मधेशमा बढदै छ मिटरब्याजविरुद्धको उजुरी, १९ दिन झण्डै १४ हजार दिए निवेदन

फाइल तस्वीर ।

A+ A A-

मधेश प्रदेशका जिल्ला प्रशासन कार्यालयहरूहरूमा मिटरब्याजीविरुद्ध उजुरी दिनेहरूको संख्या बढीरहेको छ । संघीय सरकारले प्रदेश राजधानी जनकपुरधाममा अनुचित लेनदेन (मिटरब्याज) सम्बन्धी जाँचबुझ आयोगको कार्यालय स्थापना गरेपछि सीडीओ कार्यालयहरूमा उजुरी दिनेको संख्या बढेको हो ।

उजुरी दिने बढेपछि उजुरी लिने समय थपिएको छ । सुरुमा १७ देखि ३१ वैशाखसम्म उजुरी लिने समय तोकिएकोमा संख्या बढ्न थालेपछि ७ दिन समय थपिएको थियो । त्यो समय पनि अपुग भएपछि १४ जेठसम्म उजुरी दर्ता हुने सूचना जारी गरिएको छ ।

मिटरब्याज (अनुचित लेनदेन) सम्बन्धी जाँचबुझ आयोगका अध्यक्ष गौरीबहादुर कार्कीले मिटरब्याजपीडितलाई १७ वैशाखदेखि देशभर उजुरी दिन आह्वान गरिएको बताए । उनका अनुसार पीडितहरूले आफूसँग उपलब्ध प्रमाणसहित अनलाइनबाट सिधै आयोगमा वा सीडीओ कार्यालयमा निवेदन दिन सक्नेछन् ।

प्रत्येक जिल्ला प्रशासन कार्यालयमा मिटरब्याजपीडित सहायता कक्ष स्थापना गरिएको छ । सोही कक्षमा निवेदन फाराम निःशुल्क उपलब्ध छ । पीडितहरुलाई फारम भर्न सीडीओ कार्यालयका कर्मचारीहरूले सहयोग गर्ने हुँदा पीडितहरुलाई उजुरी दिन सहज भएको छ ।

पहिलो चरणमा विभिन्न जिल्लामा गएर मिटरब्याजपीडित, राजनीतिक दल, नागरिक समाज तथा प्रहरी प्रशासनसँग अन्तर्क्रिया गरिसकेको कार्कीले बताए । बैंकबाट सहज रूपमा ऋण नपाउँदा मिटरब्याजमा फस्नेहरूको संख्यामा बढेको उनले बताए ।

'ऋण लिँदा जग्गा रजिस्ट्रेसन पास गराएर साँवा र ब्याज तिर्दा पनि जग्गा नफर्काएको जस्ता धेरै केसहरू देखिएको छ,’ कार्की भन्छन्, ‘ऋण लिँदा साहुले गरिबसँग बैंकको खाली चेक लिए । पछि बाउन्स गराएर समस्यामा परिदिएको जस्ता उजुरी पनि आएको छ ।’

आयोगका सदस्य उत्तमराज सुवेदी कानुनविपरीत चर्को ब्याज लिनेहरूले उन्मुक्ति नपाउने बताउँछन् । वैदेशिक रोजगारीमा जान पनि मिटरब्याजको जालोमा फस्नेको संख्या अत्यधिक रहेको पाइएको उनको भनाइ छ ।

१९ दिनमा १३ हजार ८४८ उजुरी

अहिलेसम्म मधेशका ८ जिल्लाका सीडीओ कार्यालयहरूमा मिटरब्याजीविरुद्ध १३ हजार ८ सय ४८ उजुरी परेको छ । सूचना आह्वान भएदेखि १९ दिनको अवधिमा सबभन्दा बढी बारामा २ हजार ९४७ उजुरी परेको छ भने सबभन्दा कम पर्सामा ९ सय ६६ उजुरी परेको छ ।

त्यस्तै, धनुषामा २ हजार १०१, सिरहामा १ हजार ९३०, महोत्तरीमा १ हजार ६९१, रौतहटमा १ हजार ५८८, सर्लाहीमा १ हजार ४९८ र सप्तरीमा १ हजार १२७ उजुरी परेको ती जिल्लाका सीडीओ कार्यालयहरूले जानकारी दिएका छन् ।

प्रकाशित मिति: सोमबार, जेठ ८, २०८० २०:५६