जी–७ बैठकमा पश्चिमा राष्ट्रले रुस-चीनलाई खतरा भनेपछि मस्काे र बेइजिङ भड्किए (भिडियो)

जी–७ बैठकमा पश्चिमा राष्ट्रले रुस-चीनलाई खतरा भनेपछि मस्काे र बेइजिङ भड्किए (भिडियो)

A+ A A-

जापानमा शुक्रबारयता जारी जी–७ बैठकमा रुस र चीनलाई खतराको रुपमा चित्रण गरेपछि मस्को र बेइजिङ भड्किएका छन् ।

क्यानडा, फ्रान्स, जर्मनी, इटाली, जापान, बेलायत र अमेरिकाका राष्ट्र प्रमुखहरूले गत शुक्रबारदेखि जापानको हिरोसिमामा जी–७ बैठकमा भाग लिइरहेका छन् ।

जी–७ राष्ट्रहरूले युक्रेनमा रुसी आक्रमण अवैधानिक भनिरहेका छन् र रुसमाथि थप कडा प्रतिबन्ध लगाउने सहमति जनाएका छन् ।

अमेरिकाले आफूले थप ३०० वटा प्रतिबन्ध रुसमाथि लगाउने बताएको छ । बेलायतले भने अब रुससँग हिरा, तामा, आलमुनियम र निकलको कारोबार बन्द गर्ने जनाएको छ ।

(भिडियो)

ती राष्ट्रहरूले चीनबाट आफूहरूलाई खतरा उत्पन्न भइरहेको पनि उल्लेख गरेका छन् ।

शुक्रबार बैठक सुरु भएकै दिन जी–७ राष्ट्रहरूले भनेका थिए, ‘तुरुन्तै, पूर्ण रूपमा र बिनासर्त युक्रेनको सम्पूर्ण अन्तर्राष्ट्रिय मान्यताप्राप्त क्षेत्रबाट रुसले आफ्नो सेना र सैन्य उपकरण फिर्ता गर्नुपर्छ ।’

रूसी सेना र सैन्य उपकरणहरू युक्रेनबाहिर नगएसम्म न्यायपूर्ण शान्ति प्राप्त गर्न नसकिने र विश्वमा शान्ति कायम गर्न रुसले बिनासर्त जी–७ राष्ट्रहरूको कुरा सुन्नुपर्ने बताइएको छ ।

युक्रेनविरुद्धको रुसको अवैधानिक र अनुचित आक्रामकताविरुद्ध आफूहरू एक भएर उभिने र युक्रेनलाई समर्थन गर्न जारी राख्ने पनि उनीहरूले बताएका छन् ।

ती राष्ट्रहरूले चीनलाई इंगित गर्दै उक्त राष्ट्रले आर्थिक जर्बजस्ती गरिरहेको आरोप लगाएका छन् । जापानका प्रधामन्त्री फुमियो किसिदा र अमेरिकी राष्ट्रपति जाे बाइडेनले रक्षा क्षमता अभिवृद्धि कार्यक्रममा सहकार्य गर्ने सहमति गरेका छन् ।

जापानका अनुसार चीनको आक्रामकता सो क्षेत्रमा बढेपछि अमेरिकासँग सहकार्य गर्नुपरेको हो ।

जी–७ ले रुसविरुद्ध निर्णयहरू गरेपछि रुसका विदेशमन्त्री सर्गाेइ लाभरोभले ती राष्ट्रहरूले आफ्नै महानता मात्र चाहेको बताएका छन् । उनीहरूको निर्णयले रुसलाई केही फरक नपर्ने उनको भनाइ छ ।

उता चीनले पनि जी–७ ले अन्तर्राष्ट्रिय शान्तिमा बाधा पुर्‍याएको र उनीहरूले आफ्नो व्यवहार परिवर्तन गर्न आवश्यक भएको उल्लेख गरेको छ ।

जी–७ अमेरिकाको पछाडि हिँड्न नहुने चिनियाँ भनाइ छ । आफूमाथि आर्थिक जबर्जस्तीको आरोप लागेपछि चीनको परराष्ट्र मन्त्रालयले भनेको छ, ‘ठूलो एकपक्षीय प्रतिबन्धहरू र औद्योगिक आपूर्ति शृंखलाहरू अवरुद्ध गर्ने कार्यहरूले अमेरिकालाई नै वास्तविक खल पात्र बनाउनेछ ।’

अमेरिका चीनको बेल्ट एन्ड रोड इनिसियटिभ्स अवधारणाको सुरुवातदेखि नै आलोचक हो । अमेरिकाले चिनियाँ यस अवधारणालाई ऋणको पासो र आर्थिक जर्बजस्ती भन्ने गरेको छ । रोयटर्सको सहयोगमा

प्रकाशित मिति: आइतबार, जेठ ७, २०८० १३:४६