रुस-युक्रेन युद्धमा बाख्मुत शहरको नियन्त्रण किन महत्त्वपूर्ण बन्यो ? (भिडियो)

रुस-युक्रेन युद्धमा बाख्मुत शहरको नियन्त्रण किन महत्त्वपूर्ण बन्यो ? (भिडियो)

A+ A A-

रुसले पूर्वी युक्रेनी शहर बाख्मुत पूर्ण रूपमा कब्जा गरेको दाबी गरिरहँदा किभले भने उक्त शहर रुसी कब्जामा नगएको र अझै युद्ध जारी रहेको बताइरहेको छ ।

रुसले गत वर्षको फेब्रुअरी २४ यता युक्रेनमा आक्रमण जारी राख्दा सबैभन्दा बढी लडाइँ चलिरहेको क्षेत्र हो, बाख्मुत । कुनै समय ७० हजार मानिसको बसोबास रहेको सो क्षेत्रमा अहिले आठ महिनायता हिंस्रक र रक्तपातपूर्ण युद्ध चलिरहेको छ ।

रुसका राष्ट्रपति भ्लादमिर पुटिनले आफ्ना सेना र भाडाका लडाकु समूह वाग्नरलाई बाख्मुत कब्जा गरेकोमा र युक्रेनबाट सो क्षेत्रलाई स्वतन्त्र बनाउन सफल भएको भन्दै शुभकामना दिएका छन् । तर, युक्रेनका राष्ट्रपति भोलोदिमिर जेलेन्स्कीले रुसी सेनाहरू बाख्मुतमा भएता पनि पूरै शहर रुसी कब्जामा गएको विषय स्वीकार गर्दैनन् ।

(भिडियो)

युक्रेनी थल सेनाका कमाण्डर कर्णेल ओलेकसान्डर सिर्स्कीले युक्रेनका सेनाले रणनीतिक रूपमा शहरलाई घेरा हाल्दै रुसी सेनालाई आक्रमण गरिरहेको बताउँछन् । वास्तवमा बाख्मुत शहरलाई यतिबेला युक्रेनमा ‘आशा र विश्वास’को संकेतका रूपमा हेरिएको छ । यो शहर रुसविरुद्ध दृढ प्रतिरोधको उदाहरण बनेको अवस्था छ । किनभने त्यहाँ महिनौँयता युद्ध जारी छ र युक्रेनी सेनाले रुसलाई लामो समययता विफल बनाइसकेको अवस्था छ ।

रुसलाई अर्कोतर्फ बाख्मुतमा जित जसरी पनि चाहिएको छ, रुसी भाषामा भन्ने हो भने सो क्षेत्रलाई युक्रेनबाट स्वतन्त्र बनाउन मस्कोले बाख्मुत कब्जा गर्नैपर्ने अवस्था छ । त्यहाँ केही समय अगाडिसम्म रुसी भाडाका लडाकु समूहले युद्ध हार्ने स्थिति आएको र आफूहरू पर्याप्त हतियार नभएको खण्डमा फर्किने भन्दै अभिव्यक्ति दिएका थिए ।

यदि डोनबासको युद्ध जितेमा युक्रेनी सेनाको आत्मबल झनै बढ्नेछ र रुसविरुद्ध उनीहरू झनै विश्वस्त भएर लड्नेछन् । अर्कोतर्फ जी-७ बैठकमा युक्रेनका राष्ट्रपति भोलोदिमिर जेलेन्स्कीले बाख्मुत पूर्ण रूपमा ध्वस्त भएको प्रतिक्रिया दिएका थिए ।

युक्रेनका राष्ट्रपति जेलेन्स्कीले पछिल्लो समय विभिन्न देश पुगेर हतियारहरू संकलन गरिरहेका छन् । रुसी सेनालाई आफ्नो देशबाट लखेट्ने योजनाअनुसार निर्णायक जवाफी कारबाहीको तयारी गरिरहेको अवस्था छ । यस्तो अवस्थामा बाख्मुत रुसी कब्जामा गएको खण्डमा युक्रेनी सेनाको मनोविज्ञानमा असर पुग्ने पनि निश्चित छ ।

रुसले बाख्मुत कब्जा गरे उसलाई १ लाख ५० हजार जनसंख्या भएको क्रामाटोर्स्क क्षेत्रमा अगाडि बढ्न सहज हुनेछ । तर, युक्रेनी सेना यतिबेला पश्चिमा राष्ट्रको हतियारबाट सम्पन्न छन्, उनीहरूले बाख्मुत बाहिरका शहरमा पनि रुसलाई यसैगरी महिनौँ अल्झाएर राख्न सक्छन् ।

समग्रमा बाख्मुतको लडाइँलाई रुस र युक्रेनले प्रतिष्ठाको युद्धका रूपमा हेरेका छन् । बाख्मुतमा उनीहरू दुवै समूह सहजै हार मान्ने अवस्थामा छैनन् । -अल जजिराको सहयोगमा

प्रकाशित मिति: मंगलबार, जेठ ९, २०८० १७:२२