रेशम चौधरीलाई माफी दिन राष्ट्रपतिसमक्ष सिफारिस, गणतन्त्र दिवसमा छोड्‌ने तयारी

रेशम चौधरीलाई माफी दिन राष्ट्रपतिसमक्ष सिफारिस, गणतन्त्र दिवसमा छोड्‌ने तयारी

A+ A A-

टीकापुर काण्डमा दोषी ठहर हुँदै जेलजीवन बिताइरहेका रेशम चौधरीलाई सरकारले आममाफी दिने प्रक्रिया अगाडि बढाएको छ । गणतन्त्र दिवसको अवसर पारेर राष्ट्रपतिबाट उनलाई माफी दिने तयारी भएको हो । सरकारले चौधरीलाई माफी दिन राष्ट्रपति रामचन्द्र पौडेलसमक्ष सिफारिस गरेको छ ।

सर्वोच्च अदालतले यही २ जेठमा चौधरीलाई जन्मकैद गर्ने जिल्ला अदालतको आदेश सदर गरेको थियो । चौधरी १५ फागुन, २०७४ देखि थुनामा छन् ।

उनलाई सजाय माफी दिने विषयमा प्रधानमन्त्री पुष्पकमल दाहाल प्रचण्डले राष्ट्रपति रामचन्द्र पौडेलसँग छलफल गरेका छन् । मंगलबार प्रधानमन्त्री शीतल निवास पुगेका थिए । उनले यो विषयमा छलफल गरेको शीतल निवास स्रोतले बतायो । उक्त स्रोतले भन्यो, ‘माफीसम्बन्धी फाइल राष्ट्रपति कार्यालय पुगिसकेको छ । अहिले फाइल अध्ययनको क्रममा छ ।’

चौधरी संरक्षक रहेको नागरिक उन्मुक्ति पार्टी पनि अहिले सरकारमा छ । सो पार्टीले सुरुदेखि नै चौधरीलाई जेलमुक्त गर्नुपर्ने माग गर्दै आएको छ । तर, सर्वोच्चले जन्मकैदको सजाय गर्ने जिल्ला अदालतको फैसला सदर गरेपछि सजाय माफीको प्रक्रियाबाट उनलाई जेलमुक्त गर्ने तयारी भएको हो ।

मन्त्रिपरिषद्को सिफारिसमा राष्ट्रपतिले सजाय घटाउन सक्ने, सजाय माफी मिनाह गर्ने सक्ने कानुनी व्यवस्था छ । यसरी सजाय मिनाहको निर्णय गणतन्त्र दिवस र संविधान दिवसका अवसरमा गरिँदै आएको छ । यही जेठ १५ गते गणतन्त्र दिवसको अवसरमा चौधरीको सजाय राष्ट्रपतिबाट माफी गराउने तयारीमा सरकार लागेको हो ।

कैलालीको टीकापुरमा २०७२ भदौमा ७ जना सुरक्षाकर्मी र एक नाबालकको मृत्यु हुने गरी भएको हिंसामा चौधरी दोषी रहेको ठहर अदालतले गरेको छ । उनी फरार रहेकै अवस्थामा २०७४ को चुनावमा प्रतिनिधिसभा सदस्यमा निर्वाचित भएका थिए । पछि पक्राउ परेका उनी जेलबाट सिंहदरबार पुगेर शपथग्रहण गरी पुनः जेलमै फर्किएका थिए ।

प्रकाशित मिति: बिहीबार, जेठ ११, २०८० १७:२६