‘द पोइट आइडल’को चर्चा भारत–पाकिस्तानसम्म पुर्‍याउने लक्ष्य छ : अमनप्रताप अधिकारी (भिडियो)

‘द पोइट आइडल’को चर्चा भारत–पाकिस्तानसम्म पुर्‍याउने लक्ष्य छ : अमनप्रताप अधिकारी (भिडियो)

A+ A A-

हिमालयन रोडिज, को बन्छ करोडपति ?, ऐनाजस्ता सफल नेपाली रियालिटी शो निर्देशन गरिसकेका निर्देशक हुन्, अमनप्रताप अधिकारी । उनी यतिबेला ‘द पोइट आइडल’ नामक अर्को रियालिटी शोको तयारीमा छन् ।

अमन भन्छन्, ‘देशको हितका निम्ति केही योगदान पुग्ने चीजको सिर्जना गरौँ । जसको चर्चा नेपालमा मात्रै होइन, भारत, पाकिस्तानसम्म पुगोस् भन्ने उद्देश्यले द पोइट आइडल शो ल्याउन लागेको हुँ ।'

अमनका पिता क्षेत्रप्रताप अधिकारी (वि.सं. १९९९–२०७०) एक बहुप्रतिभाशाली साहित्यकार तथा गीतकार थिए । जीवनको उत्तरार्द्धमा गीतकारका रूपमा धेरै चर्चा कमाएका उनलाई नारायण गोपालले गाएको 'म त लालीगुराँस भएछु', 'मलाई छोडी मेरो छाया', गोपाल योञ्जनले गाएको 'शान्तिभन्दा पर अर्को भेट्नुपर्ने बुद्ध छैन', कुन्ती मोक्तानले गाएको 'गोठालो जाँदा' र पछिल्लोपटक रामकृष्ण ढकालले गाएको 'जिन्दगीमा धेरै कुरा गर्न बाँकी छ, सबैभन्दा ठूलो कुरा मर्न बाँकी छ' जस्ता गीतले नेपालीका मन–मनमा पुर्‍यायो । पेसागत रूपमा हुलाकको पियनबाट जागिर आरम्भ गरेका उनी साझा बसको कन्डक्टरदेखि साझा प्रकाशनको अध्यक्षसम्म भए ।

तिनै क्षेत्रप्रतापका छोरा अमनलाई भने बुबाजस्तो साहित्यकार बन्न मन थिएन ।

अमनको लगाव टेलिभिजनप्रति थियो । सन् १९९९ मा समाजशास्त्रमा त्रिभुवन विश्वविद्यालयबाट स्नातकोत्तर गरेका उनी सन् २००५ मा फिल्म एन्ड टेलिभिजन विषयको अध्ययनका लागि स्कटल्यान्डस्थित एडिनबर्ग कलेज पुगे । त्यही क्रममा बिग ब्रदर नामक शोमा इन्टर्नसिपसमेत गरे ।

पढाइ पूरा गरेपछि त्यहीँ काम पाए । तर, अमनलाई नेपालमै केही गरौँ भन्ने थियो । उनी नेपाल फर्किए र पुनः टेलिभिजनमा काम गर्न सुरु गरे ।

बाल्यकालमा बुबासँगै कहिले नारायण गोपाल, कहिले कालीप्रसाद रिजाल त कहिले राष्ट्रकवि माधवप्रसाद घिमिरेको घरमा पुग्थे अमन । माधव घिमिरेलाई भेट्दा हरेकपटक अमनलाई सुनाउने गर्थे, ‘ए छोरो सुन न, तेरो बुबा क्षेत्रको मोपेड थियो, बुझिस् । टुटुटु... आवाज आउने मोपेड थियो । तेरो बुबा त्यतिबेला साझा प्रकाशनको म्यानेजर थिए । लैनचौरमा तेरो बुबाको घर । त्यतिबेला गाडीसाडी केही हुँदैनथ्यो । मोपेडको आवाज थाहा पाउँथेँ । ल क्षेत्रे आयो है, भन्थेँ मैले । झण्डैझण्डै दसैँको समयतिर टक्क क्षेत्रले आएर खाममा त्यो वर्षभरि छापिएका मेरा किताब र कविताको रकम दिन्थे । लेख्न उक्साइरहन्थे । पैसा दिएँ त मैले, अरु काम गर्ने हैन बुबा, लेख्ने– साझाबाट छापिन्छ ।’

माधवप्रसाद घिमिरेले क्षेत्रप्रताप अधिकारीको आग्रहमा धेरै कविता लेखेको स्मरण गरेको अमन सम्झिन्छन् ।

घिमिरेको कुराले अमनलाई प्रत्येकपल्ट बुबाप्रतिको आदरभाव बढ्थ्यो । उनलाई कवि भनेको दुई/चार जनाको बीचमा रहेर एउटा कुनामा कविता सुनाउने सामान्य व्यक्ति हो भन्ने लाग्थ्यो । तर, माधव घिमेरले सुनाएको बुबाको कथाले उनलाई सोच्न बाध्य बनायो । आखिर गएर कुनै पनि गीत सिर्जनाको पहिलो चरण शब्द लेख्ने नै हो । त्यसपछि मात्र संगीतकारमा पुग्ने हो । तर, त्यही शब्दलाई न्याय भएको रहेनछ भन्ने महसुस गर्न थाले अमनले ।

जसले कविता या केही लेखिरहेको छ, त्यो लेख्ने व्यक्ति स्टार हो । तर, उसले आफूलाई स्टार महसुस गर्न पाएको छैन । उसलाई हामीले स्टार महसुस गराउनुपर्छ । उसले कवितै लेखेर बाँच्न सक्नुपर्छ भन्ने अमनलाई महसुस हुन थाल्यो । जसका लागि विभिन्न स्थानमा कविता कन्सर्ट आयोजना होस् । जहाँ हजारौँ मानिस टिकट काटेर उसको कविता सुन्न आऊन् । एउटा कविले जीवन धान्न कवितै लेखेर सकोस् भन्ने सोच अमनको मनमा आयो ।

करिब साढे २ वर्षअघिको कुरा हो । जतिबेला अमन हिमालय टेलिभिजनमा कार्यरत थिए । कवितामा त केही गर्नैपर्छ भन्ने सोच आइरहेको थियो । काव्यशैली टेलिभिजन कार्यक्रमको खाका तयार पारे । तर, कोरोना महामारीका कारण काव्यशैली त्यत्तिकै थन्कियो । अमन त्यत्तिकै बसेनन् । काव्यशैलीको खाकालाई १०औँ पटक परिमार्जन गरे ।

कोरोना सामान्य भयो । सहयोगी हातहरू जोडिन थाले । अहिले त्यही काव्यशैलीलाई ‘द पोइट आइडल’ नाममा रियालिटी शो घोषणा गरिएको अमन बताउँछन् ।

आइडलमा कसले र कसरी सहभागिता जनाउन सक्छन् ?

आइडलमा सहभागी हुन नेपाली नागरिक हुनु जरुरी छैन । नेपाली भाषालाई माया गर्ने जोकोहीले यस प्रतियोगितामा भाग लिन सक्ने अमन बताउँछन् ।

डिजिटल अडिसनमार्फत असोज ३१ गतेसम्म नेपालभित्र र बाहिर रहेका जोकोहीले ‘द पोइट आइडल’ मा भाग लिन सक्छन् । प्रोडक्सन टिमले सबै सहभागीको प्रस्तुति निर्णायक समूहमाझ राख्नेछ । त्यसमध्येबाट निर्णायक समूहले छनोट गरेका प्रतिस्पर्धीलाई फिजिकल अडिसनमा बोलाइनेछ ।

फिजिकल अडिसनबाट १४ जना छनोट हुनेछन् । त्यसपछि प्रतिस्पर्धीहरू प्रस्तुति र भोटका आधारमा अगाडि बढ्नेछन् । भोट आउट भएकामध्येलाई भने निर्णायक समूहले दिएको विषयमा तत्काल आँसुकविका रूपमा आफ्नो सिर्जना तयार गर्नुपर्नेछ ।

त्यसमध्ये उत्कृष्ट एकले अगाडि बढ्न पाउनेछ । अन्त्यमा एक जना विजेता बन्नेछ । विजेताले १० लाख नगदसँगै यात्रा पब्लिकेसनमार्फत ५ लाखबराबरको किताब प्रकाशन गर्न पाउनेछ ।