भारतविरुद्ध नेपालको त्यो ऐतिहासिक खेल

A+ A A-

मंसिर १७ गते २०७६ साल । नेपाली महिला भलिबल टिमको लागि ऐतिहासिक दिन । १३औँ दक्षिण एसियाली खेलकुद प्रतियोगिताअन्तर्गत महिला भलिबलको फाइनलमा नेपालले भारतसँग ऐतिहासिक खेल खेल्दै थियो ।

साग इतिहासमै पहिलो पटक नेपाल फाइनलमा पुगेको थियो । रजत पदक पक्का गरिसकेको नेपालले स्वर्णका लागि भारतसँग कडा टक्कर दिने अनुमान सबैको थियो । सेमिफाइनलमा श्रीलंकालाई ३–० को सोझो सेटमा जित निकालेको नेपाली टिममा उच्च मनोबल थियो ।

खचाखच दर्शकको उपस्थिति हुँदा धेरै दर्शकले टिकट काटेपनि खेल हेर्न पाएनन् । खचाखच दर्शकको उपस्थितिमा सुरु भएको फाइनलमा पहिलो सेट नेपालले भारतविरुद्ध १७–२५ ले गुमायो । दोस्रो सेटमा नेपालले उत्कृष्ट पुनरागमन गर्दै भारतविरुद्ध २५–२३ ले जित्यो । तेस्रो सेटमा पनि नेपालले २५–२१ ले जितेर खेलमा २–१ को अग्रता लियो । फाइनल जित नजिक पुगेको नेपालले चौथो सेटमा भारतलाई हराए स्वर्ण जित्ने पक्का भयो । तर चौथो सेटमा भारतले २५–२१ ले जितेपछि खेल पाँचौँ सेटतर्फ धकेलियो । पाँचौँ सेटमा भारतले नेपाललाई १५–८ ले हराउँदै स्वर्ण पदक जित्यो । नेपाल भने रजत पदकमै खुम्चियो ।

चार वर्षपछि फेरि भारत र नेपाल त्यही कोर्टमा प्रतिस्पर्धा गर्दै छ, जुन कोर्टमा साग खेलकुदको भलिबलतर्फ फाइनलमा प्रतिस्पर्धा गरेको थियो । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा काभा महिला भलिबल च्यालेन्ज कपको समूह ‘ए’ को आफ्नो अन्तिम खेलमा नेपाल र भारतबीच प्रतिस्पर्धा हुन लागेको हो । यी दुवै टिम सेमिफाइनल पुगिसकेका छन् । घरेलु टिम नेपालले किर्गिस्तान र बंगलादेशलाई पराजित गर्दै सेमिफाइनलमा स्थान बनाएको हो । नेपाल र भारतबीचको यो खेलले समूह ‘ए’ को विजेता र उपविजेताको टुंगो लाग्नेछ ।

सागमा हारेको बदला लिँदै भारतविरुद्ध जित निकाल्ने नेपाललाई राम्रो अवसर पनि छ ।