नहर र खाल्डाेमा माछा टिपेर जीवन चलाउँथे बौएलाल, अहिले गर्छन् वार्षिक चार कराेडकाे काराेबार

नहर र खाल्डाेमा माछा टिपेर जीवन चलाउँथे बौएलाल, अहिले गर्छन् वार्षिक चार कराेडकाे काराेबार

A+ A A-

लगन र मिहेनत भए गाउँघरमै 'सुन' फलाउन सकिन्छ । यसको ज्वलन्त उदाहरण हुन् ७५ वर्षीय बौएलाल मुखिया । धनुषाको शहीदनगर नगरपालिका-४ ननुपट्टीका उनी २०२३ सालतिर नहर तथा खाल्डाखुल्डीमा माछा मारेर जीविकोपार्जन गर्थे ।

उनै मुखिया अहिले देशकै अब्बल माछापालक बनेका छन् । उनले वार्षिक चार करोड रुपैयाँ हाराहारी माछाको व्यापार गर्दै आएका छन् । शून्यबाट आफ्नो व्यापार सुरु गरेका मुखिया कडा मेहनत र लगनले सफल माछापालक बनेका छन् ।

मुखियासँग अहिले निजी जग्गा ७ विघा क्षेत्रफलमा फैलिएको १५ वटा पोखरी तथा लिजमा ७० वटा गरी ८५ वटा पोखरी छन् ।

baulal-mukhiya (2)1684505682.jpg

एउटा पोखरीबाट वार्षिक पाँच सय किलाेभन्दा बढी माछा उत्पादन हुने गरेको छ । 'मुखिया मत्स्य प्रजनन फार्म' मा बौएलालका छोरा कन्हैया र रमेश पनि खटिएका छन् ।

फार्ममा २५ जनाले प्रत्यक्ष रोजगारी पाएका छन् भने करिब १० हजारभन्दा बढी साना/ठूला व्यापारीले आफ्नै फार्मबाट माछा व्यापार गरी आर्थिक लाभ लिँदै आएको मुखिया बताउँछन् ।

baulal-mukhiya (4)1684505688.jpg नेपालमा मात्र हाेइन, आफ्नाे फार्ममा उत्पादित माछा उनी भारतीय बजारतिर पनि पठाउँछन् । भारतमा वार्षिक २५ लाखको माछा पठाउने गरेकाे उनकाे भनाइ छ । मधुवनी, दभंगालगायतका ठाउँबाट व्यापारीहरू फार्ममै आएर माछा किन्ने गरेको मुखिया सुनाउँछन् । फार्ममा सिलभर, बिग्हेट, नैनी, ग्रास, भाकुरा, कमल कार्पलगायत जातका माछा र भुरा उत्पादन हुने गरेको छ ।

कक्षा ८ सम्म पढेका बौएलाल मुखियाले सफल उद्यमीका रूपमा नेपाल सरकारकाे तर्फबाट भारत र बंगलादेशकाे भ्रमणसमेत गरिसकेका छन् । २०४८ सालतिर ह्याचरी बनाउन नेपाल सरकारले २५ हजार आर्थिक सहयोग गरेको स्मरण गर्दै मुखियाले भने, 'प्रदेश सरकारले अहिलेसम्म कुनै अनुदान दिएन । देशभरबाट किसानहरू यहाँ आएर माछा उत्पादनसम्बन्धी ज्ञान हासिल गर्छन् ।'

माछाको दानामा सिद्रा चाहिने तर भारतबाट ल्याउँदा बढी भन्सार लाग्ने गरेको उनी बताउँछन् । भन्सार छुट हुनुपर्ने, यस क्षेत्रलाई माछा सुपर जोन घोषणा गर्नुपर्ने, सरकारले माछा पालन गर्ने किसानलाई माछा ढुवानीका लागि अनुदानमा गाडी उपलब्ध गराउनुपर्ने, यो व्यवसायलाई प्रोत्साहन गर्न सरकारले पोखरीहरूमा अक्सिजन प्लान्ट लगाउनुपर्ने माग मुखियाको छ । उनले माछा व्यवासायबाट राम्रो प्रगति गरेकाे देखेर अन्य किसानहरू पनि माछा व्यवसाय गर्न हौसिएका छन् ।

आफ्नाे सफलतामा चाहिँ स्थानीय विजयराज विष्टको ठूलाे सहयाेग गरेकाे मुखिया बताउँछन् । उनलाई माछापालन र व्यापार गर्न विष्ट नै प्राेत्साहित गरेका थिए ।

baulal-mukhiya (3)1684505687.jpg

नेपाली कांग्रेसका नेता एवं सो क्षेत्रका सांसद रामकृष्ण यादव कृषिमन्त्री भएका बेला सो क्षेत्रलाई लक्षित गरी यदुकोहामा माछा सुपर जोन कार्यालयको शिलान्याससमेत गरिएको थियो । तर कांग्रेस नेतृत्वको सरकार ढलेपछि उक्त कार्यालय जनकपुर सारियाे । त्यसपछि सो क्षेत्र माछा सुपर जोन हुनबाट बञ्चित भएको वडा अध्यक्ष तथा मुखियाका कान्छा छोरा रमेश मुखिया बताउँछन् ।

प्रकाशित मिति: शनिबार, जेठ ६, २०८० ०८:२४