'द पोइट आइडल चलाउँदा सुरुमा गाली खाइयो, पछि तिनै मान्छेले तारिफ गर्न थाले (भिडियाेसहित)

'द पोइट आइडल चलाउँदा सुरुमा गाली खाइयो, पछि तिनै मान्छेले तारिफ गर्न थाले (भिडियाेसहित)

A+ A A-

‘देशले खोजेको परिर्वतन सरकार हाेइन, संस्कार हो । हामीले रोजेको परिवर्तन आकार होइन, विचार हो ।’

प्रस्तुत कवितांश 'गामबेसी' का कवि स्वर्गीय क्षेत्रप्रताप अधिकारीकाे हाे । अधिकारीले धेरै अगाडि आफ्ना सिर्जनामा अभिव्यक्त गरेका विचार आज झनै सान्दर्भिक बनेकाे देखिन्छ ।

'जहाँ पुग्दैनन् रवि, त्यहाँ पुग्छन् कवि' भनेझैँ बहुप्रतिभावान् साहित्यकार अधिकारीको दूरदृष्टि कतिसम्म थियो भन्ने कुरा उनका जीवित सिर्जनाले प्रस्ट पार्छ ।

उनी कुनै पनि साहित्यकारले सम्मानित जीवन बाँच्न पाउनुपर्छ भन्ने मान्यता राख्थे । सर्जकको सिर्जनाले उचित मूल्य पाउनुपर्ने कुराकाे उनी वकालत गर्थे । अधिकारीले संसार छाेडेकाे दशक नाघिसक्याे तर सर्जकका धेरैजसाे समस्या ज्युँका त्युँ छन् । पछिल्लो पुस्तामा त साहित्यप्रति आकषर्ण नै हराउन थालेको देखिन्थ्याे ।

यस्तो अवस्थामा तिनै गामबेसीका कवि अधिकारीका छोरा अमनप्रतापले बुबाले थाँती राखेकाे अभियानलाई अघि सार्ने प्रयत्न गरिरहेका छन् ।

अमनप्रताप टेलिभिजन कार्यक्रमका सफल निर्देशक हुन् ।

'हिमालयन रोडिज', 'को बन्छ करोडपति ?', 'ऐना'जस्ता सफल नेपाली रियालिटी शो निर्देशन गरिसकेपछि उनले महसुस गरे- आफूले गरिरहेका कार्यक्रमहरू विदेशीका नक्कल हुन् । तिनमा हाम्रो आफ्नोपन खै त ?

यही आत्मानुभूतिले उनलाई सम्झाइदियो हिजो आफ्ना बुबाले खनेको बाटो । तब उनले ‘द पोइट आइडल’ नामकाे टेलिभिजन रियालिटी शो निर्माण गर्ने साहस गरे । कवितामा जकडिएको परम्परागत शैली र सोचलाई चुनौती दिनु चानचुन साहस थिएन । सुरुमा उनलाई असहज नभएको पनि होइन ।

उनले धेरैकाे गालीसमेत खानुपरेकाे थियाे । अमन सम्झिन्छन्, ‘मलाई कतिखेर मन दुख्यो भने, मैले गरेको काममा बुबालाई लिएर गाली गरियो । बुबाकाे नाम बेच्न खोज्यो, कवितालाई व्यापारीकरण गर्न खोज्यो भनेर व्यक्तिगत रूपमै भनियो ।’

याे पनि...

तर, अमनले यस्ता आलाेचनालाई बेवास्ता गर्दै ‘द पोइट आइडल’लाई निरन्तरता दिए । केही शृङ्खलापछि गाली गर्नेहरू नै देशले गर्नुपर्ने, प्रज्ञा प्रतिष्ठानले गर्नुपर्ने काम अमनले गरे भनेर तारिफ गर्न थाले ।

त्यसपछि अमन थप उत्साहित भएर अघि बढे । सुरुमा त उनलाई विज्ञापनदाताहरूले विश्वासै गरेनन् । कार्यक्रम सञ्चालन गर्न सक्ने विज्ञापनसमेत नभेटिएकाे उनी सुनाउँछन् ।

युट्युब र भोटिङबाट थोरै पैसा उठे पनि सबै ‘क्रु र कास्ट’को पैसा तिर्न हम्मेहम्मे परिरहेको अमन बताउँछन् । सबैकाे हकमा त हाेइन, धेरैकाे हकमा- एउटा कविता गोष्ठीमा कविता सुनाएर फर्केकाे कविको कविता घरमा पुगेपछि आफ्नै श्रीमतीले नसुन्ने अवस्था थियाे । यस्ताेमा ‘द पोइट आइडल’ ले नाट्य तथा सांगीतिक शैली दिएर कविताकाे माहाैल नै बदलिदियाे । युवा पुस्तालाई कविताप्रति आकर्षित गर्न द पाेइट आइडलकाे भूमिका महत्त्वपूर्ण रह्याे ।

याे पनि..

घाटा, नाफा जे भए पनि कविलाई स्टार बनाउने कोसिसमा पाएको सफलताले उनी सन्तुष्ट छन् । यस अर्थमा एउटा आयमबाट सुनिरहिएको कवितालाई बहुआयाममा रुपान्तरण गरेर अमनले पछिल्लो पुस्तामा कविताप्रतिको आकर्षण भर्न अहम् भूमिका निर्वाह गरेका छन् ।

विप्लव प्रतीक, अनुप बराल, उपेन्द्र सुब्बा, दिव्यदेव पन्त र सुरक्षा पन्तले अमनले सुनाएको ‘द पोइट आइडल’ सोच मात्रका आधारमा उनलाई साथ दिएका थिए । यी पाँच जनाको साथकै कारण ‘द पोइट आइडल’ सिङ्गो यात्रा सफल भएको अमन बताउँछन् ।

‘हिजो एउटा प्रश्न के थियो भने, कविता लेखेर म पुग्छु कहाँ ? बन्छु के ? मलाई चिन्छ कसले ? मैले गरेका सिर्जना सर्जकमाझ पुग्छ कि पुग्दैन ? यो जमातबाट झगडा गर्दै ‘द पोइट आइडल’ निर्माण गरिएको थियो । अहिले भने मजतिलाई भेट्छु, अब म लेख्छु भन्छन्’, अमनले सुनाए ।

उनले हामीलाई द पोइट आइडलको यात्रा र आगामी योजनाबारे सुनाएका छन् । आउनुस्, भिडियोमा हेरौँ– अमनप्रताप अधिकारीलाई ।

प्रकाशित मिति: शनिबार, जेठ ६, २०८० ०८:००