गृहमन्त्री श्रेष्ठले भने- बयानकै आधारमा कसैलाई पक्राउ गर्न मिल्दैन, थप अनुसन्धान हुँदैछ (भिडियो)

गृहमन्त्री श्रेष्ठले भने- बयानकै आधारमा कसैलाई पक्राउ गर्न मिल्दैन, थप अनुसन्धान हुँदैछ (भिडियो)

गृहमन्त्री नारायणकाजी श्रेष्ठ । तस्वीर: सुशील श्रेष्ठ/ शिलापत्र

A+ A A-

उपप्रधानमन्त्री एवं गृहमन्त्री नारायणकाजी श्रेष्ठले नक्कली भुटानी शरणार्थी प्रकरणमा पक्राउ परेकाहरूले दिएको बयानकै आधारमा कसैलाई पक्राउ गर्न नमिल्ने तर उनीहरूमाथि अनुसन्धान भने भइरहेको बताएका छन् ।

बिहीबार एमालेको भ्रातृ संगठन राष्ट्रिय युवा संघ नेपालले नक्कली भुटानी शरणार्थी प्रकरणको निष्पक्ष छानबिनको माग गर्दै बुझाएको ज्ञापनपत्र ग्रहण गर्दै गृहमन्त्री श्रेष्ठले कोही व्यक्तिले दिएको बयानकै आधारमा मात्रै पक्राउ गर्न नमिल्ने भन्दै थप अनुसन्धान भइरहेको बताएका हुन् ।

उनले राजनीतिक दलहरूले नागरिकलाई जीवन फेरिएको अनुभूति दिन नसकेको बताए । उनले देशमा भ्रष्टाचारको जालो व्याप्त रहेको र कमिसनको जालो नतोड्दासम्म समृद्धिको यात्रा सफल हुन नसक्ने बताए ।

गृहमन्त्री श्रेष्ठले भ्रष्टाचारको प्रभावकारी नियन्त्रण गर्न आवश्यक भएको बताए । उनले देशको नागरिकलाई अनागरिक बनाएर विदेश पठाएर सम्पत्ति कमाउने काम सह्य नहुने बताए । उनले राजनीतिक प्रभाव र अवाञ्छित दबाबबाट मुक्त भएर स्वतन्त्र रूपमा छानबिन प्रहरीलाई निर्देशन दिएको पनि बताए ।

‘मैले नेपाल प्रहरीलाई निष्पक्ष रूपमा काम गर्न भनिसकेको छु । राजनीतिक प्रभाव र अवाञ्छित दबाबबाट मुक्त भएर स्वतन्त्र रूपमा छानबिन हुन्छ । एउटाले बयान दिएकै आधारमा मुद्दा चलाउन मिल्दैन कि भनेर अरु प्रमाण पनि खोज्ने प्रयासमा प्रहरी छ । एउटा कसैले भनिदियो भन्दैमा पक्राउ गर्न मिल्दैन,’ उनले भने ।

गृहमन्त्री श्रेष्ठले नक्कली शरणार्थी बनाएर देशका नागरिकलाई बेच्ने कार्य सह्य नहुने बताए ।

प्रकाशित मिति: बिहीबार, जेठ ११, २०८० १३:३९