जेलेन्स्की जी–७ बैठकमा हुँदा बाख्मुत पूर्ण रुपमै रुसी सेनाको कब्जामा गएको दाबी (भिडियो)

जेलेन्स्की जी–७ बैठकमा हुँदा बाख्मुत पूर्ण रुपमै रुसी सेनाको कब्जामा गएको दाबी (भिडियो)

A+ A A-

युक्रेनका राष्ट्रपति भोलोदिमिर जेलेन्स्की जी–७ बैठकमा भाग लिन शनिबार नै जापान पुगे । आइतबार जी–७ बैठक समापन हुने दिन जेलेन्स्कीले अमेरिकी राष्ट्रपति जो बाइडेनसहित धेरै देशका राष्ट्र प्रमुखसँग भेटवार्ता गरे ।

आज अमेरिकाले अत्याधुनिक एफ–१६ लडाकु विमान र ३७६ मिलियन अमेरिकी डलरको हतियार थप सहयोग गर्ने युक्रेनसँग वाचा गरेको छ । तर युक्रेनका राष्ट्रपति जापानमै हुँदा र हतियारहरु सहयोग प्राप्त गर्ने वाचाहरु पाइरहँदा नै युक्रेनको बाख्मुत शहर भने रुसको कब्जामा गएको रुसी दाबी छ ।

बाख्मुत शहरमा रुसका भाडाका लडाकु समूह वाग्नरले रुसी झण्डा फहराइदिएका छन् । वाग्नरका प्रमुख येभेजनी प्रिगोजिनले युक्रेनको बाख्मुत क्षेत्र कब्जा गरेको भन्दै भिडियो पोस्ट गरेका छन् ।

(भिडियो)

भिडियोमा रूसी झण्डा र वाग्नर समूहको ब्यानर बोकेका लडाकुहरू देख्न सकिन्छ । हाल जापानमा रहेको युक्रेनका राष्ट्रपति भोलोदिमिर जेलेन्स्कीले पनि सुरुवातमा जी–७ का नेताहरुसँग बाख्मुत शहर रुसको कब्जामा गएको बताएका थिए । तर उनले पत्रकारहरुसँग भने सो क्षेत्रमा आफ्ना सेनाहरुले अझै लडिरहेको बताउँछन् ।

एक वर्षभन्दा बढी समययता रुस–युक्रेनबीच युद्ध जारी रहँदा बाख्मुत रुस–युक्रेन युद्धको सबैभन्दा लामो र रक्तपातपूर्ण युद्धको केन्द्रबिन्दु बनेको छ ।

युक्रेनका राष्ट्रपति भोलोदिमिर जेलेन्स्कीले सुरुवातदेखि अन्तिम सास रहेसम्म युद्ध जारी रहने अभिव्यक्ति दिँदै आएका छन् । युक्रेनले आगामी केही हप्तामै रुसविरुद्ध निर्णायक जवाफी हमला गर्ने बताउँदै आएको छ । जसकारण राष्ट्रपति जेलेन्स्की लगातार विदेश भ्रमणमा गइरहेका छन् ।

उनले गतहप्ता मात्र फ्रान्स, जर्मनी र बेलायतको भ्रमण गर्दै त्यहाँबाट हतियार प्राप्त गरेका थिए । हिजो शनिबार मात्र उनी जी–७ बैठकमा पुगे । त्यहाँ पनि उनले हतियारहरु मागे, अमेरिकाले जी–७ बैठकमै थप हतियारहरु दिने वाचा गरेको हो ।

प्रकाशित मिति: आइतबार, जेठ ७, २०८० १५:२२