अमेरिकाले युक्रेनलाई एफ–१६ विमान दिँदा नेदरल्यान्ड्सले उडाउन तालिम प्रदान गर्ने (भिडियो)

अमेरिकाले युक्रेनलाई एफ–१६ विमान दिँदा नेदरल्यान्ड्सले उडाउन तालिम प्रदान गर्ने (भिडियो)

A+ A A-

अमेरिकाले युक्रेनलाई अत्याधुनिक एफ–१६ लडाकु विमानहरू प्रदान गर्ने घोषणा गरेपछि रुस चिन्तितसँगै रुष्ट पनि छ ।

अमेरिकाले युक्रेनलाई ३८ औंपटक ३ सय ७५ मिलियन अ‍मेरिकी डलरको हतियार सहयोग गर्दैछ । यही सहयोगमा एफ–१६ पनि समावेश छ ।

रुसको विदेश मन्त्रालयले स्पष्ट रुपमा यो भनेको छ कि अमेरिकाले युक्रेनलाई एफ–१६ दिँदा पूरै नेटो नै युद्धमा तानिने खतरा छ । रुसका अनुसार एफ–१६ लडाकु विमान उडाउन युक्रेनी पाइलट सक्षम छैनन् र एफ १६ को प्रविधिसँग अभ्यस्त हुन समय लाग्छ ।

यस्तोमा अमेरिका या नेटोका सेनाले नै युक्रेनमा पुगेर युक्रेनलाई यो विमान प्रयोग गर्न सघाउने रुसी आशंका छ । यसो भएमा नेटो स्वतः युद्धमा सामेल हुनेछ । रुसले सुरुवातदेखि नै विदेशी सेना युक्रेनी भूमिमा देखिएको खण्डमा आफूले परमाणु हतियार प्रयोग गर्ने बताइसकेको छ ।

(भिडियो)

तर अमेरिकी राष्ट्रपति जो बाइडेनले जी–७ बैठकमै यो पनि भनेका थिए कि युक्रेनी सेनालाई उक्त विमान उडाउन प्रशिक्षण दिइनेछ । यतिबेला ध्वनीको गतिभन्दा दुई गुणा तीव्र एफ–१६ लडाकु विमान उडाउनका लागि युक्रेनी सेनालाई नेदरल्यानड्सले प्रशिक्षण दिने घोषणा गरेको छ ।

यसको अर्थ विदेशी सेनाहरू युक्रेन पुगिराख्नु पर्दैन । युक्रेनी सेना विदेश जानेछन् र यो विमान उडाउन सिकेर स्वदेश फर्केर रुसविरुद्ध लड्नेछन् ।

नर्वेले युक्रेनी पाइलटहरूलारई एफ–१६ लडाकु विमान उडाउन सिकाउने नेदरल्यान्ड्सको प्रयासलाई समर्थन गरेको छ । युक्रेनका राष्ट्रपति भोलोदिमिर जेलेन्स्कीका अनुसार यो विमान रुसी क्षेत्रमा आक्रमण गर्नका लागि प्रयोग गरिने छैन तर युक्रेनबाट रुसी सेना लखेट्न भने यो विमान प्रयोग गरिनेछ ।

जेलेन्स्कीले बुधबार मात्र एक भिडियो सन्देश जारी गर्दै युक्रेनले अमेरिकाबाट एफ–१६ लडाकु विमान पाउनु रुसले युद्ध हार्नुको संकेत रहेको बताएका छन् । रोयटर्स

प्रकाशित मिति: बिहीबार, जेठ ११, २०८० १४:३४