शरणार्थी प्रकणबारे पूर्वराजाको टिप्पणी– हाम्रो गौरव, इज्जत गयो

A+ A A-

पूर्वराजा ज्ञानेन्द्र शाहले जनतालाई झुक्याएर मूर्ख बनाउन नपाइने बताएका छन् । सोमबार धनगढी पुगेका पूर्वराजा शाहले कार्यक्रमलाई सम्बोधन गर्दै पछिल्लो राजनीतिक अवस्थाप्रति कडा टिप्पणी गरेका हुन् ।

‘सोझा साझा जनतालाई मुर्ख भन्दै तिनलाई झुक्याउँदै आफ्नो स्वार्थसिद्ध गर्ने आजको प्रपञ्च अब खुल्दै आएको छ,’ उनले भने । नयाँ नेपालप्रति पनि चिन्ता बढ्दै गएको उनले बताए ।

त्यसैले अब जनताले सोच्ने बेला आएको उनले बताएका छन् । अब कस्तो राष्ट्रिय दृष्टिकोण हामीले लिने र कस्तो प्रणाली पद्धति र परिपाटी हामीले अंगाल्ने एकपटक सोच्नुपर्ने उनले बताए ।

‘के अग्रगामी भनेको परावलम्बी नेपाल हो ? के नेपालको आफ्नो अस्तित्व छैन ? हामी वीर परिश्रमी र स्वाभिमानी नेपाली तर आज हाम्रो वीरता र हाम्रो स्वाभिमान हाम्रो श्रम सीप सबैथोक खोसिएको त छैन र ?’, उनले प्रश्न गरे ।

उनले भने, ‘नेपाली जनतालाई आफ्नो भूभाग र आफ्नो राष्ट्रिय अस्तित्व हुँदाहुँदै शरणार्थी बनाएर अर्काको देशमा श्रम पसिना बगाउन पठाएर आज जे हर्कत गरिरहेका छन्, त्यसबाट हाम्रो इज्जत, गौरव सबै लोप भएर गएको छ । देशभित्रै बसौं, देशमै पसिना बगाउँ र आफ्नो पौरखले आफ्नै देश सपारौं भन्ने भावना हराउँदै गएको छ ।’

धनगढी नेपालको सुदूरपश्चिमी भूखण्डको पुरानो चहलपहलको स्थान भएको उनले बताए । ‘यो अहिले उद्यम इलम र व्यवसायको शहरी केन्द्र बनेको छ । आफ्नो थातथलो र जमिन पवित्र मान्ने यस भेगका भूमिपुत्रहरु आज यस क्षेत्रको चौतर्फी विकास चाहन्छन् । त्यसका निम्ति बढ्दै गएको उत्सुकता तथा जागरुकता निश्चय पनि सहानीय रहेको छ’, उनको भनाइ छ ।

उनले अब गहिरिएर अझै दिलैदेखि नेपाली भएर, नेपाल आमाको हावापानी माटो र मुटुलाई छोएर सोचौं देशभन्दा ठूलो अरु केही हुँदैन भनेर भनेका छन् ।

‘राष्ट्र निर्माणको अभियान र निरन्तरताको भौतिक, शैक्षिक तथा सामाजिक विकासको क्रममा अब नेपालका कुनै पनि भूभाग टाढा र नजिक छैनन्,’ उनले भनेका छन्, ‘राष्ट्रिय अवधारणा बुबाज्यूको राज्यकालदेखि नै उत्कर्षका रुपमा अघि बढेको हो । भोलिको सुन्दर सपनालाई साकार र विपना बनाउन नेपाली मत, मान्यता तथा मनोभावनाअनुसार नेपाली जनतालाई नै जिम्मा दिउँ यसैमा हाम्रो कल्याण छ ।’