‘मुसुक्क म’ लिएर पाठकमाझ आए हिरण्य भोजपुरे

A+ A A-

लेखनका विविध विधामा कलम चलाउँदै आएका पुराना गायक हिरण्य ‘भोजपुरे’ आफ्नो नवीन आख्यान कृतिका साथ पाठकमाझ आइपुगेका छन् ।

पब्लिकेशन नेपालयबाट प्रकाशित भोजपुरेको पुस्तक ‘मुसुक्क म’ पुस्तक पसलहरूमा उपलब्ध छ । १०८ वटा लघुकथाहरूको यो संग्रहका अधिकांश कथा एउटा पानामै सकिएका छन् । डेढ सय पृष्ठको पुस्तकलाई तीन सय ५५ रुपैयाँ मूल्य राखिएको छ ।

नेपाली संगीतको फाँटबारे जानकारी राख्नेहरूका लागि हिरण्य ‘भोजपुरे’ परिचित नाम हो । साढे पाँच दशकअघि नेपालमा केही तन्नेरीहरू मिलेर सांगीतिक समूह ‘लेकाली’ जन्माएका थिए । त्यसमा विशेषगरी, भोजपुरेबाहेक गणेश ‘रसिक’ र पछि भोजपुरेकै श्रीमती निर्मला श्रेष्ठलगायतको उपस्थिति थियो । भोजपुरकै ट्याम्केडाँडाको ओतमा जन्मे हुर्केका भोजपुरे र रसिकले ‘लेकाली’मार्फत् दिएको योगदानबाट आजसम्म पनि नेपाली संगीत प्रभावित छ । उनीहरूले विशेषगरी लोक र आधुनिक नेपाली संगीतको माध्यमबाट आफ्नैखाले स्वाद विकास गरेका थिए ।

भोजपुरेको सिर्जनशीलता भने पिताको जागिरका सिलसिलामा मकवानपुरतिर रहँदा उनले २०२२ सालमा लेखेको ‘छहराको गीत’बाट सुरु भएको थियो । त्यसको शब्द थियोः
मलाई प्यारो लाग्छ, मलाई राम्रो लाग्छ
लहरा पहरा छहराको देश
पारि पारि हिमालमा उडिरहने
बादलुको केश, मेरो देश

आफैँले संगीत दिएर गाएको भोजपुरेको यो गीत राष्ट्रिय भावनाका नेपाली गीतहरूमाझ अजम्बरी मानिन्छ । यसरी नेपाली साहित्यमा गीतकारका रूपमा उदाएका भोजपुरेले कालान्तरमा कविता, कथा, उपन्यास र बाल साहित्यजस्ता विविध विधामा थुप्रै पुस्तक दिइसकेका छन् । यसपटक भने उनी लघुकथाकारका रूपमा पाठकमाझ उपस्थित भएका हुन् ।

‘बाइरोडको बाटोमा धुलो उडाउँदै’ का यी सर्जक आफू वरपरको परिवेशलाई सरल र रोचक शैलीमा वर्णन गर्न सिपालु छन् । उमेरको उत्तरार्धमा पनि साथीसंगत बीच रमाइलो गरिरहनुपर्ने स्वभावका भोजपुरेले आफ्नो त्यही गुण झल्कने हिसाबले जीवनका साना-साना भोगाइबाट निस्कने भावलाई यी लघुकथामा अभिव्यक्त गरेका छन् । आख्यान भइकन पनि पढिरहँदा कतिपय भोगाइ उनको आफ्नै हुन् भनेर बुझ्न पनि सकिन्छ ।

भोजपुरेले यी लघुकथाहरू ६ वर्षयता सिर्जना गरेका हुन् । भोजपुरेकृत लघुकथा संग्रह ‘मुसुक्क म’ लाई नेपालयले एकसाथ भौतिक पुस्तक, इबुक र लेखककै वाचनमा अडियो बुकका रूपमा बजारमा ल्याएको पब्लिकेशन नेपालयकी प्रमुख कार्यकारी सैजन मास्के बताउँछिन् ।

प्रकाशित मिति: मंगलबार, जेठ ९, २०८० १३:३१