भारतको कश्मिरमा सुरु भयो जी–२० बैठक, यसकारण चीन सहभागी भएन

A+ A A-

भारत प्रशाशित जम्मु–कश्मिरमा जी–२० पर्यटन कार्यदल ‘टुरिजम वर्किङ ग्रुप’को बैठक सोमबार सुरु भएको छ ।

श्रीनगरमा २२ मेदेखि २४ मेसम्म बैठक चल्नेछ । जी–२० को पर्यटन कार्यदल बैठकमा १९ देश र युरोपेली युनियनका ६० प्रतिनिधिहरूको उपस्थिति रहनेछ ।

तर, जी–२० सदस्य राष्ट्र चीन भने यस बैठकमा सहभागी नहुने भएको छ । चीनको विदेश मन्त्रालयले विवादित क्षेत्रमा हुन लागेको जी–२० बैठक बहिष्कार गर्ने घोषणा गरेको छ ।

चीनको विदेश मन्त्रालयका प्रवक्ता वाङ वेनबिन यस विषयमा भन्छन्, ‘चीनले विवादित क्षेत्रमा आयोजना हुने कुनै पनि प्रकारको जी–२० बैठकलाई विरोध गर्दछ ।’ चीनका अनुसार कश्मिरको यथास्थिती बदल्ने भारतीय प्रयासको उसले विरोध गर्नेछ ।

साउदी अरब र टर्कीका प्रतिनिधिले पनि जी–२० को बैठकमा उपस्थित नजनाउने भएका छन् । भारतले सन् २०१९ मा संविधानको धारा ३७० हटाउँदा टर्कीले विरोध जनाएको थियो । उक्त धारा हटेसँगै जम्मु–कश्मिरले विशेषाधिकार गुमाएको छ र सो क्षेत्र केन्द्र सरकारको अधिनमा पुगेको छ ।

यसअघि पाकिस्तानले पनि श्रीनगरमा हुने जी–२० बैठकको विरोध जनाएको थियो । चीनले पाकिस्तानलाई समर्थन गर्दै यो बैठक बहिष्कार गरेको हो ।

पाकिस्तानले भनेको थियो, ‘श्रीनगरमा यो सम्मेलनको आयोजना गरिनु जम्मु–कश्मिरमा भएको भारतीय अवैध कब्जालाई स्थायी बनाउनुजस्तै हो । यस कार्यले संयुक्त राष्ट्रसंघ सुरक्षा परिषद्को प्रस्ताव र राष्ट्रसंघको बडापत्रका सिद्धान्तका साथै अन्तर्राष्ट्रिय कानुनको घोर उल्लंघन हुनेछ ।’

अन्तर्राष्ट्रियस्तरमा विवादित बनेको क्षेत्रमा अन्तर्राष्ट्रिय सम्मेलन गर्न नहुने पाकिस्तानको तर्क छ । पाकिस्तानले दशकौँ यता जम्मु–कश्मिर पाकिस्तानमा गाभिन चाहेको तर्क गर्छ । पाकिस्तानले मुस्लिम बहुल सो क्षेत्रमा त्यहाँका मुस्लिमहरूमाथि मोदी सरकारले दमन गरिरहेको पनि आरोप लगाउँछ ।

जम्मु कश्मिर भारत या पाकिस्तान कहाँ जान चाहन्छ अथवा त्यहाँका मानिस छुट्टै शासन चाहन्छन् त्यसका लागि जनमत संग्रह हुनुपर्ने पाकिस्तानको लामो समयदेखिको माग हो ।

भारतले भने आफ्नो देशको जुनै क्षेत्रमा पनि बैठक गर्न सक्ने अधिकार आफूलाई भएको बताउँदै आएको छ ।

बीबीसीहिन्दीको सहयोगमा

प्रकाशित मिति: सोमबार, जेठ ८, २०८० १३:५७