व्हाट्सएप डीपीले खुलायो ५० लाख चाेरीको रहस्य

A+ A A-

भारत मध्य प्रदेशको राजधानी भोपालमा एउटा फोटोका कारण ५० लाख रुपैयाँ पर्ने गहना र पाँच लाख रुपैयाँ नगद चोरीको घटना थाहा भएकाे छ ।

चोरीकाे आरोपमा एक महिला पक्राउ परेकी छन् । प्रहरीका अनुसार, महिनाको ८ हजार कमाउने ती महिलाको घरमा एसी, सीसी क्यामेरादेखि सम्पूर्ण सेवा सुविधाहरू छन् ।

उनीविरुद्ध चाेरी मुद्दा दर्ता गरिएको छ ।

टीटी नगर थाना क्षेत्रको निशात कोलोनीमा बस्ने डाक्टर भूपेन्द्र श्रीवास्तवले आफ्नो घरबाट महँगा गहना चोरी भएको भन्दै उजुरी गरेका थिए । डा. भूपेन्द्र एक अस्पतालका मालिक पनि हुन् ।

आफ्नो रिपोर्टमा उनले लेखेअनुसार, केही समययता उनको घरबाट एकपछि अर्को गर्दै महँगा गहना र नगद हराइरहेकाे थियाे । घरमै काम गर्ने महिलामाथि शंका लागेपछि २० दिनअघि मात्रै उनलाई कामबाट निकालिएको थियो । डाक्टरको रिपोर्टअनुसार, उनकी पत्नीसँग काम गर्ने महिलाको व्हाट्सएप नम्बर छ ।

काम गर्ने महिलाको डीपीमा लगाइएको फोटोमा जब डाक्टर पत्नीको नजर गयो, तब उनले देखिन्, आफ्नै घरमा काम गर्ने महिलाको कानमा महँगो झुम्का । ‘यस्तै झुम्का मेरी पत्नीको थियो । जब मेरी पत्नीलाई शंका लाग्यो, तब उनले लकर खोलेर हेरिन् । त्यसमा राखिएको झुम्का थिएन । घरबाटै गहना चोरी भइरहेको कुरा बल्ल थाहा भयो’, डाक्टर भूपेन्द्रले भनेका छन् ।

चोरी स्वीकार

डाक्टरको उजुरीपछि प्रहरीले ती महिलालाई हिरासतमा लिएर सोधीखोजी गर्दा उनले चोरीको आरोप स्वीकारिन् । आरोपी महिलाबाट प्रहरीले ५० लाख रुपैयाँ मूल्य बराबरका गहना, जसमा टप्स, नेकलेस, जडाऊ सेट र सुनका चुरा छन् । साथै साढे पाँच लाख रुपैयाँ नगद पनि बराम गरिएको छ ।

प्रहरीलाई दिएको बयानमा आरोपी महिलाले घरमा कोही नभएका बेला चोरी गर्ने गरेको स्वीकारेकी छन् । उनी कुनै फङ्क्सनमा जाँदा मालिकनीकै गहना लगाएर जान्थिन् ।

प्रहरीका अनुसार, डाक्टरको घरमा काम गर्ने आरोपी महिलाको मासिक पारिश्रमिक ८ हजार रुपैयाँ थियो । उनका श्रीमानको समेत गरेर घरको आय १५/२० हजार रुपैयाँ हुन्छ । तर उनको घरमा ऐसआरामका धेरै चिज फेला परेको प्रहरीले जनाएको छ । (आजतकबाट)

प्रकाशित मिति: शनिबार, जेठ ६, २०८० ०७:३२