पुटिनसँग रुष्ट रुसी समूहले नै बेल्गोरोद शहर रुसबाट अलग्याउन गरिरहेछन् आक्रमण (भिडियो)

पुटिनसँग रुष्ट रुसी समूहले नै बेल्गोरोद शहर रुसबाट अलग्याउन गरिरहेछन् आक्रमण (भिडियो)

A+ A A-

उत्तर–पूर्वी युक्रेनको सीमाक्षेत्रदेखि मात्र ४० किलोमिटर टाढाको दूरीमा रुसी शहर बेल्गोरोद अवस्थित छ । साढे ३ लाख जनसंख्याको उक्त शहरमा पछिल्ला केही समययता विस्फोटन र दोहोरो गोलाबारीका आवाजहरू सुन्न सकिन्छ ।

दैनिक गोलाबारी र विस्फोटनको आवाज सुनेपछि बोल्गोरोदका रुसी नागरिकहरू पहिलोपटक आफूहरूले डरको महसुस गरिरहेको बताउँछन् ।

सुरुवातमा युक्रेनले त्यहाँ आक्रमण गरेको आशंका गरिएको थियो । तर, सो आक्रमण र विस्फोटनका घटना रुसकै नागरिकहरूले गराएका हुन् । राष्ट्रपति भ्लादिमिर पुटिनदेखि असन्तुष्ट दुई समूह द फ्रिडम अफ रसिया लिजन एफआरएल र रसियन भोलुन्टर कोप्स आरभीसी समूहले बोल्गोरोदमा भएको आक्रमणको जिम्मा लिएका छन् ।

एफआरएल र आरभीसीले बोल्गोरोदमा रहेको तेल डिपोमा ड्रोन हमला गरेका थिए । यी समूहले युक्रेनी सेनालाई साथ दिएर युक्रेनी भूमिबाट पनि बेल्गोरोदमा गोलाबारी गरिरहेका छन्, जसका कारण बोल्गोरोदको कोजिन्का र ग्लोतोभोबाट सयौँ मानिसहरूलाई सुरक्षित स्थानमा स्थान्तरण गर्नुपरेको छ ।

भिडियो

यस हप्ताको आइतबारबाट भने बेल्गोरोदमा रुसी सेनासँगै एफआरएल र आरभीसीले युद्ध लडिरहेका छन् । यी पुटिनविरुद्धका रुसी समूहले सीमाक्षेत्रका चेकपोस्टहरू कब्जा गरेका छन् । रुसी नागरिकले नै युक्रेनको साथ दिएर युद्ध गर्न थालेपछि यस कार्यले रुसी सरकारलाई अचम्मित तुल्याएको छ ।

यी समूहले वास्तवमा बेल्गोरोद शहरलाई रुसबाट अलग्याउन चाहेका छन् । पुटिनको अत्याचारबाट मुक्त हुनका लागि बेल्गोरोदलाई स्वतन्त्र गर्न चाहेको उनीहरू बताउँछन् ।

युक्रेनको सरकारले रुसी लडाकुले स्वतन्त्र रूपमा रुसविरुद्ध अभियान चलाएको र आफ्नो यसमा कुनै सम्बन्ध नभएको बताउँदै आएको छ । यसरी रुसी नागरिक नै रुसविरुद्ध लड्न तत्पर भएपछि युक्रेनलाई जारी युद्धमा लाभ मिल्न सक्छ ।

रुसका अनुसार पछिल्लो २४ घण्टामा सीमाक्षेत्रमा गोलाबारी हुँदा ७० आक्रमणकारीको मृत्यु भएको छ । रुसविरुद्ध उभिएका ती सशस्त्र समूहले युक्रेनी भूमिबाट आक्रमण गरेको मस्कोको भनाइ छ । आक्रमणकारीलाई परास्त गर्न आफूहरूले लडाकु विमान र तोपगोलाको मद्दत लिएको रुसी सेना बताउँछ ।

पछिल्लो घटनाक्रमलाई आफूहरूले नजिकैबाट नियालिरहेको र बेल्गोरोदमा भएको आक्रमणमा आफ्नो कुनै संलग्नता नभएको युक्रेनको उप–रक्षामन्त्री गन्ना मालयर बताउँछिन् । उनी भन्छिन्, ‘हामीले विदेशी भूमिमा युद्ध लडिरहेका छैनौँ । हामी त रुसी सेनालाई आफ्नो भूमिबाट हटाउन मात्र चाहन्छौँ ।’

रोयटर्स र अल जजिराको सहयोगमा

प्रकाशित मिति: बुधबार, जेठ १०, २०८० १६:३०