परमाणु हतियारबिनाको विश्व हेर्न चाहने अमेरिकी भनाइ, कोसँग कति छ परमाणु हतियार ? (भिडियो)

परमाणु हतियारबिनाको विश्व हेर्न चाहने अमेरिकी भनाइ, कोसँग कति छ परमाणु हतियार ? (भिडियो)

A+ A A-

अमेरिकी राष्ट्रपति जो बाइडेनले आफ्नो राष्ट्रले परमाणु हतियारबिनाको विश्व हेर्न चाहने बताएका छन् ।

आइतबार जापानको हिरोसिमामा जी–७ बैठकको समापनपछि पत्रकार सम्मेलनको आयोजना गर्दै बाइडेनले अमेरिकासँगै जी–७ राष्ट्रहरू परमाणु हतियारको खतराबाट मुक्त भएको संसार चाहने विषयमा प्रतिबद्ध भएको बताएका हुन् ।

उनले भनेका छन्, ‘परमाणु हतियारको खतराबाट मुक्त संसारको लागि जी–७ प्रतिबद्ध छ ।’

उनले जापानको हिरोसिमामा पिस मेमोरियल पार्क ‘परमाणु युद्धको विनाशकारी वास्तविकताको शक्तिशाली स्मारक’ भएको पनि बताए । सो पार्कमा पुगेर जी–७ का नेताहरूले गत शुक्रबार हिरोसिमामा मारिएका मानिसहरूप्रति श्रद्धाञ्जली व्यक्त गरेका थिए ।

(भिडियो)

जापानामा यसपटक जी–७ बैठकको र अमेरिकाको विरोध पनि भएको थियो । अमेरिकाकै कारण जापानमा परमाणु बमले विध्वंश मच्चाएको भन्दै त्यहाँका प्रदर्शनकारीले अमेरिकालाई अपराधीको संज्ञा दिए ।

यसपटक जी–७ बैठक आयोजना भएको हिरोसिमा त्यही शहर हो जहाँ अमेरिकाले सन् १९४५ अगस्ट ६ मा ‘लिटिल ब्वाई’ नामक परमाणु बम खसाएको थियो ।

त्यो एकै बमले ६० देखि ८० हजार जनाको ज्यान लिएको थियो । परमाणु बम खसाइएकै ठाउँमा यी सात आर्थिक राष्ट्र सम्मिलित जी–७ बैठक आयोजना गर्नुको अर्थ परमाणु हतियारलाई निशस्त्रीकरण गरिनुपर्छ भन्ने सन्देशको रूपमा हेरिएको छ ।

तर, पश्चिमा राष्ट्रसँगै उत्तर कोरियाले पछिल्ला दिनहरूमा परमाणु हतियार कार्यक्रमलाई तीव्रता दिन भने छाडेका छैनन् ।

अमेरिकी राष्ट्रपति जो बाइडेनले नै परमाणु हतियारबिनाको संसार देख्न चाहेको बताएसँगै के त्यो सम्भव छ त भनेर छलफल हुन थालेको छ । तर, वास्तवमा परमाणु हतियारबिनाको संसार देख्न चाहने अमेरिकासँगै अत्यधिक परमाणु हतियार भएको देखिन्छ ।

हतियार नियन्त्रण र निशस्त्रीकरणमा अनुसन्धान गर्न समर्पित स्वतन्त्र अन्तर्राष्ट्रिय संस्थान स्टकहोम इन्टरनेसनल पिस रिसर्च इन्स्टिट्युट सिप्रीको सन् २०२२ को प्रतिवेदनअनुसार अमेरिकासँग हान्नका लागि तयारी अवस्थामा १७ सय ४४ परमाणु हतियार छन् । अर्थात् अमेरिकासँग तयारी अवस्थाका परमाणु हतियार धेरै छन् । भण्डारण गरिएका हतियारसहित अमेरिकासँग ५ हजार ४२८ परमाणु हतियार छन् ।

यस्तै हाल युक्रेनमा आक्रमण गरिरहेको रुससँग हान्नका लागि तयारी अवस्थामा १५ सय ८८ परमाणु हतियार छन् । सबै गरेर रुससँग सबैभन्दा बढी ५ हजार ९ ७७ परमाणु हतियार छन् ।

प्रतिवेदनअनुसार चीनसँग ३५०, फ्रान्ससँग २९०, बेलायतसँग २२५ परमाणु हतियार छन् । समग्रमा विश्वमा १२ हजार ७०५ परमाणु हतियार छन् । रोयटर्स र सिप्रीको सहयोगमा

प्रकाशित मिति: सोमबार, जेठ ८, २०८० १४:४९