक्तिशाली क्षेप्यास्त्र परीक्षण गरेपछि अमेरिकामाथि थपियो अर्को टाउको दुखाइ (भिडियो)

इरानले शक्तिशाली क्षेप्यास्त्र परीक्षण गरेपछि अमेरिकामाथि थपियो अर्को टाउको दुखाइ (भिडियो)

A+ A A-

इरानले शक्तिशाली ब्यालिस्टिक क्षेप्यास्त्र सफलतापूर्वक परीक्षण गर्न सफल भएको छ ।

इजरायलले इरानको परमाणु हतियार कार्यक्रमविरुद्ध कदम चाल्ने बताएको दुई दिनपछि नै बिहीबार इरानले दुई हजार किलोमिटर परसम्म पुगेर मार हान्नसक्ने क्षेप्यास्त्रको प्ररिक्षण गरेको हो । इरानले इजरायललाई राष्ट्रको रुपमा मान्यता दिँदैन ।

मध्यपूर्वमा इरान ठूला क्षेप्यास्त्र कार्यक्रमको नेतृत्वकर्ता राष्ट्र हो । इरानका अनुसार बिहीबारको क्षेप्यास्त्रले इजराइल र अमेरिकासम्म पुगेर आक्रमण गर्नसक्छ । हाल इरानले परीक्षण गरेको क्षेप्यास्त्र ‘कोरामसार ४’ ब्यालिस्टिक क्षेप्यास्त्रको परिस्कृत रुप हो, यसलाई ‘खैबर’ क्षेप्यास्त्र भनिएको छ । जसमा १५ सय केजीको विस्फोटक पदार्थ हुन्छ ।

भिडियो

यसले अमेरिका नियन्त्रित केही क्षेत्र र इजराइलमै पुगेर आक्रमण गर्नसक्ने बताइन्छ । अमेरिका र युरोपेली राष्ट्रहरूले बारम्बार इरानलाई क्षेप्यास्त्र कार्यक्रम अगाडि नबढाउन दबाब दिँदै आएका छन् । तर इरानले आफ्नो रक्षाका लागि भएता पनि यी हतियार चाहिने बताउँदै आएको छ ।

इरानी रक्षामन्त्री जेनरल मोहम्मद रेजा गराई अस्तियानीका अनुसार यो इरानको रणनीतिक हतियार हो । जाे दुस्मनको रडारलाई झुक्याउँदै उनीहरूको हवाई क्षेत्रमा घुस्न सक्षम छ ।

इरानले आफ्नो ब्यालिस्टिक मिसाइलहरू संयुक्त राज्य अमेरिका, इजरायल र अन्य सम्भावित क्षेत्रीय शत्रुहरूविरुद्ध एक महत्त्वपूर्ण प्रतिरोधात्मक र प्रतिकारात्मक शक्ति भएको बताएको छ ।

यसअघि उत्तर कोरियाले पनि ह्वासाङ नामक अन्तरमहादेशीय क्षेप्यास्त्र विकास गरेको बताउँदै सो क्षेप्यास्त्रले अमेरिकासम्मै पुगेर मार हान्नसक्ने बताएको थियो । उत्तर कोरियाको हतियार कार्यक्रम अमेरिकाका लागि चिन्ताको विषय हो, यतिबेला इरानको शक्तिशाली क्षेप्यास्त्र कार्यक्रम पनि अमेरिकाको टाउको दुखाइ बन्न पुगेको छ ।

सन् २०१६ मा भएको इरान परमाणु सम्झौताबाट अमेरिका सन् २०१८ मा पछाडि हटेको थियो । त्यसयता इरान र अमेरिकाबीचको टकराव बढ्दै गएको छ । इरानले तोकिएको नियमभन्दा बढी युरेनियम उत्सर्जन गर्न थालेको छ ।

झन् अमेरिकाले सन् २०२० मा इरानी कमाण्डर कासिम सुलेमानीको ड्रोन आक्रमण गरेर हत्या गरेपछि इरान अमेरिकासँग क्रुद्ध छ र उसले परमाणु हतियार कार्यक्रमलाई तीव्रता दिन छाडेको छैन । रोयटर्सको सहयोगमा

प्रकाशित मिति: शुक्रबार, जेठ १२, २०८० १४:२७